Z usioj krainy

---

Z usioj krainy

 

Našeście pacukoŭ

Sapraŭdnaje pacučynaje našeście pahražaje Baranavičam. Hetyja stvareńni ŭsio čaściej załaziać u kvatery žycharoŭ. Zamiest patrebnych 36 śmiećcievozaŭ u Baranavičach majucca tolki 18, a pracujuć štodnia tolki 2—3. Śmiećcie i brud pa pary dzion hnije ŭ kantejnerach kala damoŭ, adsiul i pacuki.

Rusłan Raviaka, Baranavičy

 

Kisiala aryštavali

U noč na 6 lipienia ŭ mienskim tralejbusnym depo № 5 zatrymali aktyvista Maładoha frontu z Horadni Valerku Kisiala. Razam ź niekalkimi maładymi ludźmi, jakim udałosia źbiehčy, jon z dapamohaj trafaretu nanosiŭ na tralejbusy nadpisy «Žyvie volnaja Biełaruś!» Chłopca źvinavacili ŭ drobnym chulihanstvie i pakarali štrafam u pamiery 2 tys. rubloŭ. Chłopiec pryjechaŭ u Miensk u škołku i zachacieŭ pakazać mienčukam, jak Horadnia ŭmieje zmahacca.

Pavodle infarmacyi BARC

 

U Navapołacku skrali makaronu

U Navapołacki haradździeł milicyi źviarnuŭsia staršynia kaściolnaj parafijalnaj rady: z draŭlanaj prybudovy ŭ jaho ŭkrali skryni z humanitarnaj dapamohaj — vitaminami i praduktami charčavańnia. Niechta prosta adździor doški ad ściany i zalez u siaredzinu.

Andrej Alaksandraŭ, Navapołacak

 

Biez zarobku pracavać nia chočuć

Rabočyja zavoda «Mahiloŭtransmaš» praviali stychijny strajk. Heta byŭ zarobkavy strajk. A lepiej skazać, biezzarobkavy. Amal paŭdnia ludzi na zavodzie nie pačynali pracy. Kali niezadavoleny i šmathałosny natoŭp dasiahnuŭ amal tysiačy čałaviek, schod pieratvaryŭsia ŭ mitynh, dzie ludzi patrabavali adnaho – zarpłaty. Da pracoŭnych pavychodzili ŭsie namieśniki dyrektara, kab zaklikać «spakojna pracavać, a dyrekcyja ŭsio vyrašyć». Dy tolki ludzi razychadzicca nie zhadžalisia. U kancy dnia, spužanaje kiraŭnictva ŭsio ž zdoleła znajści hrošy, kab raspłacicca.

Symon Hłazštejn

 

Nie zmahajsia sa Svabodnymi prafsajuzami

U Mahilovie sudziać kolišniaha dyrektara, jakoha źniaŭ z pracy… Svabodny prafsajuz. Centralny rajonny sud Mahilova raspačaŭ praces suprać byłoha dyrektra zavoda «Zenit» Vasila Asipienki. Jaho abvinavačvajuć u kradziažach i złoŭžyvańni słužbovym stanoviščam. Ale prasłaviŭsia toj dyrektar svaim upartym supraćstajańniem z Svabodnymi prafsajuzami. Pracoŭnaja salidarnaść i mužnaść zrabili spravu.

Symon Hłazštejn

 

U Cimkavičach Lenina pamyli

Biesprecedentnaja historyja adbyłasia ŭ miastečku Cimkavičy, što na Kapylščynie. Tam ludziam nie addavali zarobku, pačynajučy z sakavika. Dyk niechta prydumaŭ u pratest skraści biust Lenina, a potym skinuć u kanavu. Reč u tym, što ŭsio heta adbyvałasia pierad 24 červienia, kali musili śviatkavać dzień naradžańnia Kuźmy Čornaha. U miastečka byli zaprošanyja hości ź Miensku, a tut skandał — pomnik skrali! Ale skončyłasia ŭsio nia tak žudasna: Lenina znajšli, ustalavali na staroje miesca, pafarbavali, zarobak addali za sakavik-krasavik, dobra adśviatkavali dzień naradžeńnia Kuźmy Čornaha. Čałavieka, jak skraŭ pomnik, nie znajšli. A žychary Cimkavičaŭ užo viedajuć — kab atrymać hrošy, treba pamyć Lenina ŭ kanavie.

Siaržuk Nasievič

 

Vyłučeńnie delehataŭ

Źmitru Sałaŭjovu, namieśniku staršyni Navapołackaj haradzkoj Rady BNF, zabaranili pravieści schod-mitynh dziela vyłučeńni kandydataŭ na Ŭsiebiełaruski źjezd. A voś Kalvaryjskaja Rada Maładoha Frontu vyłučyła ŭ jakaści delehata salista rok-hurta «Mroja» Lavona Volskaha. Lavon Volski paabiacaŭ vystupić ad imia maładoj Biełarusi pry pryniaćci Aktu Niezaležnaści, a amatary N.R.M. atrymali aŭtohrafy na kasetach, fotakartkach i majkach.

B.T.

 

Niaščasnaje lisiania

Padletki ŭ vioscy Rahačy, što pad Lachavičami, znajšli kala chaty lisiania. Naviazali i pajšli ź im hulać. Toje pakusała i padrapała svaich kataŭ. Kali baćki pryjšli z pracy, dyk zabili lisiania i złupili ź jaho skuru. Staršynia kałhasu, daviedaŭšysia pra heta, zahadaŭ vykapać tušku i adpraviŭ na analiz u Bieraście. Tamaka zaśviedčyli, što lisiania było chvoraje na šalenstva. Ciapier usim, chto kantaktavaŭ ź im, robiać pryščepki.

Rusłan Raviaka, Baranavičy

 

Hišpancy dobryja

Užo amal tydzień stajać u Mahilovie niekalki aŭtobusaŭ z Hišpanii. Jany b musili zabrać miascovych dziaciej, kab adpravicca ź imi za Pirenei. Ale nia mohuć hetaha zrabić, bo hišpanskaja ambasada nie daje vizy. Dyplamaty tłumačać admovu tym, što azdaraŭlalnaja pajezdka nie źjaŭlajecca dabračynnaj, a vizy nia mohuć być u takim vypadku biaspłatnymi. Ciapier hetymi pytańniami zanialisia ŭžo i ŭ samoj Hišpanii, bo hutarka idzie pra dziasiatki biełaruskich dzietak. Ich tam čakajuć taksama dziasiatki siemjaŭ, dzie junyja biełarusy i adpačnuć. Ź biełaruskaha boku azdaraŭleńnie dziaciej u Hišpanii ładzić dziaržava. I kožny raz kampaniju supravadžajuć skandały i niečakanyja niespadziavanki: to dziaržava niesvoječasova apłočvaje vylet dziaciej z zamiežža, to prymušaje baćkoŭ unosić svaje srodki. Kažuć, u hety raz, «adno miesca» kaštavała kala 200 dalaraŭ. Dobra jašče, što hišpanski bok dobry i nie razarvaŭ adnosinaŭ z nami.

Symon Hłazštejn

 

Pad dyktoŭku beenefaŭcaŭ

Miesiac tamu Baranavickaja Rada BNF źviarnułasia da vykankamu z patrabavańniem zaasfaltavać pierachod na vulicy Telmana, adnoj z centralnych, što la Paleskaha vakzału. I voś na vulicy źjavilisia hrejdery.

Rusłan Raviaka, Baranavičy