Namieśniki cara pa revalucyi
Za hrošy ŭładu možna kupić tolki tam, dzie da hrošaj majecca pavaha. Reformy 1990-ch nia vykaranili tradycyi brać siłaj toje, za što ŭ prystojnym hramadztvie płaciać hrošy. Da šmatlikich liberałaŭ «na pasłuhach» va ŭłady dadaŭsia mahnat Chadarkoŭski.
Artykuł rasiejskaha aliharcha i najbahaciejšaha zeka ŭ śviecie Michała Chadarkoŭskaha ab kryzysie rasiejskaha liberalizmu źjaviŭsia na tym tydni ŭ hazecie «Viedomosti» i vyklikaŭ efekt bomby. Chadarkoŭski zaklikaŭ svaich paplečnikaŭ pieraasensavać dośvied i vyniki reformaŭ 1990-ch, pakajacca pierad narodam dy ŭładami za naniesienuju škodu i chłuśniu, padzialicca hrašyma, kab lehitymizavać vyniki pryvatyzacyi. A hałoŭnaje, navat nie imknucca vajavać z Kramlom i asabista Pucinym, jakoha eks-aliharch bačyć harantam zachavańnia liberalnaha kursu choć u niejkaj formie.
Nahadvaje pakajannyja listy stalinskaha času. A evalucyja palityčnych pohladaŭ źniavolenaha bahacieja nahadvaje «pierakoŭku» klasavaha voraha.
Biełaruski i rasiejski liberalizm davoli ščylna źviazanyja. I mienavita z raźvićciom palityčnych padziejaŭ dy ekanamičnych reformaŭ šmat chto z prychilnikaŭ idejaŭ Frydmana dy Hajeka źviazvaŭ los pieramienaŭ u samoj Biełarusi. Tamu hety list — važnaja źjava i dla palityčnych pracesaŭ unutry našaj krainy: jak minimum, jon dazvalaje lepš zrazumieć, što adbyvajecca ŭ našych susiedziaŭ.
Chadarkoŭski nia prosta zrabiŭ pavarot na 180 hradusaŭ. Hetymi vysnovami jon padstaviŭ svaju byłuju palityčnuju klijenturu ŭ toj čas, kali jaho ŭžo pieratvaryli ŭ ściah supracivu pucinskamu aŭtarytaryzmu. Akramia taho, Chadarkoŭski całkam lehitymizavaŭ palityčnuju praktyku dy palityčny dyskurs sučasnaj Rasiei. Pakajańnie pradpisanaje nie kamunistam i nie supracoŭnikam KHB, a liberałam. Adkaznaść za parušeńnie zakonu dy nastup na demakratyju ŭ sučasnaj Rasiei pierakładajecca zusim nie na tych, chto ŭ hetym naŭprost vinavaty. Pad «nacyjanalnymi intaresami», u kantekście jakich musić realizavacca novy liberalny prajekt, prazrysta razumiejucca intaresy dziaržaŭnaj biurakratyi dy samoha Pucina. Narešcie, Chadarkoŭski abychodzić bokam pytańnie, ci sapraŭdy pucinskaja ŭłada budzie damahacca taho, kab aliharchi dzialilisia z hramadztvam. Bo śpis najbahaciejšych ludziej śvietu niaspynna papaŭniajecca rasiejskimi mahnatami, a sadžajuć tolki tych, chto prajaviŭ palityčnyja ambicyi. Niedarečniejšym za artykuł Chadarkoŭskaha byŭ chiba pakajanny list Mikałaja II ab kryzysie rasiejskaje manarchii dy pravasłaŭja za dźvie hadziny da rasstrełu.
Prydvornyja liberały
Tak što element kali nie «prahinu», to pryznańnia parazy, biezumoŭna, jość. Adnak, jak luby hulec, Chadarkoŭski razumieje, što niama sensu davodzić prajhranuju partyju da matu — razumniej zdacca i pačać novuju. Pryčyny jahonaj kapitulacyi našmat hłybiejšyja, čym ułasnaje źniavoleńnie. Jany znachodziacca ŭ pryrodzie i losie ŭsich papiarednich rasiejskich liberalnych prajektaŭ.
Poŭny varyjant artykułu hladzicie ŭ hazecie "Naša Niva".
Vital Silicki