Hajdukievič: «U Biełarusi niama palitviaźniaŭ»
«U Biełarusi niama palitviaźniaŭ i my na hetym nastojvajem»,— zajaviŭ siońnia ŭ Rymie specpradstaŭnik ministra zamiežnych spraŭ Siarhiej Hajdukievič.
U časie sustrečy ź italjanskim deputatam i dakładčykam Parlamenckaj asamblei Rady Eŭropy pa Biełarusi Andreja Ryhoni biełaruski parlamentar, lider Liberalna‑demakratyčnaj partyi Biełarusi padkreśliŭ, što viaźni, pra jakich pišuć na Zachadzie, źjaŭlajucca zvyčajnymi kryminalnikami.
Jon adznačyŭ, što Biełaruś «źjaŭlajecca adkrytaj krainaj, hatovaj dla kantaktaŭ z Eŭraźviazu i eŭrapiejskimi strukturami. Siarhiej Hajdukievič taksama zajaviŭ, što jahonaja kraina kročyć kursam ekanamičnych reformaŭ.
U svaju čarhu Andrea Ryhoni, jaki źbirajecca naviedać Miensk sioleta ŭ kastryčniku, skazaŭ, što daručyć kaleham pravieryć praŭdzivaść hetaj infarmacyi. U časie sustrečy Andrea Ryhoni taksama padkreśliŭ, što nichto nia prosić ad Biełarusi stać u adzin momant demakratyčnaj krainaj. Adnak było b pažadana, kab u časie nastupnaj takoj sustrečy, biełaruski bok zmoh by prademanstravać kankretnyja vyniki ŭ ažyćciaŭleńni chacia b adnoj z 12 reformaŭ, vykanańnia jakich patrabuje ad Biełarusi EZ, zajaviŭ dakładčyk PA RE pa Biełarusi.
Zaŭtra ŭ Strasbury zaplanavanaja sustreča Siarhieja Hajdukieviča z prezydentam PARE Rene van der Lindenam.