Z usioj krainy
Mova i «jazyk»
U Viciebskaj vobłaści pa-biełarusku navučajecca 34 711 vučniaŭ abo 21,5% ad usiaje kolkaści vučniaŭ u vobłaści. Jość try biełaruskamoŭnyja himnazii — u Połacku, Hłybokim i Viciebsku. Pa-raniejšamu niama nivodnaj biełaruskamoŭnaj škoły ŭ rodnym horadzie Karatkieviča Voršy. Ciapier peŭnyja nadziei na źmieny ŭskładajucca na toje, što byłaja kiraŭnica školnaje adukacyi ŭ horadzie stała deputatkaj PPNS i ciapier musić pakinuć svaju pasadu dy źjechać na novuju pracu ŭ Miensk.
Sahravaje viera
Da 1 kastryčnika pavinny byli prakłaści ciepłatrasu ad Aršanskaj CEC da centru horadu. Ale, jak časta ŭ nas zdarajecca, pierad pracaŭnikami «Viciebskabłciepłabudu» paŭstała šmat prablem: to, kapajučy tranšeju, natknucca na vodapravodnyja truby, nie paznačanyja na schiemach, to začepiać roznyja kabeli abo adkapajuć čałaviečyja pareštki (akramia mohilniku XVI—XVII st., znajšli asobna dva čarapy 40-hadovaha mužyny dy dziciaci, jakija śledčyja prakuratury datavali 1930—1940-mi hadami). Pačynalisia ŭzhadnieńni dy łatańnie prabitych kaŭšom ekskavatara trubaŭ. A čas išoŭ. Narešcie, nie chapiła «niejkich» 100 metraŭ trubaŭ vialikaha dyjametru. Pakul ich zamaŭlali dy pryvozili z Kalininhradu, prajšoŭ nie adzin tydzień. I voś zusim «niečakana» vypaŭ śnieh dy ŭdaryli marazy. Tranšei ž tak i zastalisia niezasypanymi. Najbolš paciarpieli ad hetkaj niadbajnaści j biezhaspadarčaści słužki raźmieščanaha pobač ź ciepłatrasaj kaściołu Śv.Jazepa. Jany dy vierniki ŭžo pryzvyčailisia ŭ apošnija hady sustrakać Kalady ŭ nieacieplenym budynku kaściołu, bo niekalki hadoŭ idzie jaho rekanstrukcyja. Ale raniej možna było sahrecca ŭ prybudovie da kaściołu, dzie mieścicca klaštar. Ciapier ža i tut ściudziona.
Jaŭhien Žarnasiek, Vorša
Baranavicki lod
U Baranavičach budzie pabudavany ladovy pałac. Hetak vyrašyŭ Bieraściejski abłvykankam i pieraličyŭ u haradzki biudžet 50 młn rubloŭ na raspracoŭku prajektu. Dla baranavickich uładaŭ heta było niespadziavankaj — dahetul nieviadoma, dzie toj pałac stanie. Akramia ŭłasna ladovaha pałacu zahadana budavać pobač inšyja spartovyja placoŭki, restaracyju i kinazalu.
Pra «chakiejnuju placoŭku» zapytałasia ŭ Łukašenki niejkaja studentka padčas adkryćcia Baranavickaha ŭniversytetu. Toj paabiacaŭ, što ŭ Baranavičach lod budzie, i voś abiacanka pačała spraŭdžvacca.
Rusłan Raviaka, Baranavičy
Usie rehijanalnyja naviny čytajcie ŭ hazecie "Naša Niva"