Ab usim patrochu
№ 27 (236), 4 lipienia 2001 h.
Ab usim patrochu
Razanaŭ spatkaŭsia z Hrasam
Paet Aleś Razanaŭ, što ciapier žyvie ŭ Hanovery, sustreŭsia tam z Nobeleŭskim laŭreatam, piśmieńnikam Hiunteram Hrasam.
— Ja saču za tym, što adbyvajecca ŭ Biełarusi, — skazaŭ u razmovie z Alesiem Razanavym Hiunter Hras. — I viedaju, što stanovišča ŭ vašaj krainie ciažkoje. Ščyra zyču, kab jano jak maha chutčej źmianiłasia na lepšaje.
Oskar Ansuł
Apošni palot
Ranicaj u paniadziełak pad adnym z šmatpaviarchovikaŭ baranavickaha vajskovaha haradka byŭ znojdzieny nieviadomy, jaki zvaliŭsia z dachu j zabiŭsia. Jak vyśvietlili milicyjanty, mužčyna sprabavaŭ nočču ŭleźci ŭ kvateru, što znachodziłasia na 9-m paviersie. Strapa, pryviazanaja da anteny na dachu, abarvałasia. Tut złodziej i palacieŭ u apošni palot.
Rusłan Raviaka, Baranavičy
90 nachlebnikaŭ
Bolš za 90 žycharoŭ Klimavičaŭ nia płaciać za kvateru. Jany zavinavacilisia miascovym kamunalnikam amal 5 młn. rubloŭ. Šmatrazovyja prośby likvidavać zapazyčanaść nie dali vynikaŭ, i kiraŭnictva Klimavickaha ŽEK dasłała śpisy niapłatnikaŭ u miascovuju hazetu z nadziejaj, što hańba dapamoža vykałacić ź ich hrošy.
Andrej Kuźmin, Kryčaŭ
Baran rajonnaha značeńnia
U Tałačynskim rajonie dla praviadzieńnia analizu na prancy vykarystoŭvajecca kroŭ barana-donara. Raniej baraniuju kroŭ dla praviadzieńnia reakcyi Vasermana dastaŭlali poštaju ź Miensku, i reaktyvy časta psavalisia ŭ darozie. Ciapier u barana Barysa, jaki žyvie pry lakarni, dvojčy na miesiac biaruć pa 100 mł kryvi. Na korm donaru medyki zarablajuć u bližejšych haspadarkach. Uletku čakajecca pavieličeńnie nahruzki na donara, bo sezonna pavialičvajecca patreba praviadzieńnia adpaviednych analizaŭ.
Pavodle Radyjo Racyja
Mašeka ź piasku
6-ha ŭ Mahilovie, na plažy Śviatoha voziera, Hienik Łojka z svaimi studentami prezentuje čarhovuju “Lehiendu ź piasku”. Hetym razam vynikam pleneru piaščanaj skulptury staniecca Mahiła Lva. Budzie hučać histaryčnaja muzyka, adbuducca rycarskija spabornictvy.
U “Albie”
Z 4-ha j ceły miesiac usim, chto maje volny čas, varta być u Niaśvižy, dzie tałakoju buduć davodzić da ładu słavuty park “Alba”. Jahonyja alei, unikalnaja systema štučnych azioraŭ i kanałaŭ, na jakich za radziviłaŭskim časam razyhryvalisia cełyja “marskija batalii”, zachavalisia dahetul. Ale śmiećcia naźbirałasia, dyj pazarastała ŭsio hetak, što patrabuje ŭmiašańnia. Nie zhubicie šaniec ułasnymi rukami adnavić histaryčnuju spadčynu! Valanciorski lahier “Alba-park” čarhovy raz arhanizuje niaśviskaje adździaleńnie BSM — nia błytać z BPSM.
Na Schod!
5—6 ha ŭ Mienskim Domie litaratara projdzie III Źjezd biełarusaŭ śvietu. Pryjeduć pradstaŭniki 85 biełaruskich arhanizacyjaŭ z 28 krainaŭ.
Zbor podpisaŭ
I, viadoma ž, varta schadzić tudy, dzie źbirajuć podpisy za kandydataŭ u prezydenty. U tych, chto pastavić svoj podpis na nastupnym tydni, jość šaniec stacca hanarovym 100 000-m padpisantam.
Dzianis Nosaŭ
Partuhalija biaz nas
Biełaruskaja federacyja futbołu paśla sensacyjnaha zaprašeńnia ad partuhalskaj nacyjanalnaj zbornaj zhulać tavaryskuju hulniu nia mienš sensacyjna admoviłasia. Futbolnyja kiraŭniki durać nam hałavu roznymi adhavorkami, a nasamreč u ich prosta niama 30 tysiačaŭ dalaraŭ na pajezdku. A mo zaŭziataram skłaścisia? Da žniŭnia naźbirajem...
