Andrej Chadanovič. Biełaruskija limeryki

Šmatpakutnaja dzieŭka z Bahdanava

za rasiejca vychodzić biasštannaha.

Navat maje pasah,

dy žanich u trusach

patrabuje vyklučna prydanaha.

Nimfamanka-jurlivica z Zelvy

streła małpu-samca siarod selvy.

Ledź zrabiła avans,

jon pryvioŭ jaje ŭ trans

zapytańniem: “Ci madmuazel vy?”

Śpievaku i muzyku z Zaleśsia

padabalisia “Łastaŭki ŭ stresie”.

Tolki braŭ re dyjez,

jak u łastavak — stres,

i śpiavak — pry svaim intaresie.

Paśladoŭnicy Frojda z-pad Sołaŭ

na faličnaj symbolicy hołaŭ

pieramknuła — štonoč

špacyruje naŭzboč

hołych lip i hatyčnych kaściołaŭ.

Virtuoz-arhanista ŭ Barunach

zasnavaŭ škołu tancaŭ na trunach.

Zarablajučy chleb,

vodzić vučniaŭ u sklep

hrać na nervach, nibyta na strunach.

Pieraborlivy viazień z Karmy

ni bananaŭ nia jeŭ, ni churmy.

Tolki cichuju skarhu,

što na bulbu — embarha,

słaŭ dadomu z kubinskaj turmy.

Vieršatvorca z Davyd-Haradku

maje pryncyp: “U dzień pa radku”.

Siońnia vieršyk napiša,

zaŭtra — śpič pra “Ŭzvyšša”,

a šanson paślazaŭtra — “bratku”.

Pijaner Usiasłaŭ z Haradziei

kaža maci: “Pajdu ŭ čaradziei!

Usiaho akramia,

miłahučnaje jmia

dać harelicy maju nadzieju!”

Padryvalnik mastoŭ z-pad Mastoŭ

abminuŭ dziesiać tysiač pastoŭ…

Vybuch čuli zdala!..

Heta što! Jon paśla

razasłaŭ dziesiać tysiač listoŭ…

Kamsamolski važak z Mazyra

piva vyžłukcić moh paŭviadra,

a siabruk-pijaner

na šlachietny manier

zalivaŭ za kaŭnier paŭtara.

Ekanomnaj paniency z Tatarki

daspadoby adno pierastarki,

bo kali z maładym

nakachaješsia ŭ dym, —

sił nia chopić hladzieć haspadarku.

Vałacuha i visus z-pad Hłusku

maładuju kachaŭ andałuzku.

Da karydy pryvyk,

dzie, šalony, jak byk,

rvaŭ ź dziaŭčyny čyrvonuju bluzku.

Znakamity mastak u Babry

malavaŭ na ŭsialakim dabry —

dzie padkaža paryŭ.

Navat žonku tvaryŭ,

niby prodak, na ŭłasnym rabry.

Pryhažuni z dalokich Ždanovič

spadabaŭsia Andrej Chadanovič.

Tonie ŭsia ŭ pačućci…

Ciažka vyjście znajści,

dy niama biezvychodnych stanovišč.