Naviny kultury
№ 9 (166), 28 lutaha — 6 sakavika 2000 h.
Naviny kultury
Čas biełych cieniaŭ
270 hadoŭ tamu naradziŭsia apošni kancler VKŁ Jaŭchim Litavor Chraptovič. Z hetaj nahody adčyniajecca vystava tvoraŭ akademikaŭ Biełaruskaj Akademii Vyjaŭlenčaha Mastactva pad nazvaj «Čas biełych cieniaŭ». Adkryćcio adbudziecca 2 sakavika a 17 hadzinie ŭ Muzei sučasnaha vyjaŭlenčaha mastactva (praspekt Skaryny, 47).
A.K.
Vystava «Pahoni»
U Respublikanskim ekalahičnym centry navučencaŭ (heta byłaja stancyja junataŭ na Makajonka, 8 — kala novaha BT, kala st.m. «Maskoŭskaja») adčyniłasia vystava supołki «Pahonia». Hetym razam vystava pryśviečanaja vynikam zimovaha pleneru imia Jazepa Drazdoviča, što prajšoŭ na Kalady pad Hłybokim i Šarkoŭščynaj. Jak i ŭ tvorčaści samoha Drazdoviča, pieravažajuć fantastyčnyja krajavidy Biełarusi. Siarod udzielnikaŭ — mastaki ź Mienščyny, Viciebščyny, Paleśsia i Halandyi. Adkrytaja vystava budzie na hetym tydni, a tady na źmienu joj pryjdzie vystava kieramiki vučniaŭ Alesia Maračkina.
Miž inšym, tradycyjnuju vystavu «Pahoni» ŭ Pałacy mastactvaŭ na 25 Sakavika sioleta ŭ Miensku nie dazvolili.
Kupałaŭskaja
U Litaraturnym muzei Janki Kupały (heta ŭ parku Janki Kupały) prachodzić fotavystava «Paezija kupałaŭskich miaścinaŭ». Aŭtar prajektu — staršynia fotaklubu «Miensk» Albert Ciechanovič, jaki try hady tamu naładziŭ Mižnarodny Kupałaŭski fotaplener. Siužety tvoraŭ — pavodka ŭ Viazyncy, bujańnie paparać-kvietki ŭ Laŭkach, a taksama malaŭničyja vidy Karłavych Varaŭ i Prahi, jakuju Kupała naviedvaŭ trojčy. Sa słovaŭ Ciechanoviča, duch pieśniara žyvie nia tolki ŭ knihach, ale i ŭ tych murach i drevach, jakija natchniali jaho.
Juraś Barysievič
U biełaruskim videaklubie
Biełaruski videaklub pry TBM pašyraje dziejnaść. Ciapier jahonaje adździaleńnie adkryłasia ŭ moładzievym centry «Majsternia Budučyni», što ŭ Malinaŭcy na vulicy Słabadzkoj, 15. Pakazy biełaruskamoŭnych videastužak u hetym centry buduć adbyvacca štoniadzielu a 12-j. Aproč taho, u TBM adkryŭsia videaprakat. Kožny moža pryjści i ŭziać patrebnuju jamu kasetu ŭ luby dzień. Videateka naličvaje ciapier 14 najmieńniaŭ, siarod ich mastackija, multyplikacyjnyja, muzyčnyja videaprahramy. Prakat (i kniharnia) pracujuć štodnia z 11-j da 19-j (bieź pierapynkaŭ), taksama i ŭ niadzielu. Adras u Miensku: Rumiancava, 13. Teł.: 213-43-52. Źjavilisia j novyja handlovyja kropki prodažu kasetaŭ: universam «Biełaruś» (2-hi pavierch) — videa, šapik kala kramy «Pijaner» (Čyžoŭka) — videa-, aŭdyjokasety.
V.S.
CD Śviciazianka
Studyja «Kaŭčeh» vypuściła kampakt-dysk «Vakalna-symfaničnaja paema «Śviciazianka» pavodle matyvaŭ adnajmiennaj paemy Adama Mickieviča. U zapisie dysku ŭziali ŭdzieł Symfaničny arkiestar biełaruskaha radyjo i chor pad kiraŭnictvam Viktara Roŭdy. Aŭtar muzyki — kampazytar i mastak, siabra supołki «Pahonia» Ŭsievaład Hryckievič. U Nacyjanalnaj biblijatecy tolki što prajšła jahonaja vystava «Muzyka ŭ kolery». Hryckievič sam aformiŭ svoj kampakt-dysk — skarystaŭ svaju hrafičnuju pracu «Vosieńkaja melodyja».
Žydoŭskaja partyzanka
U mienskim vydaviectvie «Medysont» vyjšła ŭ pierakładzie na biełaruskuju kniha «Jak my pieražyli Hałakost ź jaŭrejskim partyzanskim atradam u Biełarusi». Aŭtary memuaraŭ — Doŭ Kohan, adzin z kiraŭnikoŭ kamitetu byłych navahradcaŭ u Izraili, i anhielec Džek Kahan, jaki stvaryŭ u Imperatarskim Vajennym muzei ŭ Londanie stałuju ekspazycyju pra vyniščeńnie hitleraŭcami hebrajaŭ Navahradku. Padobnaja ekspazycyja ciapier majecca i ŭ krajaznaŭčym muzei samoha Navahradku. Pavodle aŭtaraŭ knihi, hałakostu paspryjała toje, što savieckija ŭłady zabaranili hebrajam u pačatku vajny evakujavacca na ŭschod (praz byłuju saviecka-polskuju miažu prapuskali tolki tych hebrajaŭ, što mieli partbilet). Navahradzkija hebrai stvaryli całkam unikalnuju źjavu — bujny partyzanski atrad, jaki naličvaŭ ažno 1200 vajaroŭ. Atrad bratoŭ Bielskich vyzvalaŭ viaźniaŭ hieta, ładziŭ dyversii na čyhuncy, biŭsia z žaŭnierami Armii Krajovaj. Paśla vajny acalełyja raźjechalisia pa ŭsim śviecie. Ničoha nie zastałosia i ad navahradzkich hebrajskich mohiłak z 500-hadovaj historyjaj, pišuć aŭtary: z tych nadmahilnych plitaŭ pabudavali haražy.
Juraś Barysievič
2 hady «Navinkam»
Hałoŭny redaktar adnaho z najbujniejšych biełaruskich vydańniaŭ upikaŭ «Navinki» za toje, što «heta analah rasiejskich «Lalek», tolki z toj roźnicaj, što «Lalki» śmiajucca z usich palitykaŭ, a «Navinki» śmiajucca tolki sa svaich — apazycyi». Krasamoŭnym adkazam na hety paprok staŭ vypadak na śviatkavańni dvuchhodździa «Navinak», jakoje adbyłosia 24 lutaha ŭ klubie «4 apelsyny». Viadučy paprasiŭ publiku skazać kolki dobrych słovaŭ pra vydańnie, pra toje, jak jana jaho lubić. Ale adnomu ŭdzielniku mikrafonu nie dali. Bo toj usio staraŭsia damahčysia adkazu na pytańnie: čamu vy krytykujecie tolki apazycyju, ale nie aficyjnyja ŭłady? Viadučy nia daŭ mikrafonu na takija byccam biaskryŭdnyja słovy tolki z toj pryčyny, što «aficyjnyja» ŭłady — heta prosta nia śmiešna j nie cikava, kab navat pra heta zhadvać. Nia chočuć, bačycie, śmiašlivyja «Navinki» «śmiejučysia raźvitvacca» ź ciapierašnim režymam.
Aleś Turovič