Mienskaje “Dynama” ŭ pieršym matčy 2-ha raŭndu eŭrapiejskaha Kubku UEFA-Intertota na rodnaj traŭcy pieramahło izrailski “Chapael” 2:0. Mienčuki zorak ź nieba nie chapali, adnak jašče horš vyhladali hości, jakija pryvieźli ŭ Miensk rezervovy skład. Kali praz tydzień u Chajfie biełarusy daduć “Chapaelu” rady, to ŭ trecim kruzie eŭraspabornictvaŭ nas čakaje niamiecki “Volfsburh”. Trymajciesia, Viki, to bok, sorry, Hansy!
Na Ŭimbledonskim turniry biełaruskim asam paabłomvali rohi ŭžo ŭ pieršych kruhach indyvidualnaha razradu. Jość jašče spadzieŭ na duet Mirny-Vaŭčkoŭ, jaki nadoječy pieramoh rasiejska-švajcarski kanhlamerat Safin-Rase.
A našyja vieślary na Kubku śvietu ŭ Vienie ŭdvaccacioch “nahrebli” 6 pryzavych miescaŭ: 2 załatyja, 1 srebnaje dy try bronzavyja. I pahrebli dachaty.
Bohuś Bijatlanionak
Listy ŭ redakcyju
Mahistar žyvie ŭ Hłybokim
Valery Tarykaŭ — lekar-psychafizyjolah, śviadomy biełarus.
Niadaŭna “Mižnarodnaja asacyjacyja narodnych lekaraŭ”, “Mižnarodny bijaenerhietyčny centar nietradycyjnych metadaŭ lačeńnia i dyjahnostyki “Łotas-Technakor-Žan” i “Biełaruskaja asacyjacyja spryjańnia raźvićciu nietradycyjnych metadaŭ lekavańnia j dyjahnostyki” prysvoili jamu najvyšejšuju mižnarodnuju katehoryju i vydali dyplom Mahistra Ŭschodniaj Medycyny.
Jak śćviardžaje Valery Tarykaŭ, jahony rod, u 49 kalenie, pačynajecca ź ich prapra...babki Ramajasi, jakaja žyła ŭ Paŭnočnaj Indyi. Staražytnyja viedy induskaj žrycy jon i vykarystoŭvaje. A proźvišča pachodzić z arabskaj movy: “el taryk” — pisar. Napeŭna, adsiul i schilnaść rodu Tarykavych da krajaznaŭstva, paezii, medycyny i spaznańnia Suśvietu.
Jak ličyć Valery Tarykaŭ, jamu ŭdałosia pračytać Fescki dysk, jaki italijskija archieolahi znajšli ŭ 1908 h. na Krycie. Na Suśvietnym kanhresie dziejačoŭ kultury “Vyniki tysiačahodździa”, jaki adbyŭsia 21—23 listapada 2000 h. u Sankt-Pieciarburhu, dakład Valerja Tarykava, pryśviečany rasšyfroŭcy Fesckaha dysku, mieŭ pośpiech.
Jak śćviardžaje Valery, dysk utrymlivaje tajamnicu śvietastvareńnia j prahramu evalucyjna-bijalahičnaha raźvićcia čałaviectva na nastupnyja 1000 hadoŭ, infarmacyju pra raźvićcio navuk, novyja ŭjaŭleńni ab vidach času, novy vid bijalahičnaj enerhii. Praca nad tekstami Fesckaha dysku budzie praciahvacca i nadalej.
U śniežni 2001 h. Valery Tarykaŭ maje zaprašeńnie ŭ Francyju na mižnarodnuju kanferencyju, pryśviečanuju 500-m uhodkam ad naradžeńnia Mišela Nastardamusa. Da 1 listapada treba dasłać dakład. Tolki voś ci znojdzie jon fundatara na hetuju pajezdku?
Voś takim kłopatam žyvuć ludzi ŭ Hłybokim.
Uładzimier Skrabatun, Hłybokaje
Metałałom zamiest kambajnaŭ
Niadaŭna, pierajaždžajučy polska-biełaruskuju miažu, zaŭvažyŭ prystojnaha vyhladu “Mersedes” z pryčepam, zavalenym starymi sialanskimi prystasavańniami: mechaničnymi kosami, baronami...
Haspadar raspavioŭ, što vyvozić z susiedniaj krainy toje, ad čaho polskija fermery pazbaŭlajucca, bo ŭžo majuć traktary dy kambajny. A nam, biełarusam, hetyja prystasavańni jakraz darečy, bo jany raźličanyja na pracu z końmi. “Dyk maje staryja z takimi mašynami na vioscy ciapier karalami chadzić buduć!” — hanaryŭsia ŭładalnik “Mersedesu”.
A ja raptam uspomniŭ svajho dzieda Alaksieja, jaki za polskim časam mieŭ vialikuju haspadarku z sučasnaj technikaj. Navat paśla raskułačvańnia i piatnaccaci hadoŭ lahieru ŭ kałhas jon nie pajšoŭ, a na svaim kavałku ziamli namahaŭsia mieć usio samaje sučasnaje.
