Naviny

---

 Naviny

 

Cudatvorac z Chmieleva

U vioscy Chmieleva, što pad Žabinkaj, budzie zakładzieny manastyr-pustyń. Małady manach ajciec Sierafim, jaki śviatarom u hetaj vioscy, maje byccam by niezvyčajny dar vylečvać ludziej i vyhaniać ź ich djabła. Da jaho jeduć i ź Bieraścia, i z-za Bieraścia, i navat z-za miažy, tamu miascovyja ludzi i paprasili dazvołu adčynić tut nievialiki klaštar, kiravać jakim budzie ajciec Sierafim, i dazvoł im dali, piša BiełaPAN.

 

Reekspart biełaruskaj elektryki

Z pačatku leta 2000 hodu Biełaruś budzie, mahčyma, ekspartavać u Polšču elektryčnaść, vyrablenuju na Biarozaŭskaj DRES. Pryncypovaje rašeńnie nakont hetaha ŭrad i Nacbank pryniali. Nieŭzabavie ŭ Miensku musić adbycca sustreča pradstaŭnikoŭ enerhietyčnych kampanijaŭ Rasiei, Polščy j Niamieččyny na hetuju temu, piša BiełaPAN. Reč u tym, što heta faktyčna budzie nia ekspart, a reekspart elektraenerhii, bo Biełaruś sama na svaje patreby raniej kuplała elektryčnaść u Litvie, a ciapier najbolš — u Rasiei.

B.T.

Na śmierć Płaskavickaha

Mahiloŭski historyk Ihar Marzaluk pryvioz z maskoŭskich biblijatek nieviadomyja dahetul paetyčnyja radki, što naležać piaru Simiaona Połackaha, — nieviadomuju versiju epitafii «Na śmierć jasnavialmožnaha šlachcica Hieorhija Płaskavickaha, zabitaha Maskvoj». Simiaon Połacki napisaŭ jaje na starabiełaruskaj movie. Hetaja ž epitafija ŭžo była viadomaja z 60-ch hadoŭ u polskamoŭnym varyjancie. Ciapier vyśvietliłasia, što jość i aryhinalny starabiełaruski tekst. Teksty absalutna samastojnyja, ich abjadnoŭvaje tolki tema. Epitafiju, na dumku sp.Marzaluka, svajaki zabitaha pana tak i zamaŭlali: u dźviuch roznych versijach.

Symon Hłazštejn, Mahiloŭ

 

Usie pradajuć, a nia ŭsich sadžajuć

U Mścisłavie pa šeść hadoŭ atrymali były staršynia kałhasu «Kamunist» Anatol Hocmanaŭ i jahonaja žonka Nadzieja. Jany — apošnija achviary toj viadomaj historyi, kali Łukašenka vyzvaliŭ ad pasady staršyniu rajvykankamu Siarhieja Dziemidzienku, abłvykankamu — Kuličkova i hałoŭnaha sielhasnačalnika vobłaści Adaškieviča. Svaje terminy atrymali Dziemidzienka i kolišni staršynia rajsavietu Alaksandar Piatroŭski. Ciapier dajšli j da kałhaśnikaŭ. A pryčyna ŭsich straściaŭ — u prodažu miasa ŭ Rasieju. Hocmanavy byccam by pradali za miažu 15 t.

S.H.

 

Zimovaja atava

Jašče nia skončyłasia zima, a Pinski harvykankam užo davioŭ usim pradpryjemstvam i arhanizacyjam horadu, niezaležna ad formy ŭłasnaści, zadańnie pa narychtoŭcy siena. Narychtoŭku treba skončyć da 1 kastryčnika, pryčym pałovu siena treba nakasić ŭžo da 1 červienia. Tak tarmasiacca, bo na čas stojłavaha peryjadu dziela narmalnaha ŭtrymańnia letaś u siarednim było nazapašana tolki 14 centneraŭ kormu zamiest 22 patrebnych.

Na toje, što takija dziejańni supraćzakonnyja i absurdnyja, vertykal nie źviartaje ŭvahi. Ale nivodnaje pradpryjemstva nie vystupiła suprać prymusu — z uładami lepš nie svarycca. A jak užo tam tyja haradzkija pracujuć, pakazała pravalnaja letašniaja kasavica. Chto ž napracuje «na dziazd́ku»?..

Sioletniaja vykankamaŭskaja pastanova daje pradpryjemstvam peŭnuju svabodu dziejańniaŭ. Ciapier firmy, jakija nia chočuć šmat kasić, mohuć, pa ŭzhadnieńni z padšefnymi haspadarkami, nabyvać siena na pałovu z kałhasami albo ramantavać dla ich sielhastechniku.

Siarod inšych zachadaŭ ułady pa padvyšeńni kolkaści karmoŭ — zabarona ich vyvazu za miežy rajonu. Adpaviedny zahad rajvykankamu padpisany 7 lutaha.

Alaksiej Dzikavicki, Pinsk

 

Jadachimikaty — na skład!

Haradzienskija ŭłady vyrašyli zmahacca z kradziažom jadachimikataŭ. Ich zaraz nia buduć trymać u kałhasach, jak raniej, a na ahulnych składach z dobraj achovaj, adkul kałhasy zmohuć atrymlivać ich pa častkach.

Jadachimikaty davoli doraha kaštujuć, tamu ichny kradziež daje dobry prybytak. Raniej na Haradzienščynie była schoplenaja vialikaja chieŭra, jakaja pierapraŭlała ŭ Polšču kantrabandaj kradzienyja kałhasnyja jadachimikaty. U hiešefcie ŭdzielničali mytniki i pamiežniki z našaha i polskaha bakoŭ.

S.M., Horadnia

 

Bieź jady ni tudy i ni siudy

U Smarhoni na tych pradpryjemstvach, dzie zajmajucca pierapracoŭkaj sielskahaspadarčaj pradukcyi, stanovišča katastrafičnaje. Praź niedachop małaka na zavodzie suchoha abiastłuščanaha małaka abjomy vypusku pradukcyi źnizilisia bolš jak na 20%. Mienš vypuskajuć ciapier i kambikarmoŭ, i aŭsianych krup.

M.V., Astraviec