Pradstaŭnik uradu pra adnosiny z «Hazpromam»
«Dla nas haz — 80% usich enerharesursaŭ. Pradać kantrolny pakiet «Biełtranshazu» — toje samaje, što pradać kantrolny pakiet dziaržavy», — tak patłumačyŭ pazycyju biełaruskich uładaŭ u kanflikcie z «Hazpromam» Valancin Mackievič, namieśnik načalnika ŭpraŭleńnia investycyjaŭ Ministerstva enerhietyki.
«Niama sensu pryvatyzavać AAT «Biełtranshaz» na rasiejskich umovach, — kaža V.Mackievič. — Našy ŭmovy ŭzvažanyja i akuratnyja. Pradavać «Biełtranshaz» pa balansavym košcie niama sensu. Tym bolš što pradpryjemstva daje narmalny prybytak. Luby nacyjanalny ŭrad vysoŭvaŭ by mienavita takija ŭmovy, jakija Biełaruś prapanavała AAT «Hazprom».
V.Mackievič ličyć, što pahrozy «Hazpromu» transpartavać haz u abychod Biełarusi ci padvysić canu na jaho da suśvietnaj nie vytrymlivajuć krytyki. «Naŭrad ci možna pastavić na 1100 km kampresarnuju stancyju ŭ Bałtycy. Heta blef. Kali («Hazprom» — «NN») pavysić ceny, jak było zroblena ŭ Baŭharyi, Vuhorščynie i inšych krainach byłoha saclahieru, to źjavicca vielmi chutka šlach na Zachad, vielmi vialiki stymuł dla ekanomiki, bo pradpryjemstvy nikudy nie padzienucca, — daviadziecca adrazu ž liberałbzavać ekanomiku. Heta adreža Biełaruś ad Rasiei, u takim razie Biełaruś budzie vymušana iści ŭ Eŭropu. Rasieja na heta nia pojdzie, kali ŭ jaje, viadoma, niama mety vypichnuć Biełaruś na Zachad.
Ich by zadavolili našy ŭmovy, kali b była pahroza prychodu inšaj kampanii, zacikaŭlenaj u «Biełtranshazie», ale «Hazprom» — manapalist. Nam varta skaračać dolu hazu ŭ paliŭna-enerhietyčnym balansie krainy i pastupova pryvučać ekanomiku Biełarusi da vysokich cenaŭ na haz. Ale dla hetaha patrabujecca refarmavańnie ŭsioj ekanomiki dziela źjaŭleńnia ŭ pradpryjemstvaŭ dastatkovych abarotnych srodkaŭ na apłatu enerhanośbitaŭ, źjaŭleńnia kankurentazdolnaj pradukcyi. Treba pačynać hulać pa suśvietnych praviłach, kab akramia rasiejskaha na rynku źjaviŭsia i zachodni kapitał na roŭnych umovach».
BiełaPAN