Ukraina stanie parlamenckaj
Aranžavaja revalucyja płaŭna pierajšła ŭ evalucyju. Vykanany jaje apošnija patrabavańni. U sieradu ŭkrainskaja Viarchoŭnaja Rada pakietam zaćvierdziła, a Leanid Kučma prosta ŭ zali pasiadžeńniaŭ padpisaŭ źmieny ŭ Kanstytucyju, novy skład Centravybarkamu, źmieny ŭ zakon pra vybary prezydenta. Adnačasova była pryniataja adstaŭka Hienprakurora. Z vosieni 2005 h. Ukraina pieratvorycca ŭ parlamencka-prezydenckuju respubliku, u jakoj urad budzie pryznačacca parlamenckaj bolšaściu. Straciŭ pasadu staršynia Centravybarkamu Siarhiej Kivałaŭ.
Za «pakiet» prahałasavali 402 deputaty z 450-ci. Suprać była tolki radykalnaja apazycyja z frakcyi Julii Cimašenki. Nie hałasavaŭ sam Viktar Juščanka — mierkavany pieramožca pierahałasavańnia, pryznačanaha na 26 śniežnia. Heta jahonyja paŭnamoctvy buduć abmiežavanyja. Usia jahonaja frakcyja «Naša Ŭkraina» hałasavała «za», i heta Juščanka pierakanaŭ ich u niepaźbiežnaści abmiežavańnia prezydenckaje ŭłady.
Rada atrymaje prava pryznačać pa prapanovie prezydenta premjera, ministraŭ abarony, zamiežnych spravaŭ. Kandydatury inšych ministraŭ prapanuje premjer. Hienprakuror naznačajecca sa zhody parlamentu, Centravybarkam — samim parlamentam. Prava prezydenta raspuskać Viarchoŭnuju Radu mocna abmiažoŭvajecca.
Termin paŭnamoctvaŭ parlamentu, pačynajučy ad nastupnaha sklikańnia, pavialičycca da piaci hadoŭ. Abiracca parlament budzie pavodle praparcyjnaj systemy ad partyj i blokaŭ.
Kanstytucyjny sud napałovu pryznačajuć prezydent i parlament.
Dla niedapuščeńnia vybarčych falsyfikacyj kolkaść «admacavalnych talonaŭ», pa jakich mohuć hałasavać tyja, chto nia maje mahčymaści pryjści ŭ dzień vybaraŭ na ŭčastak, abmiažoŭvajecca limitam 0,5% ad ahulnaje kolkaści vybarcaŭ na ŭčastku, a nie 4, jak raniej. Aproč taho, u pašparcie «admacavanaha» budzie stavicca adpaviednaja paznaka, jakuju na vybarčym učastku musiać «pahasić». Hałasavańnie doma dazvalajecca tolki invalidam, jakija nia mohuć chadzić, pry najaŭnaści adpaviednaj zajavy.
Kidajecca ŭ vočy, što ŭsie hetyja źmieny amal dakładna supadajuć z patrabavańniami biełaruskaje apazycyi.
Premjer Viktar Janukovič u «pasiadžeńni vialikaha kampramisu» ŭdziełu nia braŭ i nazvaŭ jaho rašeńni «niezakonnymi». Jahonyja byłyja paplečniki jaho pakinuli, i novym kiraŭnikom «danieckaha» vybarčaha štabu staŭ Taras Čarnavił, syn lehiendarnaha lidera Narodnaha Ruchu Viačasłava Čarnaviła.
Aleh Rybačuk, deputat «Našaj Ukrainy», ličyć padziei sierady pieramohaj svajho kandydata. A Janukovič? «Heta ciapier rehijanalny lider», — miarkuje našaŭkrainiec. Apazycyja mieła ŭ sieradu ŭviečary abvieścić ab spynieńni mitynhu-marafonu na Majdanie Niezaležnaści.
Siarhiej Mikulevič