Našych kandydataŭ niama
Nichto ź biełarusaŭ nia vyłučany na Nobeleŭskuju premiju miru sioleta.
Nichto ź biełarusaŭ nia vyłučany na Nobeleŭskuju premiju miru sioleta.
Pavodle našaj infarmacyi z krynicaŭ u Narvehii, nivodzin biełarus nia byŭ naminavany sioleta na Nobeleŭskuju premiju miru.
Letaś u śpisie naminantaŭ byŭ pravaabaronca Aleś Bialacki. Jon razhladaŭsia jak adzin z samych imaviernych kandydataŭ.
Vyłučeńnie skančajecca ŭ lutym, i śpisy kandydataŭ zastajucca ŭ tajamnicy. Adnak peŭna, što prynamsi siarod narvehaŭ biełarusaŭ sioleta nichto nie vyłučaŭ.
Letaś kandydaturu Alesia Bialackaha prapanavała hrupa deputataŭ narveskaha parlamentu ad roznych partyjaŭ. Hetuju ideju łabiravali pravaabaroncy z Švecyi j Narvehii.
Vybar laŭreata ažyćciaŭlaje kamitet u składzie piaci čałaviek, jakija delehujucca roznymi partyjnymi frakcyjami parlamentu. Da hetaha pytańnia narvežcy staviacca jak da spravy nacyjanalnaha honaru.
Premiju ŭ svoj čas atrymali Nelsan Mandeła – lider ruchu baraćby z aparteidam, Andrej Sacharaŭ (1975) – samy viadomy z savieckich dysydentaŭ, Lech Vałensa (1983) – lider polskaj «Salidarnaści», kiraŭnica birmanskaj apazycyi Su Džy ci jašče kiraŭniki vyzvalenčaha ruchu Ŭschodniaha Tymaru. Kamuści ź ich hetaje najvyšejšaje suśvietnaje pryznańnie dapamahło zachavać svabodu, kamuści – navat žyćcio. Jašče dzieści heta dapamahło ŭniknuć kryvi – hałoŭnaja zadača premii.
Dahetul nivodzin biełarus nie atrymlivaŭ prestyžnaj uznaharody. Uradžency Biełarusi – Acharon Kłuh (chimija), Sajman Śmit Kuźniec (ekanomika), Žares Ałfioraŭ (fizyka), Menachiem Behin i Šymon Peres (mir) – ale nie hramadzianie krainy.
U svoj čas Siarhiej Dubaviec pisaŭ, što atrymańnie Nobeleŭskaj premii było b važnym dla ŭmacavańnia nacyjanalnaha honaru biełarusaŭ.
Adnak paśladoŭna łabiravańniem biełaruskich kandydaturaŭ na Nobela nie zajmajecca nichto: ni va ŭradzie, ni ŭ niezaležnym hramadztvie.