Siarhiej Rukamojnikaŭ. Aściarožna, bandyty!
№ 9 (166), 28 lutaha — 6 sakavika 2000 h.
Aściarožna, bandyty!
Epizod pieršy.
Nia tak daŭna na adnym z rečavych rynkaŭ Biełarusi nabyvała žančyna štany svajmu synu, chłopčyku 8 hadoŭ. Prymieryli štany, usio narmalna, maci zadavolenaja, stała z pradaŭščycaj handlavacca. Kirmaš jość kirmaš. Praź niekatory čas jany syšlisia ŭ košcie i pradaŭščycy byli pieradadzienyja hrošy. Usio b dobra, adnak padziei stali raźvivacca zusim pa inšym scenary, čym čakali ŭdzielniki ździełki. Raptam jak z-pad ziamli vyskačyŭ macačok, schapiŭ pradaŭščycu za ruku i davaj jaje załomvać, pa ŭsim było vidać, što rabić jon heta ŭmieje. Žančynie 50 hadoŭ, u jaje ad bolu ślozy na vačoch vystupili, jana i kaža: «Synok, što ž ty robiš, ty ž mnie ruku złomiš!» Zabraŭ macačok hrošy i adrazu ž litaralna sarvaŭ sa škalara nabytyja štany. Žančyna-pakupnica nie razumieje ničoha, dumaje — prosta rabujuć. Škalar zapłakaŭ, staić u majtkach, kałocicca ad strachu i ad choładu. Tut dastaje macačok niejkaje paśviedčańnie i kaža: «Padatkavy inspektar, vy ździejśnili niezakonnuju valutnuju aperacyju, tym samym parušyli Dekret Prezydenta». Usie narešcie zrazumieli, u čym sprava, akazvajecca, heta nie bandyt, a padatkavy inspektar. Paviali ŭdzielnic ździełki ŭ padatkavuju ispekcyju.
Žančynie-pradaŭščycy macačok tak vykruciŭ ruku, što jana potym z tydzień jaje padniać nie mahła, u padatkavaj ispekcyi joj «pajšli nasustrač» i vypisali štraf kala 100 dalaraŭ, a mahli b vypisać dalaraŭ na 800. Žančynie-pakupnicy vypisali štraf i kanfiskavali ŭsie dalary, što ŭ jaje z saboj byli, škalaru daviałosia abyścisia biez štanoŭ, jon staŭ «hałoŭnym» vinavatym niezakonnaj valutnaj aperacyi.
Epizod druhi.
Padychodzić na rynku žančyna da svajoj znajomaj, taja handluje kašulami, błuzkami i štanami. Jak heta časta byvaje, kali źbirajucca dźvie žančyny, pačałasia pamiž imi razmova pra žyćcio, pra dziaciej i pra košty. Adna i kaža: «Hetaja kašula darahaja, 10 dalaraŭ, heta siońnia vielmi šmat». Tolki jana heta skazała, jak padskočyli da jaje dva mužyki, schapili za ruki i kažuć: «Vy ździejśnili niezakonnuju valutnuju aperacyju, chadziemcie z nami». Taja kaža: «Chto vy takija? Ja ničoha nie rabiła, adpuścicie mianie, mnie baluča!» Tyja heta pryniali za supraciŭ, padniali kurtku, zakrucili nad hałavoj i paciahnuli jaje pa ziamli. Žančyna kryčyć: «Mnie baluča! Adpuścicie mianie, ja sama pajdu!» Pakul jany jaje ciahnuli, dla «pierakanaŭčaści» stukali pa hałavie, kali jana padymałasia na nohi, jany prafesijna davali padsiečku. Paśla taho, jak jany vołakam pryciahnuli jaje ŭ adździaleńnie milicyi i abšukali, vyśvietliłasia, što anijakich finansaŭ u žančyny niama. Žančyna zrazumieła, što supracoŭniki finansavaj milicyi zatrymali jaje nibyta za niezakonnuju valutnuju aperacyju i pačała zadavać pytańni: «Čamu vy mianie źbili?» Na nastupny dzień žančyna źviarnułasia da sudmedeksperta dziela taho, kab toj zaśviedčyŭ paboi, što i było zroblena. Sudmedekspert zaśviedčyŭ: na rukach i na ciele žančyny bolš za 15 kryvapadciokaŭ.
Była padadziena skarha ŭ prakuraturu i ŭ inšyja instancyi na dziejańni supracoŭnikaŭ finansavaj milicyi. Praź niekatory čas byŭ atrymany adkaz, što dziejańni supracoŭnikaŭ finansavaj milicyi byli pravamocnymi!
Epizod treci.
Staić na rynku i handluje maładaja pryhožaja žančyna, padychodzić da jaje supracoŭnik adździełu pa baraćbie z ekanamičnymi złačynstvami (ABEZ) i pačynaje praviarać dakumenty (sertyfikaty, paśviedčańni, nakładnyja i h.d.), naturalna, znajšoŭ da čaho pryčapicca i składaje akt.
Paśla składańnia aktu supracoŭnik ABEZ i kaža joj: «Budu chadzić kožny dzień, praviarać, kali nie pieraśpiš sa mnoj!» U žančyny skivica advisła, što rabić? Jana padyšła da susiedniaj pałatki, tam handluje ŭdava, joj hadoŭ za sorak, i raspaviadaje, maŭlaŭ, tak i tak. Taja raić: «Kali jon taki seksualna zakłapočany, niachaj da mianie padydzie, ja ź im raźbiarusia, a nie — idzi paskardzisia na jaho». Pajšła jana da jaho načalnika, toj vysłuchaŭ, paśmiajaŭsia, havoryć: «Ja raźbiarusia». Jak jon raźbiraŭsia, nieviadoma, ale supracoŭnik hety praciahvaje chadzić pa rynku, nibyta ničoha i nie było, i takija zajavy robić inšym maładym pradaŭščycam!
Epizod čaćvierty.
Adzin z supracoŭnikaŭ šmatlikich kantrolnych viedamstvaŭ vyrašyŭ papravić svajo finansavaje stanovišča. Prychodzić jon na rynak i pačynaje šukać «achviaru», łavić pradaŭcoŭ na dalarach, dy i paśviedčańnie pry sabie maje. I voś narešcie złaviŭ! «Achviara» razumieje, što za heta štraf vializny, tym i karystajecca supracoŭnik, jon kaža: «Nu što ž, zrobim tabie padarunak da Novaha hodu, hani 20 dalaraŭ i ŭsio!» Addaŭ pradaviec jamu 20 dalaraŭ i staić «ščaślivy», bo «padarunak» atrymaŭ, i ad kaho!
Usie hetyja epizody ŭziaty z žyćcia pradprymalnikaŭ.
Tak što jašče raz: «Aściarožna, bandyty!»
Siarhiej Rukamojnikaŭ, Horadnia