Naviny kultury

Naviny kultury

 

Volnaje vohnišča

17 žniŭnia ŭ Babrujsku, na ŭźbiarežžy Biareziny, adbyŭsia tradycyjny, piaty pa liku, fest bardaŭskaj pieśni i paezii “Volnaje vohnišča”. Hetym razam jon mieŭ formu tvorčaha siabroŭskaha spatkańnia, biez vyznačeńnia pieramožcaŭ. Paetaŭ pryjechała bahata, a muzykaŭ — tolki troje: Andrej Mielnikaŭ i miascovyja bardy Ryhor Spasiuk dy Śviatłana Čarnienka. Heta byŭ pieršy vystup Andreja ŭ Babrujsku. Tvory A.Mielnikava kranuli ŭsich prysutnych, a asabliva ŭrazili tych, chto słuchaŭ jaho i ŭpieršyniu, i žyŭcom, i pry vodbliskach vohnišča. Heta niezabyŭna. Ładziła “Volnaje vohnišča” miascovaja supołka TBM pry finansavaj padtrymcy siabroŭ “Narodnaj hramady”.

Viktar Malinoŭski, Babrujsk

Narodnyja čytańni pamiaci Kupały

Try miesiacy doŭžylisia štotydniovyja paetyčnyja čytańni ŭ honar 120-ch uhodkaŭ z dnia naradžeńnia Janki Kupały ŭ skvery jaho imia la pomnika. Ładzili ich siabry KCHP-BNF. 15 žniŭnia adbyłasia zaklučnaja impreza. Sabrałasia piać dziasiatkaŭ šanavalnikaŭ paezii. Jak zaŭsiody, naviersie pomnika — plakat ź nieŭmiručymi słovami paeta “Žyvie Biełaruś!”. Viała čytańni movaznaŭca Valancina Maroz. Jak zaŭsiody, śpiavali pieśniu na słovy Kupały “Nie zahasnuć zorki ŭ niebie”. Z 25 žniŭnia čytańni pieranosiacca da pomnika Jakubu Kołasu. Pieršyja adbuducca 25 žniŭnia a 12-j.

Volha Kananovič, Miensk

Začyniajuć “Źmienu”

U aŭtorak kamisija Mienharvykankamu vyrašyła likvidavać try mienskija kinateatry — “Avanhard”, “Radzimu” i “Źmienu” z pryčyny ich stratnaści. Ale dyrektarka “Źmieny” Nina Makryckaja tłumačyć zakryćcio nakirunkam dziejnaści kinateatru. Tam ładzilisia imprezy, prysv́ječanyja Bykavu, prezentavalisia knihi j dyski niezaležnych vydaŭcoŭ, demanstravalisia biełaruskija videafilmy. “U toj čas, kali ŭ kinateatry “Centralny” źbirajucca adčyniać centar rasiejskaha kino, adziny biełaruski kinateatar likvidujuć”, — kaža spn.Makryckaja. Jana budzie asprečvać rašeńnie kamisii.

Siarhiej Budkin

 

“Spadčyna” adčyniłasia

U Horadni adnaviła pracu biblijateka “Spadčyna” pry haradzkim abjadnańni veteranaŭ vajny, pracy i ŭzbrojenych siłaŭ. U biblijatecy bahata knižak na histaryčnuju tematyku, jość tvory ziemlakoŭ-haradziencaŭ — Vasila Bykava, Danuty Bičel-Zahnietavaj. Biblijateka pracuje kožny aŭtorak i čaćvier z 15-j pa adrasie: vuł. Savieckaja, 31-12.

Źmicier Jahoraŭ, Horadnia

Uhodki Hienijuš

11 žniŭnia ŭ Zelvie adbyłosia śviatkavańnie 92-ch uhodak z dnia narodzinaŭ Łarysy Hienijuš. Arhanizavaŭ mierapryjemstva staršynia miascovaje supołki KCHP-BNF Juraś Kačuk. A 12-j u carkvie, što amal nasuprać domu paetki, adbyłasia imša. Prysutničała kala 50-ci čałaviek — z Horadni, Lidy, Vaŭkavysku, Śvisłačy, Słonimu, Mastoŭ, Miensku i inš. Dva hady tamu ŭ hetaj samaj carkvie była aśviečanaja pamiatnaja šylda, pryśviečanaja dobraj prychadžancy Łarysie Hienijuš. Heta pieršaja takaja šylda ŭ biełaruskich pravasłaŭnych cerkvach. Zatym ludzi nakiravalisia da mahiłaŭ Łarysy Hienijuš i jejnaha muža. Byŭ uskładzieny vianok, adbyłasia hramadzianskaja panichida. Pierad prysutnymi vystupili Aleś Biełakoz, Stanisłaŭ Sudnik, Aleś Čacholski i inš. Paśla ludzi razam z hrupaj słonimskich unijataŭ pračytali malitvu “Ojča naš”, a pry kancy praśpiavali “Mahutny Boža”.

Zaviaršyła śviatkavańnie niefarmalnaja tałaka na malaŭničym bierazie Zelvienskaha vadaschovišča. Tut pierad prysutnymi vystupili miascovy bard Valery Žamojcin i haradzienski muzyka Aleś Pietraševič.

Valery Rusielik, “Nioman-Infarm”

Aščadziŭ — i Stalina kupiŭ

U “Centralnaj kniharni” Miensku ŭ prodažy źjavilisia vydadzienyja ŭ Rasiei paštoŭki ŭ styli savieckich plakataŭ 30—50-ch hadoŭ minułaha stahodździa. Ciapier kožny, chto nastalhuje pa savieckich časoch, usiaho za 700 rubloŭ moža nabyć paštoŭku, jakaja abviaščaje, što “Tovariŝ Stalin — našie śvietłoje zavtra”, abo zaklikaje“Pod voditielstvom tovariŝa Stalina — v śvietłoje buduŝieje” i h.d. Pobač ź imi pradajucca i biaskryŭdnyja, naprykład, z aktualnym i siońnia lozunham “Nakopił i mašinu kupił”, jakaja prapahanduje savieckija aščadnyja kasy.

Badaj, ciapier jakomu biełaruskamu vydaviectvu treba vydać paštoŭkami biełaruskija plakaty časoŭ apošniaje niamieckaje akupacyi i pradavać u Rasiei.

A.Š.

 

---

 

in memoriam

Lavon Ramanoŭski

1 traŭnia 2002 h. Lavon Ramanoŭski tolki raspačaŭ 60-y hod svajho žyćcia. Jon byŭ poŭny tvorčaj enerhii i zadumaŭ. A 24 lipienia jahonaje žyćcio raptoŭna i trahična abarvałasia. Lavon byŭ mastak i pedahoh. Naradziŭsia jon u 1943 h. u vioscy Charoški na Mahiloŭščynie. Skončyŭ adździaleńnie žyvapisu teatralna-mastackaha instytutu. Vučyŭsia ŭ A.Baranoŭskaha i I.Stasieviča. Pracavaŭ u hazecie “Źviazda” j Mienskaj mastackaj vučelni. U 1994 h. ustupiŭ u tvorčuju supołku “Pahonia” i Biełaruski sajuz mastakoŭ. Byŭ zmaharom za adradžeńnie Biełarusi, za rodnuju kulturu. Praciah jahonaj spravy budzie ŭ jahonych dzieciach i vučniach.

Tvorčaja supołka “Pahonia”, Biełaruski sajuz mastakoŭ