Zakładnik №1
U sieradu skončyŭsia termin papiaredniaha aryštu eks-staršyni Mienharvykankamu, eks-ministra zamiežnych ekanamičnych suviaziaŭ, eks-ambasadara ŭ Łatvii, Estonii dy Finlandyi Michaiła Maryniča. Nahadajem, śledčyja KDB abrali ŭ jakaści miery strymańnia dla Maryniča ŭtrymańnie pad vartaj. Što abvinavačańnie budzie pradjaŭlena, sumnievaŭ niama.
U sieradu ž adbyvałasia i pasiadžeńnie admysłovaj ekspertnaj kamisii pry Radzie Biaśpieki, na jakoj razhladałasia kožnaja papierka z tych, jakija byli kanfiskavany z archivu na leciščy Michaiła Maryniča.
18 krasavika, niadziela. Na leciščy Maryniča ŭ Zacieni niechta vyniaŭ adnu z akonnych šybaŭ. Heta zaŭvažyŭ susied Maryniča. Pa prośbie haspadara susiedzi paśla biehłaha ahladu domu adznačyli, što byccam by ŭsio na svaich miescach. Milicyi vyrašyli nie vyklikać.
20 krasavika. U kvatery Maryniča na pr.Mašerava raptam stali drenna pracavać zamki.
24 krasavika, subota. Ranicaj Marynič zaŭvažaje, što ŭ jahonym aŭtamabili raźbita škło. Jon idzie ŭ kvateru pa hrošy na novaje škło, adnak akazvajecca, što ŭ chacie niama ni rubla. Kala 20.00 «Ford» Maryniča spyniaje patrul DAI na vulicy Arłoŭskaj u Miensku. Paśla pravierki dakumentaŭ zapatrabavali adčynić mašynu dla nadhladu asabistych rečaŭ. Marynič admoviŭsia. Na miescy źjaŭlajucca aperatyŭnyja supracoŭniki KDB. Jany adčyniajuć kiejs, znachodziać tam 90 tys. dalaraŭ, a ŭ mašynie — razukamplektavany hazavy pistalet. Maryniča viazuć u KDB na razmovu.
25 krasavika, niadziela. Da 4-j hadziny ranicy pierapisvajuć numary kupiur, paralelna Maryniča raspytvajuć, adkul hrošy. Zhodna z našaj infarmacyjaj, jamu niešta prapanujuć, pakidajučy na rozdum adny sutki. Supracoŭniki KDB pryznačajuć Maryniču čas sustrečy, dadajučy, što jon musić prynieści paćviardžeńnie taho, što heta jahonyja hrošy. U hety ž dzień Marynič idzie na Schod intelihiencyi. Hrošy, zhodna z našaj infarmacyjaj, pryznajucca sapraŭdnymi.
26 krasavika, paniadziełak. A 15-j Marynič idzie pa hrošy ŭ KDB. Jaho zatrymlivajuć. Prakuratura vydaje sankcyju na vobšuk na leciščy, u kvatery, haražy Maryniča. Uviečary na lecišča pryjaždžaje aperatyŭnaja hrupa KDB i pravodzić pieratrus. U tym pakoi, dzie kolki dzion tamu była vyniata šyba, znachodziać narazny pistalet hišpanskaj vytvorčaści. Taksama kanfiskujuć tečki z «sakretnymi materyjałami» z archivu Maryniča.
27 krasavika, aŭtorak. Staršynia KDB Leanid Jeryn aficyjna paćviardžaje, što Marynič zatrymany. Na pasiedžańni pałaty pradstaŭnikoŭ deputat Valery Frałoŭ zadaje premjer-ministru Siarhieju Sidorskamu pytańnie ab pryčynach zatrymańnia Maryniča. Sidorski admaŭlajecca adkazvać. A 19-j małodšy syn Maryniča Pavał razam z maci, viarnuŭšysia dadomu, zaŭvažaje, što niechta ŭvachodziŭ u kvateru. Zamki začynienyja, ale nia tak, jak zvyčajna. Da taho ž adčynieny balkonnyja dźviery. U hety ž dzień supracoŭniki KDB trasuć kvateru Izabieły Marynič — byłoj žonki starejšaha syna Michaiła Maryniča Ihara. Ničoha nie kanfiskavana.
