Siarhiej Bałachonaŭ. Daściobki

vojska

Daściobki

Realnaje vajskovaje byćcio hruntujecca na pryncypie: «Daściabacca možna j da słupa». Daściobki tamu majuć samy šyroki raspaŭsiud. Navabranyja vajaki nia majuć prava chavać ruki ŭ kišeni. Dla parušalnikaŭ praduhledžvajecca dziejsnaja sankcyja — zašyvańnie kišeniaŭ na peŭny termin (zvyčajna na 1—2 dni, bo potym siaržanty zabyvajucca). Hetaksama nie ŭchvalajecca, kali ŭ žaŭnieraŭ niezašpileny jaki-kolviek huzik. U takim razie jon adryvajecca ci adrazajecca lazom.

«Pa duchani» (u pieršyja miesiacy paśla pryzyvu) nielha hučna vyjaŭlać svajho žadańnia viarnucca dadomu. Inačaj moža być sarhanizavany admysłovy «šlach damoŭ» — «duch» (małady sałdat) uzdymajecca na rukach, trymajučysia za śpinki łožkaŭ, nad padłohaj i vykonvaje ruchi nahami (imitacyja darohi). Šlach moža duža zaciahnucca: sałdat «prychodzić damoŭ», a doma nikoha niama, dyk jon musić «iści» da mamy (taty, brata i h.d.) na rabotu pa klučy. Akrom taho, nia varta vykazvać svaju achvotu čaho-niebudź źjeści. U adkaz zvyčajna moža prahučać : «Što, nie padabajecca?» Kali na hety zapyt budzie adkazana stanoŭča, tady ładzicca «karmiožka». Zazvyčaj heta bochan čornaha chleba, jaki tre źjeści za vyznačany čas, paśla čaho vypić 1—1,5 ł syroje vady. Spažyvańnie chleba (ci bułki) moža adbyvacca ŭ pracesie adciskańnia ad padłohi. Nakormlenyja zvyčajna skardziacca sasłužyŭcam na chutkaje sparažnieńnie straŭnika praz vanitavańnie.

Daściobki stanoviać niedjemnuju častku acenki raznastajnych rabotaŭ u vojsku. Jak by ty ni čyściŭ boty, šaravaŭ «čki», myŭ padłohu, kamandzir abykłym paradkam moža adciemić maładastatkovaść vykananaj raboty. Pry hetym adbyvajecca apelacyja da niejkich mityčnych «armiejskich mierak». Pry šychtavańni, staviačy rotu na «zvažaj», siaržanty patrabujuć spynić usie varušeńni, što vykanać praktyčna niemahčyma. Akrom taho, jak by ty ni staŭ na «zvažaj», moža adbycca zahad padniać hałavu vyšej. «Vot tam, pacany, vaš dziembiel», — pakazvajučy na niabiosy albo stol, navučajuć maładych bajcoŭ siaržanty.

Ahułam armija jość leśvicaj daściobak, jakija pačynajucca adrazu, ad šarahoŭcaŭ. Šarahoŭcy daściobvajucca adzin da adnaho. Admietnaje prajavišča hetaha — dziedaŭščyna.

Siarhiej Bałachonaŭ