Svaje suprać svaich
Staršy aperatyŭnik MUS i asabisty kiroŭca Šejmana sudzicca z padpałkoŭnikam MUS u zapasie i jahonym synam — byłym aperatyŭnikam i aficeram milicyi.
Na pieršaje sudovaje pasiadžeńnie ŭ piatnicu padpałkoŭnik MUS u adstaŭcy Vasil Pałunin pryjšoŭ sa spartovym ryštunkam — ranicaju jon hulaŭ u valejboł z pradstaŭnikami HUUS, KDB i prakuratury. Adzin hulec ź jahonaj kamandy — pieršy namieśnik načalnika HUUS Alaksandar Zyl — kaliści paspryjaŭ pieravodu Pałunina-małodšaha z rajonnaha UUS u Miensk. Adnak u hetym vypadku suviazi nie dapamahli — na Pałuninych zaviedziena kryminalnaja sprava pa č.2 art.208 (vymahańnie, ździejśnienaje hrupaj asob pa papiaredniaj zmovie). Veteranu milicyi i jahonamu synu Ivanu, byłomu aperatyŭniku, pahražaje termin źniavoleńnia ad troch da vaśmi hod. U jakaści paciarpiełaha vystupaje Alaksandar Bohdan – staršy aperatyŭny supracoŭnik pa asabliva važnych spravach MUS i asabisty kiroŭca Šejmana.
Pavodle vysnovy śledztva, Pałunin-małodšy, kali pracavaŭ u haradzkim UUS pa linii niezakonnaha abarotu narkotykaŭ, 28 žniŭnia minułaha hodu naŭmysna kinuŭsia pad aŭtamabil, kab «stvaryć umovy dla vymahańnia hrošaj», a potym razam sa svaim baćkam šantažavaŭ baćku vadziciela aŭto — A.Bohdana. Toj źviarnuŭsia ŭ KDB, supracoŭniki jakoha i zatrymali Pałunina-starejšaha adrazu paśla pieradačy 1000 dalaraŭ.
Słuchańni pa hetaj spravie raspačalisia ŭ piatnicu, u paniadziełak i aŭtorak pradoŭžylisia. Za amal 20 hadzin sud dapytaŭ śviedakaŭ — byłych kaleh i načalnikaŭ Pałunina-mał., daišnikaŭ, daktaroŭ dy niepasrednych udzielnikaŭ padziej.
Pieršym na dopyt sudździa Jeśman vyklikaŭ Pałunina-starejšaha. Veteran milicyi vidavočna chvalavaŭsia — moža, tamu adkazvaŭ niaŭpeŭniena i emacyjna: hrošaj nia braŭ i nia viedaje, jakim čynam jany trapili da jaho, adnak z Bohdanam-starejšym sustrakaŭsia, bo «kiravaŭsia baćkoŭskimi pačućciami».
Poŭny varyjant artukułu čytajcie ŭ hazecie "Naša Niva"
Siarhiej Budkin