28 krasavika. Ranicaj u KDB byli vyklikany syny Maryniča Pavał i Ihar, a paśla razmoŭ ź imi śledčyja praviali pieratrus u haražy Paŭła. Pavodle słoŭ Paŭła Maryniča, pieratrus praciahvaŭsia bolš za try hadziny i zaviaršyŭsia kanfiskacyjaj niekatorych dakumentaŭ arhanizacyi «Dziełavaja inicyjatyva», jakoj kiravaŭ (zhodna z rašeńniem Miniustu, nielehitymna. — Z.D.) Michaił Marynič. Zajavu ŭ abaronu Maryniča prymaje deputackaja hrupa «Respublika», a 12-j u «BDH» prachodzić pres-kanferencyja deputataŭ, a 15-j — akcyja deputataŭ «Svabodu Maryniču!» la centralnaha ŭvachodu ŭ KDB. U hety ž dzień na zatrymańnie Maryniča adhuknułasia łatvijskaje ministerstva zamiežnych spraŭ: z 1999 da 2001 h. Michaił Marynič pracavaŭ ambasadaram Biełarusi ŭ hetaj krainie. MZS Łatvii raspaŭsiudziła admysłovuju zajavu, u jakoj vykazvajecca aściaroha, što aryšt Michaiła Maryniča — heta źviadzieńnie rachunkaŭ režymu z palityčnymi praciŭnikami.
2 traŭnia BT uviečary ŭ siužecie pra Michaiła Maryniča paviedamiła niekatoryja padrabiaznaści jahonaj spravy. Na BT śćviardžajuć, što častka znojdzienych u Michaiła Maryniča 90 tysiač dalaraŭ nibyta falšyvyja. Taksama BT paviedamiła pra čatyry kamputary, znojdzienyja ŭ Maryničavym haražy. Pavodle teležurnalistaŭ, znojdzienyja ŭ haražy kamputary Michaiłu Maryniču pieradała amerykanskaja ambasada dla stvareńnia rehijanalnaj sietki arhanizacyi «Dziełavaja inicyjatyva».
Niekatoryja vysnovy
Pa-pieršaje, ź siaredziny 90-ch hadoŭ (a mienavita da hetych časoŭ adnosiacca «sakretnyja materyjały») śpis dziaržsakretaŭ paśpieŭ źmianicca. Pa-druhoje, isnuje paniaćcie «sastarełyja sakrety», jakija na siońnia z roznych pryčyn sakretami bolš nie źjaŭlajucca. Ale kali choć adna «hryfavanaja» papierka budzie pryznana tajamnicaj, niebiaśpiečnaj dla isnavańnia dziaržaŭnaha ładu, Maryniču śviecić artykuł 377 č.2 KK «Vykradańnie abo paškodžańnie dakumentaŭ asablivaj važnaści, vykarystańnie jakich moža nanieści istotnuju škodu dziaržavie» (štraf ci aryšt na termin da šaści miesiacaŭ, abmiežavańnie ci pazbaŭleńnie voli na termin da 5 hod). Marynič kazaŭ, što źbiraŭsia z dapamohaj hetych dakumentaŭ pisać ułasnyja memuary. Viadoma taksama, što za tyja hady, kali hetyja papiery znachodzilisia na leciščy Maryniča, ich nichto nie šukaŭ. Razam z tym viadoma, što, kali ministerstva zamiežnych ekanamičnych suviaziaŭ likvidavali, abjadnaŭšy ź Ministerstvam zamiežnych spraŭ, jaho archivu nie pryniali, bo ŭ archivie MZS nie było miesca. Tady były ministar Michaił Marynič i musiŭ častku dakumentaŭ vyvieźci na lecišča «dla historyi». I voś jon u hetuju «historyju» trapiŭ.
