Michalevič: KDB rychtuje spravu ZBS

Namieśnika staršyni Partyi BNF Alesia Michaleviča papiaredzili ab kryminalnaj adkaznaści.

U piatnicu namieśnik staršyni Partyi BNF Aleś Michalevič atrymaŭ ź mienskaj haradzkoj prakuratury aficyjnaje papiaredžańnie ab «niedapuščalnaści parušeńnia zakonu».

Hetaje papiaredžańnie prakurorskija rabotniki sprabavali ŭručyć Michaleviču jašče ŭ minułuju sieradu, ale palityk admoviŭsia jaho brać, bo tam było napisana pa‑rasiejsku, a Michalevič zajaviŭ, što nie razumieje napisanaha. Nastupny dakument byŭ napisany ŭžo pa‑biełarusku.

U papiaredžvańni pišacca: «U prakuratury horadu Miensku majecca infarmacyja zhodna ź jakoj Vy źbirajeciesia arhanizavać i pryniać udzieł u dziejnaści moładzievaj niezarehistravanaj arhanizacyi «Zadzinočańnie biełaruskich studentaŭ».

U śniežni 2001 h. Viarchoŭny sud pryniaŭ rašeńnie ab spynieńni dziejnaści ZBS. Dalejšyja sproby abskardzić hetaje rašeńnie nijakaha plonu nie dali.

Papiaredžańnie padpisanaje namieśnikam prakurora horadu Miensku, staršym savietnikam justycyi A.Stukam. Jon ža padpisvaŭ analahičnyja papiaredžvańni jašče trom moładzievym aktyvistam Jaŭhienu Ivaniuku, Nastastsi Šamarej i Nadziei Mancevič.

Michalevič miarkuje, što hetaje papiaredžańnie źviazanaje z tym, što ofis ZBS doŭhi čas znachodziŭsia na pryvatnaj kvatery palityka. «Mnie zdajecca, što KDB rychtuje novuju kryminalnuju spravu, padobnuju na «maładafrontaŭskuju». Pakul što ich strymlivajuć niejkija pieramovy z Eŭrasajuzam, ale nia viedaju nakolki jany doŭhimi i tryvałymi», — miarkuje Aleś Michalevič.

Źmicier Pankaviec

Kamientary da artykuła