BATE vyjhraje bieź lehijaneraŭ
Chaciełasia ŭ kolkich słovach praciahnuć temu lehijanerstva ŭ našym unutranym čempijanacie pa futbole, uźniatuju Aleham Ždanovičam u «NN» ad 9 krasavika.
Napiaredadni sioletniaha sezonu pa futbole nie palenavaŭsia dy paličyŭ kolkaść «varahaŭ» na našych palach. Vyjšaŭ 71 čałaviek. Hetkaj kolkaści hulcoŭ chapiła b na 3-4 kamandy. Siarod našych lehijaneraŭ, pavodle maich padlikaŭ, akazalisia 33 rasiejcy, 22 ukraincy, piaciora hruzinaŭ, troje małdavanaŭ, dvoje baŭharaŭ, adzin čech, albaniec, brazylec, uzbek, łatyš i armianin. Miž inšym, jašče majem čatyroch rasiejcaŭ — hałoŭnych treneraŭ kamand: Siarhieja Padpałaha, Piatra Šubina, Armiena Adamiana, Viktara Viarčova, jakija pracujuć adpaviedna na «Homiel», mienskaje «Dynama», «Darydu» i «MTZ-RIPA». Bieraściejskaje «Dynama» treniruje łatyš Viktar Nieściarenka.
Možna pahadzicca, što sytuacyja ź lehijanerami ŭ nas jašče nie takaja katastrafičnaja, jak u Tumannym Albijonie (časam u asnoŭnym składzie «Hłazha» nie vychodzić nivodzin šatlandziec), adnak peŭnyja niebiaśpiečnyja tendencyi nazirajucca i na ajčynnych futbolnych paloch. Nadzvyčaj aktyŭna «ŭschodniuju palityku» nabyćcia hulcoŭ z Rasiei i Ŭkrainy sioletniaj zimoj viali «Homiel», «Dniapro-Transmaš», «Nioman», «Daryda», «MTZ-RIPA». Hetkaja staŭka na «pryvazny tavar» sparadziła nievialikuju dyskusiju ab uviadzieńni limitu na lehijaneraŭ, jak heta zroblena, naprykład, u Kazachstanie. Kožny kazachski klub maje prava mieć tolki piać lehijaneraŭ. Ci nia hetaje abmiežavańnie spryčyniłasia da chutkaha tempu raźvićcia kazachskaha futbołu? Ciapierašnija kluby z hetaj krainy ŭdzielničajuć u spabornictvach pad ehidaj UEFA.
Nie biady było b, kab da nas jechali vysokatechničnyja hulcy, — biełarusy hetaksama masava źjaždžajuć na pracu ŭ tyja samyja Rasieju ci Ŭkrainu. Adnak vychodzić tak, što zamiest najlepšaha snajpera letašniaha čempijanatu Siarhieja Karnilenki, jaki źjechaŭ hulać u kijeŭskaje «Dynama», my atrymali tuzin ichnich paŭprafesijanałaŭ, jakija sastupajuć uzroŭniu navat našych futbalistaŭ. Čamu tak adbyvajecca? Adkaz vielmi prosty: kupić jakohaś druharadnaha rasiejca značna tańniej, čym vychavać ułasnuju zoračku nakštałt Bialkieviča ci Hleba. Dziciačaja futbolnaja industryja naležnym čynam pastaŭlena tolki ŭ troch—piaci klubach, astatnija j nadalej buduć rabić staŭki na «varahaŭ».
Adzinaj biełaruskaj kamandaj, u šerahi jakoj nia ŭpliščyŭsia nivodzin lehijaner, sioleta stałasia BATE, flahman našaha čempijanatu, jaki za šeść hadoŭ žyćcia ŭ vyšejšaj lizie anirazu nie zastaŭsia biez medaloŭ. Jaskravy prykład taho, što pryzavy metał možna kavać vyklučna svaimi kadrami.
Mahčyma, niekamu padasca, što ja vystupaju suprać usiakich lehijaneraŭ uvohule. Nie, ni ŭ jakim razie. Takija hulcy, jak rasiejcy Karsakaŭ i Navumaŭ, brazylec Edu ci baŭharyn Złacinaŭ, tolki dadajuć niepaŭtornaha kalarytu našamu pieršynstvu. Škada, što hetkich prykładaŭ nabrałosia nia tak i šmat.
Siarhiej Pankaviec, Kastryca