Chronika supracivu
8 vieraśnia ŭ Žodzinie padčas rasklejki ŭlotak zatrymany vučań 11-j klasy, siabar «Maładoho frontu» Jaŭhien Vałkaviec. Pastaŭskaja rajonnaja arhanizacyja BSDP (NH) była źniata z rehistracyi 15 vieraśnia: uprava justycyi Viciebskaha abłvykankamu paličyła, što pry jaje rehistracyi byli sfalšavany dakumenty. Namieśnicu hałoŭnaha redaktara škłoŭskaj rajonnaj hazety «Ŭdarny front» Ninu Bujnickuju zvolnili 20 vieraśnia za publikacyju vieršu, u jakim jana nie zaŭvažyła akravieršu, skiravanaha suprać Łukašenki. 21 vieraśnia hałoŭnaha redaktara niedziaržaŭnaj hazety «Hancavicki čas» Piatra Huzajeŭskaha nie puścili na adkrytaje pasiadžeńnie rajsavietu deputataŭ. U Viciebsku siabra KCHP-BNF Uładzimiera Pleščanku 22 vieraśnia za niesankcyjanavany pikiet asudzili na 160 b.v. A 24 vieraśnia jaho i Alaksandra Sałaŭjana asudzili na 10 sutak: siabry KCHP-BNF ahitavali suprać udziełu ŭ vybarach i referendumie. Aktyvistaŭ «Zubra» Mikitu Sasima i Hleba Viazoŭskaha 22 vieraśnia ŭ Miensku zatrymali milicyjanty, abšukali j źvinavacili ŭ drobnym chulihanstvie, bo znajšli baloniki z farbaj. Noč ich pratrymali ŭ milicyi, pratakoły skłali tolki zranku. Karespandentka niedziaržaŭnaj hazety «Hancavicki čas» Sofja Jaśko 22 vieraśnia ŭ sudzie Lachavickaha rajonu vyjhrała praces suprać redakcyi rajonnaj hazety «Savieckaje Paleśsie» i jaje hałoŭnaj redaktarki Haliny Mazinaj pa abaronie honaru, hodnaści j dziełavoj reputacyi. 22 vieraśnia ŭ Mahilovie byli zatrymany aktyvisty «Zubra» Andrej Zajcaŭ i Ŭładzisłaŭ Ženesku , u jakich kanfiskavali niekalki socień hazet. U Viciebsku 23 vieraśnia padčas razdačy ŭlotak suprać referendumu j daterminovaha hałasavańnia zatrymany Valer Ščukin . Bieraściejski abłasny sud 23 vieraśnia padčas kasacyjnaha razhladu spravy pa abaronie dziełavoj reputacyi PBNF admianiŭ papiaredniaje rašeńnie Małaryckaha sudu i faktyčna pryznaŭ, što BNF u čas druhoj suśvietnaj vajny supracoŭničaŭ z fašystami. U Bieraści 23 vieraśnia padčas razdačy ŭlotak zatrymany siabar «Maładoha frontu» niepaŭnaletni Alaksandar Ražałoŭski . 24 vieraśnia Michaiłu Maryniču byli pradjaŭleny novyja abvinavačańni — č.2 art.377 (vykradańnie ci paškodžańnie dakumentaŭ, štampaŭ, piačatak) i č.4 art.210 (vykradańnie praz złoŭžyvańnie słužbovymi paŭnamoctvami, učynienaje arhanizavanaj hrupaj ci ŭ asabliva bujnym pamiery). 25 vieraśnia jahonaje ŭtrymańnie pad vartaj padoŭžyli jašče na miesiac. Padčas raspaŭsiudžvańnia biuleteniu «Priedprinimatiel» i ŭlotak u Pinsku zatrymany Źmicier Levanieŭski . 25 vieraśnia ŭ Ivacevičach za raspaŭsiud hazety zatrymany aktyvist «Zubra» Stanisłaŭ Kučynski : śpiarša na jaho skłali pratakoł za raspaŭsiudžvańnie drukavanych vydańniaŭ biez vychodnych źviestak, potym — za antysanitaryju. U Škłovie 27 vieraśnia milicyjanty zrabili pieratrus kvatery Alaksandra Ščarbaka , kiraŭnika hrupy padtrymki kandydata ad PBNF Ryhora Kostusieva: šukali ŭlotki. 28 vieraśnia adbyŭsia pieratrus u bieraściejskim ofisie pravaabarončaha centru «Viasna» , kanfiskavanyja tysiačy ŭlotak. Aktyvisty «Zubra» Mikałaj Iljin i Jaŭhien Suvoraŭ zatrymanyja 27 vieraśnia padčas razdačy hazety ŭ Mahileŭskim peduniversytecie. U Baranavičach 27 vieraśnia padčas akcyi ŭ padtrymku M.Maryniča zatrymanyja aktyvisty «Zubra» Nasta Vasilenka , Arciom Łastaviecki , Alena Piatraška , Maryja Hansieckaja . Siabroŭku KCHP-BNF Alinu Dubroŭskuju 27 vieraśnia milicyjanty vysadzili z elektryčki, zatrymali jaje j kanfiskavali ŭlotki z zaklikam da bajkotu.
AŠ