Udava Miłošaviča — karaleva kantrabandystaŭ
Mira Markavič abvieščana ŭ mižnarodny vyšuk.
Prakuratura taksama maje namier abvieścić u mižnarodny vyšuk syna Miłošaviča i Markavič — 32‑hadovaha Marka Miłošaviča pa analahičnym abvinavačańni.
Order na aryšt Miry Markavič byŭ vydadzieny paśla zatrymańnia i dopytu serbskimi pravaachoŭnymi orhanami čatyroch čałaviek, jakija ŭvachodzili ŭ złačynnuju hrupoŭku pa kantrabandzie cyharetaŭ.
Pavodle słovaŭ prakurora Słabadana Radavanaviča, Markavič i jaje syn na praciahu piaci hod — z 1996 pa 2001 hh. — zajmalisia arhanizacyjaj kantrabandnych pastavak cyharetaŭ, nanosiačy serbskaj kaźnie straty ŭ dziesiatki miljonaŭ dalaraŭ.
Mira Markavič raniej užo abviaščałasia Serbijaj u mižnarodny vyšuk pa abvinavačańni ŭ kradziažach i złoŭžyvańni ŭładaj u peryjad znachodžańnia jaje muža na pasadzie prezydenta Juhasłavii. Pa niekatorych dadzienych, Markavič i jaje syn mohuć chavacca ad pravasudździa ŭ Rasiei. Z‑za bojazi aryštu jany navat nie pryjechali na pachavańnie Słabadana Miłošaviča ŭ sakaviku 2006 h.