Aproč hetaha, pry vobysku ŭ noč na 27 krasavika na leciščy Maryniča znajšli hišpanski narazny pistalet, a heta ŭžo artykuł 295 č.2 — «Niezakonnyja dziejańni ŭ adnosinach da ahniastrelnaj zbroi» (papraŭčyja raboty na termin da 2 hod ci aryšt na termin da 6 miesiacaŭ, abmiežavańnie ci pazbaŭleńnie voli na termin da 5 hod z kanfiskacyjaj majomaści abo bieź jaje). Rodnyja kažuć, što ŭ Maryniča byŭ razukamplektavany hazavy pistalet i nikoli nie było ahniastrelnaha.
Hrošy ž Maryniču pazyčyŭ «niejki rasiejec», jaki nibyta «nia viedaŭ, na što daje». Telebačańnie pakazała stužku, dzie Marynič havoryć, što hrošy pavinny byli pajści na padtrymku biełaruskich demakratyčnych kandydataŭ u parlament. Marynič nia moh nia viedać, što heta zabaroniena biełaruskim zakanadaŭstvam. Dziŭna, što na TB pakazali frahment dopytu, što taksama zabaroniena. Uźnikaje sumnieŭ, ci była hetaja stužka ŭvohule sapraŭdnaja: zmazany vidarys, kiepska čutny hołas, zaciorty chronametraž. Kali sapraŭdnaja — nieviadoma, ci ŭ adekvatnym stanie na toj momant znachodziŭsia Marynič.
Stužka vyklikała reakcyi apazycyi: Vasil Lavonaŭ u interviju radyjo «Svaboda» zajaviŭ, što Marynič «da hetaha» (majecca na ŭvazie aryšt i žorstki psychalahičny cisk) «byŭ nie hatovy». A Ŭładzimier Parfianovič skazaŭ, što, kali pačuje ad samoha Maryniča «toje samaje», h.zn. što jon braŭ ad rasiejskich biznesoŭcaŭ hrošy pad vybary, jon ad Maryniča admiažujecca.
Niekatoryja versii
Palityčnaja. Usio robicca dziela taho, kab jon nia moh vieści palityčnuju dziejnaść. Marynič nie vykazvaŭ žadańnia znoŭ balatavacca na prezydenckuju pasadu. Ale ŭ dzień aryštu, 26 krasavika, u druhoj pałovie dnia jon pavinien byŭ sustrecca z pasłom adnoj z eŭrapiejskich krain. Kažuć, apošnim časam Marynič šukaŭ krainu, dzie mahli b być raspačaty kryminalnyja spravy suprać biełaruskaha kiraŭnictva. Zakanadaŭstva šerahu krainaŭ praduhledžvaje ŭ niekatorych vypadkach uzbudžeńnie takich kryminalnych spraŭ i vydaču orderaŭ na aryšt.
Ekanamičnaja. Marynič — čałaviek z suviaziami, u tym liku z patencyjnymi investarami, u tym liku — zamiežnymi. Da taho ž jon čałaviek z vopytam kiravańnia, taki sabie «biełaruski Arkadź Volski». A ŭ biznesie čaściakom mienavita vaha pasrednika, jaki viadzie pieramovy ź investaram, vyznačaje pieršapačatkovyja abjomy investycyjaŭ. Marynič, kažuć, pracavaŭ apošnim časam jakraz nad tym, kab pryciahnuć u Biełaruś ludziej, hatovych układać u našu ekanomiku hrošy. Aryšt Maryniča — heta zachad uładaŭ da spynieńnia pracesaŭ kansalidacyi palitykaŭ, biznesoŭcaŭ, dyrektarskaha korpusu, kiraŭnikoŭ roznaha ŭzroŭniu ŭ baraćbie za źmienu ŭłady.
Źmicier Dryhajła