Vasil Krokva. 7 lipienia ŭ Połacku šukali łuhavyja kvietki

7 lipienia ŭ Połacku šukali łuhavyja kvietki

Takoha adkryćcia mastackaj vystavy Połacki muzej biełaruskaha knihadrukavańnia jašče nia bačyŭ. Miascovaja habelenščyca Taciana Kozik, pryznačyŭšy prezentacyju svajho ŭłasnaha vernisažu na 7 lipienia, ryzykavała. U hety dzień u susiednim Viciebsku «Słavianski bazar» dasiahnuŭ svajho apahieju. Pałačanie mahli praihnaravać «Ptušyny raj» (tak nazyvajecca vystava habelenu mastački) i vybrać «bazar».

Pesymistyčnyja prahnozy nia spraŭdzilisia. Ludziej na adkryćcio vystavy pryjšło šmat. Pryčym nia tolki mastaki j siabry habelenščycy, ale j miascovyja biznesoŭcy j navat pradstaŭniki kiraŭnictva horadu, jakija nia vielmi časta naviedvajuć padobnyja zborki. A niezvyčajnaść adkryćcia była ŭ tym, što arhanizatary padrychtavali sapraŭdnaje šoŭ, u jakim «ćvikom» staŭsia vystup połackaha madelnaha ahienctva «Safija». Niahledziačy na toje, što «Safija» siarod inšych aŭtarytetnych biełaruskich ahienctvaŭ była zadziejničanaja ŭ «Słavianskim bazary», piać jaje lepšych madelek (adna ź ich tolki što viarnułasia z Emirataŭ) zastalisia ŭ Połacku dziela «Ptušynaha raju». U prezentacyi taksama ŭziali ŭdzieł try madeljery z svaimi kalekcyjami – Iryna Bruśnikina (Navapołacak), Iryna Pracharenka i Iałanta Šviedava (abiedźvie ź Viciebsku). Bruśnikina admysłova da hetaj akcyi padrychtavała novuju kalekcyju «Kryły koleru lnu». Ekskluzyŭnyja sukienki jana vyrabiła j dla mastački, i dla mastactvaznaŭcy Haliny Rabiankovaj, jakaja viała prezentacyju. Pracharenka j Šviedava pakazali taksama svaje najnoŭšyja kalekcyi, ź imi jany sioleta stalisia finalistkami maskoŭskaha konkursu «Novy vobraz XXI st.».

Padčas prezentacyi hučali j vieršy, ich deklamavali połackija paety Lera Som, Iryna Darafiajčuk i Aleś Arkuš. Paeziju na vystavie možna čytać i na ścienach pobač z habelenami, mastačka vykarystała teksty vieršaŭ u pabudovie ekspazycyi. Siarod lubimych paetaŭ jana nazyvaje biełastockuju paetku Nadzieju Artymovič. Surjozna padrychtavałasia da svajho vernisažu j sama Taciana. Čatyry vialikija habeleny vystaŭlalisia ŭpieršyniu. Nie abminuli hetuju padzieju j miascovyja ŚMI — prezentacyju zdymali adrazu dźvie połackija j adna navapołackaja telestudyi. Viedajučy toje, što mastačka lubić łuhavyja kvietki, sam dyrektar Połackaha historyka-kulturnaha zapaviednika Mikałaj Ilnicki źbiraŭ kraski ŭ vakolicach Połacku. A navapołacki mastak Ihar Kuržałaŭ pryjšoŭ na adkryćcio z cełym snapom ramonkaŭ, ci to 188, ci to 189 kvietak – napaminak pra kupalskaje raŭnadzienstva.

Vasil Krokva