Uradžaj raście padčas jady

žnivo

Uradžaj raście padčas jady

15 žniŭnia vice-premjer Alaksandar Papkoŭ adrapartavaŭ pra zakančeńnie žniva. Na vioscy sabrali 6,085 młn. tonaŭ zbožža. 5,72 młn. t namałočana ŭ kałhasach i saŭhasach (na 99,3% płoščaŭ), 0,12 młn. t — u fermerskich haspadarkach. Jašče 0,4 młn. t daśpieła na pryvatnych sialanskich paletkach. Ale tam było abmałočana tolki 70% zbožža, bo na “ludzkoje” kambajny adpraŭlajuć u apošniuju čarhu.

Na selektarnaj naradzie 30 lipienia ministar sielskaj haspadarki i charčavańnia Michaił Rusy zaznačyŭ, što na palach vyśpieŭ uradžaj blizu 5,7—5,9 młn. tonaŭ. Heta aburyła A.Łukašenku, jaki zapatrabavaŭ ad uradu sabrać nia mienš za 6 młn. tonaŭ. Tamu ličba ŭ 6,085 młn. tonaŭ vyklikała peŭnyja padazreńni. Adnak vice-premjer Alaksandar Papkoŭ, jaki trymaŭ spravazdaču za žnivo, upeŭniena kaža, što prypiski niemahčymyja. Pavodle jahonych słovaŭ, sabrać hetki ŭradžaj dapamahła aperatyŭnaść: zžali ŭsio za 20—25 dzion, tamu j źbierahli toj miljon tonaŭ, jaki hublajecca štohod. Kab nie aŭralnyja tempy ŭborki, Biełaruś straciła b blizu 500 młn. dalaraŭ, bo zbožža daviałosia b kuplać za miažoj. Praŭda, 200—300 tysiač tonaŭ ćviordaje pšanicy ŭsio adno daviadziecca nabyć.

Siaredniaja ŭradžajnaść pa krainie skłała 26,7 centniery z hiektaru. Lideram pa zbory chleba stałasia Haradzienskaja vobłaść, dzie namałočana miljon 350 tys. tonaŭ zbožža z uradžajnaściu 36,9 c/ha. Bolš jak u 30 rajonach Biełarusi ŭradžajnaść dasiahnuła zvyš 30 c/ha. Dziaržavie pradadziena 850 tys. tonaŭ — bolš za 90% ad planu.

Letaś prykładna ŭ takich samych umovach było sabrana tolki 4,9 młn. tonaŭ, choć A.Łukašenka patrabavaŭ 7 miljonaŭ. “Sioleta nia staviłasia zadača sabrać zbožža luboj canoj — uličvałasia ekanamičnaja metazhodnaść”, — havoryć Alaksandar Papkoŭ. Dziaržava ŭkładała hrošy tudy, dzie možna było atrymać najlepšy vynik. Materyjalnyja resursy kancentravalisia ŭ 52 “vałaŭtvaralnych” rajonach, jakija dali kala 4 młn. tonaŭ zbožža.

Siarod pryčynaŭ “najvialikšaj pieramohi” nazyvajucca skaračeńnie kiroŭnych štataŭ na 56%, što dało ekanomiju ŭ 154 młrd. rubloŭ, tavarny kredyt haruča-zmazačnych materyjałaŭ, u tym liku ad kamercyjnych strukturaŭ, restrukturyzacyja zapazyčanaści na sumu 1,5 młrd. rubloŭ. Vice-premjer zajaviŭ, što siońnia isnuje “svabodnaje cenaŭtvareńnie na ŭsiu sielskahaspadarčuju pradukcyju, za vyklučeńniem zbožža, ilnu i cukrovych burakoŭ, jakija realizujucca pa fiksavanych cenach”. Viaskoŭcam, hałoŭnym hierojam bitvy za ŭradžaj, dziaržava vinnaja 34 młrd. rubloŭ, jakija budzie addavać “pa miery realizacyi tavarnaj pradukcyi”.

Urad užo raspačaŭ rychtavacca da nastupnaha sielskahaspadarčaha sezonu, jaki budzie bolš składanym, čym sioleta: Biełaruś, pa acenkach ahrarnych prarokaŭ, čakaje suchata. Da jaje rychtujucca ŭžo ciapier, pašyrajučy płoščy azimych kulturaŭ na 120—150 tys. hiektaraŭ.

Hleb Chmialnicki