Viadomyja vypuskniki fiłfaku
Uładzimier Hraŭcoŭ, ułaśnik vydavieckaha chołdynhu
Uładzimier Hraŭcoŭ trapiŭ na fiłfak, bo nia zdaŭ ispytaŭ na žurfak. Skončyŭ jaho ŭ 1985 h. i vielmi chacieŭ zastacca na litaraturnaj pracy ŭ časopisach, ale nia zdoleŭ i pajechaŭ pracavać u Asipovicki rajon zahadčykam internatu pry škole, nastaŭnikam etyki i psychalohii, paźniej dyrektaram škoły. Adtul jon dasyłaŭ artykuły i pjesy ŭ «Vožyk», «Krynicu». Jahonyja pjesy pačali stavić lalečnyja teatry. Narešcie praź niekatory čas Uładzimiera zaprasili pracavać u TIUH. Amal hod jon kožnyja vychodnyja jeździŭ da siamji ŭ viosku, viezučy torby z praduktami.
Hienadź Buraŭkin, paet i dyplamat
Hienadź Buraŭkin skončyŭ adździaleńnie žurnalistyki na fiłfaku ŭ 1959 h. Universytet, pavodle jaho pryznańnia, daŭ jamu družbu, čałaviečuju zahartoŭku i vyznačyŭ siamiejnaje žyćcio. Hady navučańnia paet pryhadvaje jak biednyja, ale ščaślivyja. Fiłfak adkryŭ śviet dla studentaŭ, daŭ žadanaje dałučeńnie da suśvietnaj kultury. Čas navučańnia prypaŭ na XX źjezd partyi i adlihu, tym bolš źmiastoŭnym i nasyčanym byŭ praces adukacyi. Na kursie sabralisia spres budučyja znakamitaści: Michaś Stralcoŭ, Ryhor Baradulin, a kursam raniej ci paźniej — Barys Sačanka, Janka Sipakoŭ, Ivan Čyhrynaŭ, Ivan Ptašnikaŭ, Anatol Viarcinski, Nił Hilevič. Svajo pakaleńnie Hienadź z honaram nazyvaje fiłfakaŭskim. Druhim vialikim ščaściem było pražyvańnie ŭ internacie. Jano davała biascenny vopyt žyćcia ź inšymi ludźmi i ich razumieńnia. U internacie Hienadź žyŭ razam z Ryhoram Baradulinym i Michasiom Stralcovym. Z Baradulinym, darečy, paźniej žyli ŭ adnym padjeździe, dyj ciapier padjezd Hienadzia Mikałajeviča «filalahičny»: paviercham vyšej ad jaho žyvie Juraś Bušlakoŭ.
Vincuk Viačorka, palityk
Čas navučańnia va ŭniversytecie Vincuka Viačorki prypaŭ na piaredadzień nacyjanalnaha adradžeńnia. Vincuk pastupaŭ na fiłfak užo nacyjanalna śviadomym, sam saboj jašče ŭ škole pačaŭ razmaŭlać i vieści dziońnik pa-biełarusku, za što ŭ dziońniku była zaŭvaha: «Zapołniaj dnievnik normalno!» Na fiłfaku pieršym časam jaho ździviła toje, što mała chto razmaŭlaje pa-biełarusku. Adnak potym sabrałasia dobraja kamanda z budučaha barda Sokałava-Vojuša, Aleny Anisim, jakija stvaryli niefarmalnaje abjadnańnie moładzi «Majstroŭnia». Ładzili kulturnickija viečaryny, na jakija źbiralisia poŭnyja zali. Z taho času viadomy Viačorkavy arhanizatarskija schilnaści što da hramadzkaj dziejnaści.
Aleś Paškievič, staršynia Sajuzu piśmieńnikaŭ
Staršynia Sajuzu piśmieńnikaŭ Biełarusi Aleś Paškievič miarkuje, što na fiłfak varta było iści chacia b dziela taho, kab znajści tam žonku, — jana vučyłasia z Alesiem u adnoj hrupie.
Iosif Kučynski, pałkoŭnik milicyi
Iosif Kučynski — načalnik upraŭleńnia idealahičnaj raboty ŭ centralnym aparacie MVD. Jašče padčas navučańnia jaho vabili pahony, adnak na fiłfaku isnavała vajskovaja katedra, i naboru ŭ vojska paśla zakančeńnia nie było. Ale rekamendacyju, padpisanuju tady staršyniom kamsamołu BDU, a siońnia kiraŭnikom dziaržkantrolu Tozikam, Kučynski atrymaŭ u milicyju. Adpracavaŭ 20 hadoŭ u milicyi na transparcie, u milicejskaj akademii.
Poŭnaściu hety artykuł možna pračytać u papiarovaj i pdf-versii "Našaj Nivy"
Vieranika Dziadok