Chronika
16 lutaha Valeru Levanieŭskamu administracyja Mahiloŭskaj kalonii №19 admoviłasia zamianić mieru pakarańnia z turemnaha źniavoleńnia na papraŭčyja raboty: jon ličycca «złosnym parušalnikam dyscypliny». 28 lutaha jaho pieraviali ŭ kaloniju №22 u pasiołku Damanava Ivacevickaha rajonu, dzie jaho ŭtrymlivali raniej.
Słucki haradzki sud 16 lutaha adnaviŭ na pracy ekanamista-revizora AAT «Słucak-Modul», aktyvista REP Usievałada Ściacova, niezakonna zvolnienaha 11 kastryčnika 2004 h.
Supracoŭniki padatkovaj inspekcyi 22 lutaha praviarali ofis Źmitra Sałaŭjova z Navapołacku: ich cikaviła, ci nie akazvaje pravaabaronca płatnych jurydyčnych pasłuh.
23 lutaha Miniust vynies aficyjnaje papiaredžańnie na adras TBM: arhanizacyju vinavaciać u tym, što šerah supołak majuć jurydyčnyja adrasy ŭ žyłych pamiaškańniach.
Haradzienski abłasny haspadarčy sud 23 lutaha pastanaviŭ vysielić z pamiaškańniaŭ abłasnuju, a taksama Leninskuju rajonnuju Rady BNF ciaham dziesiaci dzion. 8 lutaha haspadarčy sud pastaviŭ vysielić z taho ž budynku haradzkuju i abłasnuju arhanizacyi PKB.
Z zajavaj da prakurora Miensku 23 lutaha źviarnuŭsia žychar Viciebsku Michał Ziemlakoŭ. Jon patrabuje viarnuć majomaść, kanfiskavanuju ŭ 2001 h. u jahonaha syna Jurasia, siabra patryjatyčnaj arhanizacyi «Kraj».
23 lutaha Mienskaja haradzkaja prakuratura na miesiac padoŭžyła termin śledztva pa kryminalnaj spravie ab abvinavačvańni namieśnika staršyni BCHK Hary Pahaniajły ŭ paklopie na prezydenta.
Sud Centralnaha rajonu Miensku 23 lutaha adchiliŭ skarhu advakata Antona Filimonava — syna zabitaj u kastryčniku žurnalistki Vieraniki Čarkasavaj; advakat damahaŭsia admieny rašeńnia mienskaj prakuratury ab pryznačeńni chłopcu psychijatryčnaj ekspertyzy. Sudovaje pasiadžeńnie było zakrytym i doŭžyłasia kala saraka chvilin.
Aktyvist prafsajuzu REPAM Jury Kurhanski z Horadni 23 lutaha atrymaŭ ad sudu papiaredžańnie i štraf u try bazavyja vieličyni (72 tys.) za chadajnictvy pra advod sudździ: sud paličyŭ, što Kurhanski zaciahvaje praces. Prafsajuzny aktyvist abskardžvaje rašeńnie, pavodle jakoha jaho aštrafavali na 5 b.v. za raspaŭsiud «niezarehistravanaha vydańnia» — prafsajuznaha biuleteniu.
24 lutaha CVK paćvierdziła rašeńnie akruhovaj kamisii Haradzienskaj Centralnaj vybarčaj akruhi №52 pra admovu ŭ rehistracyi kandydatami ŭ deputaty Siarhieju Skrabcu i namieśniku staršyni AHP Jarasłavu Ramančuku. 28 rašeńnie nakont S.Skrabca paćvierdziŭ Viarchoŭny sud. 27 lutaha Skrabca zatrymali ŭ Horadni, a 28 asudzili na 200 b.v. (4 młn 800 tys.), abvinavaciŭšy ŭ arhanizacyi mitynhu haradzienskich pradprymalnikaŭ 10 lutaha.
Administracyja UP «Los» (h.Barań Aršanskaha rajonu) 24 lutaha paviedamiła aktyvistu Biełaruskaha kanhresu niezaležnych prafsajuzaŭ Alaksandru Kurnosienku pra zvalnieńnie ŭ suviazi z zakančeńniem kantraktu. Dahetul jon nia mieŭ spahnańniaŭ pa pracy.
