Listy ŭ redakcyju

---

 Listy ŭ redakcyju

 

Padtrymajem Vieru Cierlukievič

Krychu sa spaźnieńniem pračytali №6 ad 7 lutaha, dzie hutarka ź Vieraj Cierlukievič, jakaja padała pozvu ŭ sud na Zimoŭskaha. Uražvaje, što žančyna zdolnaja addać usiu svaju pensiju, dy jašče pazyčyć dziela abarony svajho honaru j honaru inšych ludziej. A ci mnoha znojdziecca siarod nas, maładziejšych i zdaraviejšych za jaje, dy sa značna bolšymi zarobkami tych, chto hetak ža «vykinie prosta tak» choć by čverć toj sumy?

Źviartajemsia da čytačoŭ «Našaj Nivy» i ŭsich dobrych ludziej: kampensujem razam straty spn.Viery dy dapamožam joj, kab jana mahła davieści praces da kanca. Jana zasłuhoŭvaje našaj dapamohi. Dziela hetaha dasyłajem na adras redakcyi 500 novych rubloŭ. Chaj hrošaj budzie sabrana bolš za tyja 15 miljonaŭ, jakija patraciła Viera, ale mienš za 3 miljardy, jakija jana patrabuje praz sud. Heta ŭžo sprava sumleńnia sp.Zimoŭskaha.

Maryna i Alaksandar, Miensk

 

TBM pamylajecca

U 1992 h. Kamisijaj pa kultury BNF «Adradžeńnie» była raspracavanaja kancepcyja adradžeńnia histaryčnaj haradzkoj tapanimiki Miensku i nadańnia novych najmieńniaŭ vulicam, płoščam i inšym abjektam haradzkoha asiarodździa. Hetuju kancepcyju padtrymała Tapanimičnaja kamisija Biełaruskaha krajaznaŭčaha tavarystva. Taja kancepcyja zvodziłasia da nastupnaha:

1) Poŭnaje adnaŭleńnie histaryčnych nazvaŭ dakalanijalnaha peryjadu, najpierš u miežach Vierchniaha horadu i haradzkoha vału (heta realnyja śviedki niezaležnaści Biełarusi — VKŁ i samakiravańnia Miensku). Histaryčny centar horadu — zapaviednik architektury, histaryčny i tapanimičny.

2) Zachavańnie nazvaŭ kalanijalnaha akresu, uźniknieńnie jakich adbyłosia naturalnym čynam na miascovaj hlebie i tradycyjach, dy jakija całkam adpaviadajuć biełaruskim moŭnym asablivaściam, i jakija nie abciažaranyja elementami kalanijalnaj, imperskaj idealohii.

3) Adnaŭleńnie miascovaj mikratapanimiki na abšarach byłych pradmieściaŭ i sučasnych novych rajonaŭ horadu (napr. Lachaŭka, Civali, Kamiennaja Horka i h.d.)

4) Zapaŭnieńnie tapanimičnych pustak i pierajmienavańnie nazvaŭ kalanijalnaha akresu nacyjanalnym histaryčnym i kulturnym materyjałam.

U hety blok traplali imiony vydatnych dziejačoŭ historyi i kultury Biełarusi ad Rahvałoda, Usiasłava Čaradzieja dy Eŭfrasińni Połackaj da Vitaŭta Vialikaha, Lva Sapiehi, Radziviłaŭ, F.Bahuševiča dy M.Bahdanoviča.

Imia F.Bahuševiča prapanavali nadać vulicy Čyrvonaarmiejskaj (kalanijalnaja nazva Skobieleŭskaja). Taki vybar byŭ nie vypadkovy: vulica prylahaje da histaryčnaha centru, na joj raźmieščany Nacyjanalnaja Biblijateka i histfak BDU. Kancepcyju pieradali ŭ Mienharvykankam, ale tam ža i pachavali. Choć prapanova słušnaja.

U suviazi z hetym vialikaje ździŭleńnie prapanova TBM ab nadańni imia F.Bahuševiča vuł.Internacyjanalnaj. Hetaja vulica maje histaryčnyja nazvy: u adzin bok ad Daminikanskaj (Enhielsa) — Pancyrnaja, abo Vialikaja Zboravaja, u druhi bok — Vałockaja, abo Vałoki Połackija. Vulica ŭ histaryčnym centry horadu, i nazvy jaje ŭjaŭlajuć vialikuju histaryčnuju i kulturnuju kaštoŭnaść. Prapanova ž TBM nieabdumanaja i niebiaśpiečnaja.

Hety ž list ja dasyłaju sp. U.Jarmošynu.

M.Kupava, staršynia Nacyjanalna-kulturnaj kamisii Partyi BNF

 

Pryśviačajecca Viktaru Šnipu

Adzin sabaka ŭstaŭ ranicaj, hlanuŭ u lusterka, a na jaho hladzić adtul Hraždan. Pajšoŭ tady sabaka ŭ ZAHS i źmianiŭ svajo proźvišča na Sahraždan.

V.V., Miensk