Vočy revalucyi
«Kanał sumlennych navin» bje rekordy ŭkrainskich telerejtynhaŭ
Apošnija try tydni va Ŭkrainie bieśpierapynna pracujuć miljony televizaraŭ. Zazirni ŭ luby ekran — i ŭbačyš u kutku ličbu «5», lahatyp «Piataha kanału». Kab nia jon, chto viedaje, ci była b «Aranžavaja revalucyja» paśpiachovaj.
Kab trapić u budynak «Piataha kanału», treba pierajści pa piešachodnym moście na Rybalski vostraŭ, industryjalny rajon, što mieścicca na atočanaj Dniaprom paŭvyśpie. Ažno nia vierycca, što tut, na 11-m paviersie šeraha hmachu, raźmieščanaha na terytoryi zavodu «Leninskaja kuźnia», kujuć revalucyju.
Hanna Haraženka, kiraŭnik mižnarodnaha adździełu, śćviardžaje: «Nam časta zakidajuć, što «Piaty kanał» zrabiŭ revalucyju va Ŭkrainie, ludzi Janukoviča nazyvajuć nas destruktyŭnym elementam. Ale na «Piatym kanale» pracujuć tolki 9 žurnalistaŭ, jakija raskazvajuć pra ŭnutranyja padziei, 4 «mižnarodniki», jakich ciapier taksama kinuli im na dapamohu, a taksama niekalki viadučych. Ci mahčyma zrabić revalucyju takimi małymi siłami? Kali b narodny nastroj nie dasiahnuŭ punktu kipieńnia, nijakija medyi nia vyvieli b stolki ludziej na vulicy. My prosta aśviatlajem padziei».
«Naturalna, u našaj pracy było šmat niebiaśpiek, — kaža Hanna, — asabliva, kali žurnalisty vyjaždžali na ŭschod». Ułada hrebliva stavicca da «Piataha kanału», — ličyć jana. «Adzin raz našaj zdymačnaj hrupie dazvolili prajści ŭ Kabmin. Nu voś, padumała ja, narešcie ŭłady vyrašyli z nami parazmaŭlać! Ale vyjaviłasia, što nas puścili tolki dla taho, kab my mahli pravieści za saboju, niby «pryčep», zdymačnuju hrupu kanału RTR, a taksama vyvieści jaje z budynku, ačeplenaha demanstrantami. Nas prosta vykarystali».
Ekstremalnyja ŭmovy pracy zrabili z žurnalistaŭ sapraŭdnuju kamandu.
«Nas zbliziła zabastoŭka ŭ kastryčniku, kali nas namahalisia zakryć, — haładali i kiraŭniki, i prybiralščycy. 190 hadzin prasiadzieli tut, u faje, na hetaj kanapie».
Poŭny varyjant artukułu čytajcie ŭ hazecie "Naša Niva"
Aleś Kudrycki