Paśla «Našaj Ukrainy» — «Naša Małdova»
U Małdovie paŭstała novaja palityčnaja siła. Pravacentrysty abjadnalisia za dva hady da parlamenckich vybaraŭ 2005 h. 19 lipienia na ŭstanoŭčym źjeździe Sacyjał-demakratyčny aljans, Aljans niezaležnych, Liberalnaja i Narodna-demakratyčnaja partyi ŭtvaryli sajuz «Moldova Noastra» («Naša Małdova»).
Hanarovym staršyniom staŭ pieršy prezydent niezaležnaj Małdovy Mirča Śniehur. Kiravać novym palityčnym farmavańniem budzie tryjumvirat: były načalnik darožnaj palicyi Viačasłaŭ Unciłe, były premjer Dumitru Brahiš i dziejny kišyneŭski burmistar Serafim Urekian. Apošni, darečy, zmoh adstajać svaju pasadu na travieńskich vybarach u ciažkaj baraćbie z kandydatam-kamunistam.
U traŭni, padčas miascovych vybaraŭ, centrysty ŭžo zmahalisia adzinym blokam i nabrali bolš za 20% hałasoŭ, skłaŭšy realnuju kankurencyju kampartyi. Zasnavalniki Aljansu mieracca stvaryć palityčnuju siłu, što budzie alternatyvaj kiroŭnaj Partyi kamunistaŭ. Dla stvareńnia novaje partyi mnohim centrysckim palitykam daviałosia admovicca ad svaich persanalnych ambicyjaŭ. Vyrašana, naprykład, što «Naša Małdova» budzie pravapierajemnicaj tolki adnaho Sacyjał-demakratyčnaha aljansu, a ŭsie astatnija partyi-zasnavalnicy pahadzilisia raspuścicca.
«Naša Małdova» vystupaje za ažyćciaŭleńnie liberalnych ekanamičnych reformaŭ, stavić zadaču intehracyi ŭ eŭrapiejskija struktury i zaznačaje, što treba, kab kožny hramadzianin pavažaŭ histaryčnyja i kulturnyja kaštoŭnaści karennaha nasielnictva dy rumynskuju movu. U halinie vonkavaj palityki «Naša Małdova» ŭvažaje, što intehravacca ŭ Eŭropu možna «šlacham padtrymki z boku Rumynii».
Chryścijanskija demakraty, nastupniki Narodnaha frontu Małdovy, nie ŭvajšli ŭ novy aljans.
Siarhiej Rak