Biełarus u Mechika
№ 27 (236), 4 lipienia 2001 h.
Biełarus u Mechika
Kancerty Vitala Stachijeviča
ŭ Palacio de Bellas Artes
U červieni ŭ Mechika vystupaŭ biełaruski pijanist Vital Stachijevič. Abodva jahonyja kancerty adbyvalisia ŭ Palacio de Bellas Artes (Pałac Pryhožych Mastactvaŭ) — hałoŭnaj kancertovaj zali meksykanskaje stalicy.
Na hetaj scenie, azdoblenaj šklanym zanaviesam raboty Ljuisa Tyfani, adbyvajucca baletnyja j opernyja spektakli dy prezentujucca najlepšyja hastralory. Vital Stachijevič vykonvaŭ Druhi fartepijanny kancert Rachmaninava ŭ supravadžeńni Nacyjanalnaha symfaničnaha arkiestru Meksyki pad kiraŭnictvam hałoŭnaha dyryžora Enrykie Artura Dymekje. Kancert 8 červienia tranślavaŭsia ŭ žyvym etery pa meksykanskim nacyjanalnym radyjo j telebačańni, a taksama na specyjalnym sajcie ŭ Internecie.
Biełaruskija muzyki asvojvajuć staražytnuju krainu actekaŭ. Pieršym byŭ Ihar Markievič — francuski dyryžor ź biełaruska-ŭkrainskimi karaniami. U 1957—58 h. jon vykładaŭ u Meksykanskaj nacyjanalnaj kanservatoryi. Biełaruski kampazytar Piotra Alchimovič trapiŭ u Meksyku pry kancy 80-ch. Kažuć, ciapier u jaho tam svaja restaracyja z šykoŭnym rybnym meniu. Krychu paźniej u meksykanskaj stalicy apynułasia biełaruskaja skrypačka Ryma Maciuchova. Jana pracuje ŭ tym samym arkiestry, ź jakim vystupaŭ Stachijevič. Meksykancy lubiać muzyku i nie škadujuć hrošaj na kulturnickija mety. Tamu Meksyka — perspektyŭny rynak dla biełaruskich muzykaŭ.
Atrymać zaprašeńnie ŭ Meksyku ciažka. Stachijeviču pašancavała. 19-hadovy pijanist — vučań dvanaccataj klasy himnazii-koledžu pry Biełaruskaj akademii muzyki — udzielničaŭ u prestyžnym mižnarodnym konkursie imia Dyna Čjani, što adbyvaŭsia ŭ 1999 h. u Milanie. Nijakich premijaŭ Stachijevič nie zdabyŭ. Adnak jaho zaŭvažyŭ pradjuser hukazapisu Nikas Velisyjocis, jakoha pryvabiŭ vytančany intelektualizm biełaruskaha muzyki. Pradjuser prapanavaŭ Stachijeviču zapisać u Milanie paŭnavartasny kampakt-dysk z tvorami Šuberta. Hetaja ideja i ažyćciaviłasia sioleta.
Italjanskaja krytyka vysoka acaniła pieršy dysk maładoha muzyki. “Toje, što 20-hadovy pijanist vykonvaje na svaim debiutnym dysku Šuberta, a nie Transcendentnyja eciudy Lista albo Varyjacyi na temu Pahanini Bramsa — dobry znak. Heta śviedčyć nia tolki pra vydatnuju techniku vykanańnia, ale j pra muzyčny hust i intelekt”, — piša krytyk Fernanda Ferary ŭ časopisie “Musica”. Jon asabliva padkreślivaje ŭłaścivuju Stachijeviču prostaść, kampaktnaść i ŭvažlivaść da kožnaha huku.
Stachijevič admietny tym, što hraje pa-biełarusku. Heta zbližaje jaho z Ałoŭnikavym dy Panačeŭnym. Biełaruski styl ihry kultyvuje j prafesarka Zoja Kačarskaja, u jakoj Stachijevič vučycca ź siomaje klasy.
U časie svajho apošniaha pobytu ŭ Milanie biełaruski muzyka paznajomiŭsia z Enrykie Artura Dymekje. Meksykanski dyryžor zavitaŭ u Eŭropu na niekalki kancertaŭ (u jaho bieźlič kantraktaŭ u roznych častkach śvietu) i vypadkova padsłuchaŭ, jak Stachijevič pracuje nad svaim kampakt-dyskam. Litaralna ŭ toj samy dzień biełaruski pijanist atrymaŭ zaprašeńnie na dva kancerty ŭ Meksyku.
Zdavałasia b, persanažy meksykanskich seryjałaŭ zachaplajucca zusim inšaj muzykaj i inšymi pijanistami… Adnak rečaisnaść zaŭždy pryhažejšaja za svoj televobraz.
Ju.A.