Naviny ścisła
Viasna z chaładami
Viasna pryjšła z chaładami: marazy na francuskaj Ryŭjery, u Barselonie ŭpieršyniu za 20 hadoŭ vypaŭ śnieh. Mierznuć navat biełarusy ŭ Taronta, unačy tam minus 12. U Biełarusi — chaładniej. U noč na 2 sakavika miescami słupok termometra siahaŭ 25 hradusaŭ, udzień u sieradu ŭ Miensku było –9. Hod tamu ŭ stalicy było minus adzin. Pavodle nazirańniaŭ metearolahaŭ, heta samy chałodny pačatak viasny za 20 hadoŭ, z 1987-ha. Medyki z nastupleńniem viasny bolšuju niebiaśpieku bačać u źmienie poraŭ hodu, kali arhanizm padviarhajecca stresu, a čałaviek adčuvaje apatyju i stanovicca bolš razdražnialnym. Tamu, niahledziačy na nadvorje za aknom, treba štučna stvarać sabie viasnovy nastroj.
Zatrymanyja zabojcy Hanhadze
Hieneralny prakuror Ukrainy Śviatasłaŭ Piskun abvieściŭ u sieradu pra zatrymańnie dvuch niepasrednych vykanaŭcaŭ zabojstva žurnalista Hieorhija Hanhadze. Śledztva maje peŭnaść, što jany dziejničali śviadoma. Treci abvinavačany, były kiraŭnik Słužby zamiežnaje vyviedki, abvieščany ŭ mižnarodny vyšuk. Tym časam nie paćvierdziłasia aŭtorkavaja infarmacyja pra toje, što była znojdziena hałava žurnalista. Naziralniki vykazvajuć mierkavańni, što pa hetaj spravie moža być aryštavany eks-prezydent krainy Leanid Kučma.
Fars u Horadni
Viarchoŭny sud nie zadavoliŭ skarhi niezarehistravanych kandydataŭ u deputaty pałaty pradstaŭnikoŭ pa Haradzienskaj Centralnaj vybarčaj akruzie №52 Jarasłava Ramančuka i Siarhieja Skrabca. «Hrodzienskaja praŭda» admoviłasia drukavać pieradvybarčuju prahramu hienerała Valera Frałova. Pradstaŭniki specsłužbaŭ skanfiskavali tyraž posteraŭ Siarhieja Antusieviča. U takoj atmasfery ŭłady prapichvajuć uhodnaha sabie kandydata.
Ad Pahaniajły adčapilisia
Kryminalnaja sprava suprać namieśnika staršyni BCHK Hary Pahaniajły za paklop na prezydenta spynienaja 28 lutaha za adsutnaściu składu złačynstva.
Mininfarmacyi vučyć «lubić biełaruskaje»
Ministerstva infarmacyi vyniesła papiaredžańnie trom FM-stancyjam, jakija nie napaŭniajuć eter 75% biełaruskaj muzyki, — «Alfa Radyjo», «Radyjo Roks» i «Pilot FM». U studzieni analahičnyja papiaredžańni atrymali «Hit FM», «Novaje radyjo» i «Junistar».
Trusa łavili ŭsim horadam
U Barnaule (Ałtajski kraj, Rasieja) učyniena dziorzkaje złačynstva. Nieviadomy na vulicy napaŭ na žančynu, što niesła ŭ rukach dekaratyŭnaha trusa, skraŭ źviarka i na aŭtamabili «Tajota» źnik ź miesca złačynstva. Žančyna nieadkładna źviarnułasia ŭ milicyju, aryjenciroŭku pieradali na ŭsie pasty milicyi i praz paŭhadziny złamyśnik byŭ złoŭleny. Žyviolinku žyvuju i zdarovuju viarnuli haspadyni.
AH, svaboda.org, afn.by