Łukašenka chvaliŭ narod u cełym i hramiŭ jaho pa častkach
Vyvaz dziaciej za miažu na azdaraŭleńnie budzie spynieny. Ministar Navumaŭ adkaža za fary hałavoj. Prahresujučyja chvaroby hramadztva prapanujecca lačyć raniejšymi metadami.
Kali b nie najaŭnaść na trybunie novych kiraŭnikoŭ pałataŭ, možna było padumać, što pa televizary pakazvajuć zapis inaŭhuracyjnaje pramovy Alaksandra Łukašenki 2001 h., a nie cyrymoniju padpisańnia vynikaŭ referendumu. Inšy raz paŭtaralisia nia prosta tezy, a i kankretnyja ŭkazańni ŭradu: da prykładu, źmienšyć kolkaść licenzavanych vidaŭ dziejnaści, kab pradprymalniki «mahli adciahnuć z rynku biespracoŭja paru dziasiatkaŭ tysiač čałaviek».
Z novaha — A.Łukašenka asabista vyznačyŭ, kolki kiraŭnikoŭ parlamenckich kamisij musiać być ź jakoha rehijonu, zabaraniŭ deputatam stvarać frakcyi i hrupy i vyklikać ministraŭ na spravazdaču.
Deputaty z nervovym zachapleńniem na tvarach kivali ŭ telekamery. Atmasferu ŭ Domie ŭradu nie nazavieš pryjaznaj. Lidzija Jarmošyna ŭ časie pieršaha pasiadžeńnia pałaty pradstaŭnikoŭ dvojčy nazvała jaje zamiest «pałaty priedstavitielej» «pałatoj priestuplenij».
Jašče z novaha: razam z zabaronaj usynaŭleńnia za miažu, A.Łukašenka zahadaŭ spynić «raz i nazaŭždy» arhanizavany vyvaz čarnobylskich dziaciej na azdaraŭleńnie, bo małyja adtul viartajucca zaražanymi «spažyviectvam». Čarnobylskija fondy čakajuć ciažkija časy. A dzieciam hodzie spadziavacca pabačyć, jak žyviecca prostamu čałavieku i jak pracuje ŭłada na zachad ad Buhu.
Taksama ŭpieršyniu A.Łukašenka zabiŭ u zvon nakont napłyvu imihrantaŭ z Uschodu. Da nas «pryjaždžaje aby-chto», i nielha «dapuścić źmieny ŭ demahrafičnaj sytuacyi». «Heta nie nacyjanalizm, ale my musim pryniać miery».
Łukašenka chvaliŭ narod jak cełaje za «volu i śviadomaść» i adnačasova hramiŭ jaho pa častkach. Jon abrynuŭsia na paŭpjanych santechnikaŭ, što «pieratvaryli ŽESy ŭ nažyvu». Handlaroŭ jon nazvaŭ «tarhašami». Pierapała dziaržaŭnym budaŭničym arhanizacyjam, jakija «abureli» tak, što «tolki prezydent moža imi kiravać» i «ŭčora musiŭ nakiravać načalnika słužby achovy prezydenta na adnu takuju budoŭlu», bo takoha razboju nie było navat u saviecki čas, «kali my byli razbeščany» hrašyma.
Jon aburaŭsia płatnaściu medycynskich pasłuh, nie ŭdakładniajučy, što jana była ŭviedziena im samim. Jon taksama raskrytykavaŭ «knižnych ekanamistaŭ»: rynak nia źnizić ceny na žytło, što padtrymlivajucca «zhovaram budaŭnikoŭ i ryełteraŭ». «Vykaranić biespradzieł z cenami na kvatery! Za parušeńni pad sud! Tolki dziaržaŭnaja vola moža zrabić žytło dastupnym!» — zajaviŭ A.Łukašenka.
A.Łukašenka adkinuŭ mahčymaść viartańnia da dziaržaŭnaha raźmierkavańnia kvateraŭ, ale daŭ zahad źmianić systemu lhotnaha kredytavańnia. «Dadatkovyja miery pa lhotnym kredytavańni» prymajucca za čas prezydentcva A.Łukašenki ŭ piaty raz. Pry hetym ceny na kvatery rastuć, a jakasnaje žytło zastajecca niedastupnym bolšaści hramadzianaŭ.
Prezydent u čarhovy raz zahadaŭ pamahčy siemjam z trojniami, spynić praktyku «abviesu i abščotu» na bazarach, a taksama palepšyć školnaje charčavańnie, bo byŭ užo vypadak, kali «dziaŭčynka ad hoładu pačała spažyvać svaje ŭnutranyja orhany».
Jon abrynuŭsia na rabotnikaŭ pramysłovaści, dzie panujuć kradziažy i chałtura, u vyniku čaho paŭsiudna dačy pafarbavanyja ŭ kolery MAZaŭ i BiełAZaŭ. Daŭ jon dychtu i damam-internatam: tolki 20% hadavancaŭ dobra adaptujucca da žyćcia. Astatnija ŭ pieršy ž hod paśla vychadu ŭ žyćcio robiacca abo achviarami, abo złačyncami.
Pradstaŭnikam demakratyčnaje apazycyi hetym razam dastałosia najmienš. A.Łukašenka prosta znoŭ paraŭnaŭ ich z fašysckimi prychvaśniami. «Haniebny amerykanski Akt pra demakratyju musić być admienieny, inačaj apazycyi niama na što raźličvać», — skazaŭ jon. Jon zaklikaŭ apazycyju da raźmiežavańnia, pryznańnia pazytyŭnych dasiahnieńniaŭ u žyćci hramadztva, asudžeńnia sankcyj suprać Biełarusi.
Našmat bolš žorstka jon raskrytykavaŭ taksama nastaŭnikaŭ, što arhanizavali systemu paboraŭ u škołach, i vykładčykaŭ VNU, jakija nibyta masava ździrajuć hrošy za dobryja adznaki na ekzamenach, nia hrebujučy navat seksualnymi damahańniami da studentak.
Ad ŁTP było zapatrabavana samaakupnaści. Baćkoŭ, jakija kidajuć dziaciej — kolkaść takich vypadkaŭ «kalasalna» vyrasła — buduć zapratorvać na prymusovyja raboty. Tudy ž jon zapatrabavaŭ vypraŭlać i klijentaŭ vyćviareźnikaŭ. Usie hetyja źjavy jon zahadaŭ «vyčyščać i vypalvać kalonym žalezam».
Kraina ryzykuje pieratvarycca ŭ vializny pracoŭny lahier, dzie adny, pakaranyja, buduć prymusova pracavać, a druhija, achoŭniki — prymušać ich da pracy, pra stupień efektyŭnaści jakoj možna zdahadacca.
Badaj, nikoli raniej A.Łukašenka nie pryznavaŭ tak adkryta najaŭnaści žudkich sacyjalnych i maralnych chvarobaŭ u hramadztvie i taho faktu, što jany imkliva prahresavali dziesiać apošnich hadoŭ, ale zahadaŭ lačyć ich raniejšymi metadami. Na jahonuju dumku, vinavataja nie systema, a kankretnyja vykanaŭcy.
Naprykład, ministar unutranych spravaŭ Uładzimier Navumaŭ, jakoha, musić, čakaje adstaŭka. U jakaści viny jamu zaličanyja hibiel milicyjanta i navat zahad ab abaviazkovaj jaździe z uklučanymi farami.
Mikoła Buhaj