Nacyjanalnaja kampanija za admienu artykułaŭ 367, 368, 369 KK

inicyjatyva BAŽ

Nacyjanalnaja kampanija za admienu artykułaŭ
367, 368, 369 KK

Biełaruskaja asacyjacyja žurnalistaŭ 20 žniŭnia vystupiła ź inicyjatyvaj pačatku zboru podpisaŭ za admienu artykułaŭ Kryminalnaha kodeksu, pa jakich byli asužanyja žurnalisty Markievič i Mažejka i moža być asudžany Viktar Ivaškievič.

15 žniŭnia 2002 h. sudovaja kalehija pa kryminalnych spravach Haradzienskaha abłasnoha sudu pakinuła ŭ sile vyrak žurnalistam haradzienskaj hazety “Pahonia” Mikałaju Markieviču i Paŭłu Mažejku. Jany pryznanyja vinavatymi ŭ paklopie na prezydenta Respubliki Biełarusi A.Łukašenku. U suviazi z pryniaćciem Zakonu ab amnistyi im źnižany na adzin hod termin pryznačanaha pakarańnia.

Asudžeńnie M.Markieviča i P.Mažejki stała niebiaśpiečnym precedentam, jaki moža pryvieści da šyrokamaštabnaha praśledavańnia niezaležnych ŚMI i žurnalistaŭ. Na 11 vieraśnia 2002 h. pryznačana słuchańnie kryminalnaj spravy suprać hałoŭnaha redaktara niezaležnaj hazety “Rabočy” Viktara Ivaškieviča. Jon abvinavačvajecca ŭ zamachu na paklop i abrazu kiraŭnika dziaržavy. Nastupnym krokam uładaŭ moža stać kryminalny praces suprać viadomaha palityka Anatola Labiedźki, jaki taksama abvinavačvajecca ŭ paklopie na Alaksandra Łukašenku. Siońnia ŭ Respublicy Biełarusi skłałasia sytuacyja, kali lubyja krytyčnyja vystupy na adras vysokapastaŭlenych čynoŭnikaŭ mohuć być rascenienyja jak złačynstvy. Miž tym, infarmavanaść hramadzian pra dziejnaść uładnych struktur źjaŭlajecca nieabchodnaj umovaj demakratyčnaha raźvićcia hramadztva. Praź niezaležnyja ŚMI zabiaśpiečvajecca adkrytaść ułady, realizujecca dyjaloh, jaki pryvodzić da razumieńnia i zhody ŭ krainie.

Uličvajučy surjoznaje abvastreńnie adnosinaŭ ułady i presy, HA “Biełaruskaja asacyjacyja žurnalistaŭ” vystupaje ź inicyjatyvaj praviadzieńnia ahulnanacyjanalnaj kampanii za admienu artykułaŭ Kryminalnaha kodeksu “Paklop na prezydenta Respubliki Biełarusi” (art.367 KK), “Abraza prezydenta Respubliki Biełarusi” (art.368 KK), “Abraza pradstaŭnika ŭłady” (art.369 KK). Prymianieńnie hetych artykułaŭ viadzie da skaračeńnia krytyčnych vystupleńniaŭ u ŚMI, bieskantrolnaści dziaržaŭnych čynoŭnikaŭ, padmieny svabody słova svabodaj prapahandy.

Pryniata na praŭleńni HA “Biełaruskaja asacyjacyja žurnalistaŭ”