Siarhieja Antončyka 24 lutaha sudździa Aksana Relava z sudu Savieckaha rajonu Miensku aštrafavała na 150 b.v. (3 młn 600 tys.) za parušeńnie hramadzkaha paradku ŭ časie praviadzieńnia masavaha mierapryjemstva na pryvatnaj kvatery.
Staršyniu PBNF Vincuka Viačorku 24 lutaha dapytali ŭ jakaści śviedki pa kryminalnaj spravie pa fakcie pres-kanferencyi 15 kastryčnika 2004 h., jakuju davali lidery kaalicyi «5+».
Prakuratura Centralnaha rajonu Miensku raspačała 25 lutaha kryminalnyja spravy na eks-kandydataŭ u deputaty Alaksandra Cynkieviča (AHP) i Aleha Voŭčaka (BSDH): ich vinavaciać u paklopie na prezydenta, raspaŭsiudžanym praź pieradvybarčyja ŭlotki.
Žanočaje hramadzkaje abjadnańnie «Lubava» z Horak 25 lutaha atrymała papiaredžańnie ad Mahiloŭskaj abłasnoj upravy justycyi za toje, što jurydyčny adras arhanizacyi znachodzicca ŭ šmatkvaternym domie. Aktyvistki arhanizacyi ździŭlenyja, bo majuć juradras u pryvatnym domie, jaki maje dva asobnyja vychady, jak i praduhledžana zakonam.
25 lutaha ź Bieraściejskaj mytni zvolnili aktyvista BSDP (NH) Vasila Vaŭraniuka, jaki adpracavaŭ u mytnych orhanach 24 hady. Jon peŭny, što praz palityku.
Sud Čyhunačnaha rajonu Homielu 25 lutaha pastanaviŭ abmiežavać vyjezd za miežy Biełarusi Julii Marčancy — dačce pradprymalnicy Taciany Marčanki, jakaja balatavałasia ŭ parlament ad apazycyi. Paśla vybaraŭ pryvatnuju drukarniu, dzie Ju.Marčanka była dyrektarkaj, začynili, na jaje samu nakłali štraf bolš za 40 młn rub. Z hetaj pryčyny j pryniataje abmiežavańnie.
Ihara Palčykava zatrymali ŭ Miensku padčas razdačy ŭlotak 25 lutaha i ŭ toj samy dzień asudzili na 30 b.v.
U Miensku 25 lutaha padčas razdačy ŭlotak byli zatrymany studentki Kryścina Słušanskaja j Irma Kaŭfman. Da 28 lutaha ich trymali ŭ pastarunku, a potym jašče asudzili na 20 b.v. kožnuju.
27 lutaha ŭ Horadni ludzi ŭ cyvilnym kanfiskavali z drukarni biez pratakołu ŭvieś nakład ulotak (2200 as.) kandydata ŭ deputaty Siarhieja Antusieviča (PBNF). S.Antusievič peŭny, što heta praz žadańnie sarvać jahonuju vybarčuju kampaniju.
U Rečycy 27 lutaha zatrymali aktyvista abjadnańnia pradprymalnikaŭ «Perspektyva» Leanida Nievara. Milicyjanty aryštavali jaho va ŭłasnym mikraaŭtobusie. Kali žonka Nievara pasprabavała klikać na dapamohu, jaho samoha abvinavacili ŭ zakliku da masavych biesparadkaŭ. 28 lutaha jaho vypuścili z adździaleńnia pad padpisku ab niavyjeździe.
Pinskaja rehijanalnaja drukarnia 28 lutaha admoviłasia drukavać niedziaržaŭnuju hazetu «Miascovy čas».
Sud Leninskaha rajonu Horadni 28 lutaha asudziŭ namieśnika staršyni RHA «Perspektyva» Źmitra Ivanoŭskaha na 15 sutak za arhanizacyju niesankcyjanavanaha mitynhu pradprymalnikaŭ 10 lutaha.
AŠ