Pamiataju, jak na pačatku 90-ch, niezadoŭha da śmierci, jon spytaŭ mianie, ci praŭda, što ciapier u Miensku robiać novyja mašyny — “matabloki” — na jakich možna i jeździć, i siena vazić, i baranu da ich pryčapić. “Treba, unučku, kab i ŭ nas takaja była — treba sačyć za novym, kab być napieradzie”, — skazaŭ moj dzievianostahadovy dziadula. Tady ja byŭ ščyra ździŭleny. A ciapier razumieju, što moj dzied-“kułak” metałałom z Polščy naŭrad ci vyvoziŭ by.
Alaksiej Dzikavicki, Pinsk
Viły
Vidać pa ŭsim, spadaryni Skarynkinaj, čyj artykuł “Krajoŭcy iduć” byŭ nadrukavany ŭ “NN” ad 25 červienia, brakuje viedaŭ pa historyi.
Inakš by jana viedała, što “viły, utorknutyja ŭ ziamlu” — vialikalitoŭski hierb “Kalumny”, vyjava jakoha mieściłasia na charuhvach našych dziadoŭ pad Hrunvaldam.
Voś i atrymlivajecca, što dla kahości “Kalumny” — śviaty symbal vieličy j honaru, a dla kahości — prosta “viły”.
Pavał Batujeŭ, Salihorsk
Pamyłkovyja mapy
Apynuŭsia ŭ vielmi niepryjemnym stanoviščy i chaču zaścierahčy čytačoŭ “Našaj Nivy”.
Skarystaŭsia atlasam aŭtadaroh (Mienskaja vobł., 2001 h., vydaviectva “Trivium”). U atlasie stancyja Pcič paznačanaja na levym bierazie adnajmiennaj rečki, a na samoj spravie jana znachodzicca na pravym bierazie. Pamyłka pryblizna na 1 sm (zhodna z maštabam karty heta 2 km). Miesca adpačynku karystajecca papularnaściu, i ludzi mohuć mieć niazručnaści. Na majo zapytańnie vydaviectva “Trivium” ničoha nie adkazała.
A.K., Miensk
Mazaičny Viciebsk
Haściej hatelu “Viciebsk” sustrakaje pieralik “hanarovych naviednikaŭ”. U pieršym šerahu Mašeraŭ, Łukašenka, Fiłaret dy Puhačova, trochi nižej — Dziemianciej, Harbačoŭ, Aleksij Druhi, Kirkoraŭ i hetak dalej (dakładniej, nižej) až da Radamiły Karakłaič…
Na vulicy svajho imia, fanaberysta zadraŭšy hałavu, hladzić paŭź minakoŭ adnoŭleny hieneralisimus-varjat. Bronzavy Karatkievič, naciahnuŭšy na vušy baret, zvykła śćviardžaje: “Byŭ. Jość. Budu”. Ale vyhladaje, što j sam jon nie daje viery hetym słovam. Samy viadomy ŭ Biełarusi paet — Alaksandar Siarhiejevič — zadumliva razhladaje most praź Dźvinu dy patylicu Piatra Mironaviča. Jamu bajacca pakul što niama čaho — vulic, praspektaŭ, zavułkaŭ, biblijatek, kałhasaŭ, navučalnych ustanoŭ i h.d. imia Puškina ŭ nas našmat bolej, čym imia viaskovaha nastaŭnika ź Viciebščyny…
Vializnyja litary na ścianie płavalnaha basejnu śćviardžajuć, što “pabudavan” jon da 50-hodździa kampartyi na srodki, sabranyja rabočymi “Akciabrskaha” rajonu…
U pałacy byłoha hubernatara mieścicca abłasny KDB, a hubernatar ciapierašni siadzić u byłoj žanočaj vučelni. Viežu pobač z abłvykankamam, zbudavanuju na miescy carkvy, miascovyja žartaŭniki achryścili “Člen abłvykankamu”…
La Smalenskaha bazaru viciebskija malcy žłukciać z ryła “Słavianskij biełyj” — napoj koštam 750 rubloŭ z vyjavaj sałamianaha biełaha kania. Siadaj nie chaču…
Dziakujučy “Słaviankamu bazaru” centar horadu maje bolš-mienš prystojny vyhlad. Ale hrošaj na farbu kamunalščykam, vidać, nie staje, bo nadpisy, jakija ŭ stalicy zamazvajucca adrazu ž, tut vabiać voka praciahły čas. Hrafici zbolšaha zvyčajnyja — “ZUBR”, “Žyvie Biełaruś!”, niešta pra niejkaha Łuku, ale sustrakajecca “BNR” i navat “Rasieju ŭ žopu!”. Taki radykalizm i ŭ stalicy redka sustrenieš…
La centralnaha hastranomu ŭ “sinim domie” čas ad času staić prychilnik KCHP-BNF dy prapanuje ŭsim achvotnym “Biełaruskija viedamaści” za studzień. Achvotnych niašmat…
Viačka Vasilonak, Miensk-Viciebsk