Biełaruś — hanarovy hość najbolšaha litaraturnaha festu Čechii
Tryccać biełaruskich litarataraŭ buduć uvieś lipień čytać svaje tvory ŭ Brnie, u ramkach festu «Miesiac aŭtarskaha čytańnia». Kožny dzień — novy litaratar.
«Miesiac aŭtarskaha čytańnia» — najbujniejšy česki litaraturny festyval, jaki z 2000 hodu ładzić vydaviectva j ahienctva «Větrné mlýny» («Vietraki»). Adbyvajecca ŭ časie teatralnych vakacyjaŭ, štodnia z 1 da 31 lipienia, u pamiaškańni teatru «Husa na provázku» («Huś na kanacie»).
U 2000 — 2004 hh prahrama festyvalu ŭklučała adnu litaraturnuju viečarynu štodnia na praciahu lipienia. Z 2005 hodu kolkaść viečarynaŭ padvoiłasia: adna — pryśviečanaja českaj litaratury, duhaja — prezentuje tvorcu z krainy—hanarovaha hościa festyvalu. U 2005 hodzie takimi hanarovymi haściami byli słavackija piśmieńniki, u 2006‑m — niamieckija, sioleta ŭ lipieni haściami festyvalu buduć litaratary ź Biełarusi. Raspačnuć festyval Uładzimier Arłoŭ dy Bohdan Trojak, a zavieršać Andrej Chadanovič dy Ivan Kraŭs. Siarod biełaruskich udzielnikaŭ «MAČ» — Alaksandar Łukašuk, Lavon Volski, Aleś Razanaŭ, Jeva Viežnaviec, Natałka Babina, Viera dy Viktar Žybuli, Ihar Babkoŭ dy inšyja.
Akramia znanych českich i biełaruskich litaraturaŭ na festyvali možna budzie aznajomicca z tvorčaściu aŭtaraŭ‑pačatkoŭcaŭ, muzykaŭ, pabačyć navinki teatralnaha performansu. Upieršyniu ŭ historyi festyvalu Letniaja kinematahrafičnaja škoła va Ŭhorskim Hradziščy prezentuje ahlad niezaležnaha kino ŭ centry Brna.
Dla pryježdžych naviednikaŭ arhanizatary prapanuć pasiarednictva ŭ pošuku i rezervacyi pražyvańnia. Žurnalistam pradstaŭlajecca akredytacyja i ŭsialakaja dapamoha.
Płata za ŭvachod na ŭsie imprezy festu — dobraachvotnaja. Admysłova da festyvalu padrychtavali prahramny kataloh, u jakim možna znajści asnoŭnuju infarmacyju pra kožnaha z udzielnikaŭ.
Dla tych, chto nia zmoža patrapić u lipieni ŭ Čechiju: viečaryny «MAČ» možna budzie hladzieć on‑line na admysłovaj internet‑staroncy. Na hetaj staroncy možna znajści taksama nieabchodnyja adresy i kantakty arhanizataraŭ.