Naviny kultury
№ 6 (163), 7 — 14 lutaha 2000 h.
Naviny kultury
Navahradzkija mastaki
U staličnym Domie družby prachodzić vystava mastakoŭ z Navahradku: žyvapis Kastusia Kačana i Raisy Siplevič, tvory fotamastački Taciany Caruk (zdymki zaniadbanych mohiłak i adbudavanych śviatyniaŭ Navahradčyny), a taksama pracy Viktara Staščaniuka — histaryčnaja rekanstrukcyja zamkaŭ i starych haradoŭ Biełarusi.
Piśmieńnik i smałakur
Ansambal “Biełaruskija pieśniary” j artysty Kupałaŭskaha ŭziali ŭdzieł u vinšavańni z 60-hodździem prazaika Leanida Dajnieki na viečarynie ŭ Domie litaratara. Aŭtar papularnych histaryčnych ramanaŭ “Mieč kniazia Viački” i “Śled vaŭkałaka”, Leanid Dajnieka pracuje ciapier dyrektaram firmy “Pasat”, jakaja vyrablaje harełku ŭ Smalavickim rajonie. Volha Ipatava pažadała jubilaru kinuć harełačny biznes i viarnucca ŭ litaraturu, bo siońnia nibyta vielmi nie staje histaryčnych ramanaŭ dla dziaciej.
Kino “Baran”
Za ŭvieś 99-y hod na biełaruskija hrošy byŭ źniaty adziny mastacki film — karotkametražnaja 15-chvilinnaja stužka Andreja Kudzinienki “Baran” pavodle apaviadańnia Andreja Jaickaha, jaki trahična zahinuŭ napiaredadni zdymak. Premjera karciny prajšła 1 lutaha ŭ Sajuzie kinematahrafistaŭ. Dziejučych asobaŭ usiaho try: małady viaskovy haspadar z žonkaj dy ichny baran, jaki štonočy łazić na strachu dryvotni, kab suzirać zorki. Hałoŭnyja roli vykonvajuć artysty Kupałaŭskaha Jana Rusakievič i Alaksandar Aŭčyńnikaŭ. Film zdymaŭsia na ŭłasnyja srodki kinastudyi (i kaštavaŭ 4 miljony denaminavanych rubloŭ). Amal uvieś astatni biudžet biełaruskaha kino na minuły hod źjeła biełaruska-rasiejskaja stužka Michaiła Ptašuka “Momant iściny”. Jaje premjera pryznačanaja na 9 traŭnia.
Balet madern
U Miensku źjaviŭsia pieršy teatar baletu, jaki abraŭ svaim asnoŭnym žanram nie klasyčnuju chareahrafiju, a sučasny taniec. Mastacki kiraŭnik hurtu “Novy balet” — Volha Repina, artystka Teatru muzkamedyi, vučanica Jelizarjeva. “Novy balet” vystupaje na scenie klubu imia Dziaržynskaha. 31 studzienia tam adbyłasia premjera spektaklu pavodle knihi Kiena Kizi “Palot nad hniazdom ziaziuli” (rolu pravadyra paŭstańnia varjataŭ stancavaŭ Vital Krasnahłazaŭ).
Juraś Barysievič