Kanservatary ŭsich krain, nie jadnajciesia!
Pavodle apytańniaŭ, kali b biełarusy vybirali pamiž Kiery i Bušam, za demakrata prahałasavali b 62%. Viedali b jany, kaho padtrymlivajuć…
Elektaralnaja Fałudža, jakuju Buš-junijor zrabiŭ demakratam, abłamała ŭsiu prahresiŭnuju frakcyju čałaviectva. Samyja demaralizavanyja vyrašyli prosta nažracca i hladzieć na palityku jak na šoŭ, nakštałt prahramy «Za škłom». Sapraŭdy, cikava, kaho siońnia vykinuć z administracyi — Paŭeła abo Ramsfelda?
Bujnyja nie zdajucca. Pravadyr zialonych Danijel Kon-Bendyt ahituje eŭrapiejcaŭ vydavać hranty na padtrymku hramadzianskaha ruchu ŭ ZŠA. Ja adrazu ŭjaviŭ admarozkaŭ Bivisa i Batchieda z ruchu «Bizon», jakija bambiać ścieny ŭ Ałabamie hrafici «Dzie Ben Ładen? Dzie Sadam?». Častka demakrataŭ zajaviła, što jany nia chočuć zastavacca virtualnymi viaźniami bušaŭskaha Abu-Hrajba, i inicyjavała ruch za dałučeńnie cichaakijanskich i paŭnočna-ŭschodnich štataŭ (vybarčaja malina demakrataŭ) da liberalnaj Kanady. Vam nie zdajecca, što hety kampakt my ŭžo niedzie čuli? Tyja ž varyjanty — pajści ŭ zapoj, emihravać abo praciahvać baraćbu — stajać pierad kožnym prychilnikam biełaruskaj demakratyi paśla kastryčnickaha referendumu. I heta nia prosta supadzieńnie pa časie vybaraŭ u ich i plebiscytu ŭ nas.
Bušmeny pryznajuć, što zamačyli Kiery dziakujučy palitechnolahu Karłu Roŭvu. Zaakijanski Hleb Paŭłoŭski jašče paśla vybaraŭ 2000 h. kanstatavaŭ, što padčas hałasavańnia čatyry miljony kanservatyŭnych chryścijan zamiest taho, kab padtrymać GOP («Great Old Party» — pahaniała respublikancaŭ), słuchali pa «Family Radio» cikavuju pieradaču «Ludzi nia mohuć pachodzić ad małpaŭ, bo ŭ čałavieka niama chvasta». Roŭv prapanavaŭ hopnikam vieści elektaralnuju kampaniju z pazycyi abarony maralnych pryncypaŭ i zdoleŭ dastukacca da sercaŭ apalityčnych kaŭbojeŭ, marmonaŭ i amataraŭ hospełaŭ.
Poŭnaściu hety artykuł možna pračytać u papiarovaj i pdf-versii "Našaj Nivy"
Lolik Uškin, levy radykał