Bohuś Bijatlanionak. Niabiesnaja «Mafija»
№ 9 (166), 28 lutaha — 6 sakavika 2000 h.
sport
Niabiesnaja «Mafija»
Dva hady tamu, pad čas Alimpijady ŭ Nahana, mužčynskaja indyvidualnaja honka ŭ bijatlonie była spynienaja. Dobraja častka ŭdzielnikaŭ na momant pryniaćcia taho rašeńnia ŭžo startavała. Niekatoryja navat dajechali da finišu, siarod jakich byŭ i naš Alaksandar Papoŭ, siońniašni hałoŭny trener biełaruskaj kamandy. Jahony čas byŭ realnaj zajaŭkaj na alimpijski medal. Paśla Alaksandar Ryhoravič hučna aburaŭsia z ekrana televizara, kažučy, što spabornictvy admianiła mižnarodnaja spartyŭnaja mafija, jakaja, ź jahonych słovaŭ, ubačyŭšy niaŭdały start «svaich» spartoŭcaŭ dy niečakanuju ŭdaču biełarusa, vyrašyła admianić honku «z-za drennych umovaŭ nadvorja»...
...Učora, u niadzielu, na čempijanacie śvietu ŭ narveskim Chałmenkolenie adbyłosia toje, što zmusiła nas uspomnić pra «japonskaje bijatlonnaje zapadło».
Na pieršym etapie mužčynskaj estafety Alaksiej Ajdaraŭ prymusiŭ brudna vyłajacca ŭsich mižnarodnych mafijozi, jakija źjechalisia na zakryćcio bijatlonnaha «mundyjalu». Adstralaŭšysia, jak z kulamiotu, dy praniesšysia pa łyžni, jak kameta z matorčykam, sapraŭdny biełaruski mužyk sibirskaha pachodžańnia pieradaŭ estafetu samy pieršy, pakinuŭšy daloka zzadu słavutych niemcaŭ. Adnak Piatro Ivaška daŭ žachlivy dla biełaruskaj družyny vynik — 5 štrafnych kołaŭ na druhim etapie. Estafetu Piatro pieradaŭ siomy, z adstavańniem ad lideraŭ-niemcaŭ na dźvie z pałovaj chviliny. «Mižnarodnaja mafija» ŭžo pacirała ruki ŭ čakańni hańby biełaruskaj kamandy, dy ciešycca im było rana: na trasu vyjšaŭ Vadzim Sašuryn. U stralbie ležačy Vadzik nia daŭ nivodnaha pudła. Adnak ci to niejkaja śvińnia źbiła jamu pryceł na łyžni, ale na «stojcy» biełarus zarabiŭ-taki adzin penalty loop. Estafetu jon pieradaŭ, znachodziačysia na treciaj pazycyi z adstavańniem ad niemcaŭ krychu bolš za chvilinu...
...Aleh Ryžankoŭ, jaki bieh za Biełaruś na apošnim etapie, mieŭ usie šancy na medali, adnak, mabyć, toŭstyja dziadźki z racyjami, cudoŭna razumiejučy, što pieraškodzić biełarusu ŭžo nia mohuć, zrabili vyprabavany ŭ Nahana fint — admianili honku... «z-za drennych umovaŭ nadvorja». Jano to j praŭda, na stadyjon raptam sieŭ taki tuman, što choć na voŭka ŭźleź.
Voś tak biełaruskija medali ŭ estafecie 27 lutaha, jak kazaŭ viadomy hieroj subotniaj pieradačy spadara Kazijatki sami-znajecie-chto, «kanuli ŭ leta».
Bohuś Bijatlanionak