«Žyrafy» rektara Kazulina
U asiarodkach niezaležnaha hramadztva praciahvajuć abmiarkoŭvać pierachod u apazycyju eks-rektara BDU Alaksandra Kazulina. U Redakcyju «NN» pryjšli studentka 4 kursu fiłfaku i student 3 kursu histfaku BDU — udzielniki studenckaha ruchu, jakija zmahalisia suprać abmiežavańnia pravoŭ studentaŭ u kazulinskija časy. Jany paličyli patrebnym danieści da čytačoŭ «NN» svajo bačańnie pracesaŭ, što adbyvalisia ŭ BDU za Kazulinym.
— Nas uschvalavała toje, što adbyvałasia, kampanija ŭ padtrymku Kazulina ŭ asobnych ŚMI, bo kazulinskija časy ŭ BDU vyznačalisia rusifikacyjaj, uzmacnieńniem kantrolu i paŭfeadalnymi paradkami. Kazulin stvaryŭ słužbu achovy. Pahladzicie na zdarovych dužych mužykoŭ, što ścierahuć spakoj navuki la kožnaha słupa. Ich šmat: «čałaviek prezydenta» Kazulin stvaryŭ słužbu dla kantrolu za studenctvam. I takoj słužby ŭ inšych universytetach niama.
U hetym rečyščy išło i ŭviadzieńnie elektronnych studenckich biletaŭ. Praź ich našmat praściej kantralavać pieramiaščeńnie i pavodziny studentaŭ, adsočvać elektronnuju poštu (studentam prapanavana karystacca Internetam i poštaj praz universytecki dostup na asnovie kartkavaj systemy). U 2003 h. hetaje novaŭviadzieńnie ŭdałosia sarvać, choć ciapier jaho ŭsio adno ŭkaraniajuć.
BDU byŭ svojeasablivym feadalnym uładańniem rektara. Jon i pavodziŭ siabie adpaviedna, ładziŭšy z kožnym hodam usio bolš šykoŭnyja festy i śviaty. Naprykład, śviata Pieršakurśnika ŭ akvaparku z prybyćciom rektara na viertalocie, śpievy rasiejskich zorak. Adnačasova hałoŭnaja VNU krainy nie znachodziła hrošaj na apłatu pasłuh internet-pravajdera i siadzieła bieź Internetu. Adbyvałasia i kamercyjalizacyja ŭniversytetu. Z hodu ŭ hod bolš stanaviłasia płatnych pasłuh (naprykład, u biblijatekach). Ad niekatorych ź ich admovicca było niemahčyma. Naprykład, byŭ vynajdzieny sposab štohadovaha abnaŭleńnia elektronnaha studenckaha bileta.
— Ci mieŭ Kazulin padtrymku siarod studenctva?
— Inśpiravanuju administracyjaj — na sustrečach sa studenckim «aktyvam». U toj ža čas jon treciravaŭ tych, chto pytaŭsia pa-biełarusku. Navat na apošniaj sustrečy (17 listapada 2003) jon razmaŭlaŭ ź biełaruskamoŭnymi studentami praź pierakładčycu. Tady jon, znervavany ci što, nia vytrymaŭ pytańniaŭ šerahu zvyčajnych studentaŭ, jakim udałosia pratačycca na mierapryjemstva, i, možna skazać, abraziŭ ich, nazvaŭ «žyrafami». Tyja zapatrabavali prabačeńniaŭ, ale Kazulin pierad «žyrafami» vybačacca nia staŭ. Tady studenty (chto nie naležaŭ da «aktyvu») pakinuli zalu.
Poŭny varyjant čytajcie ŭ papiarovaj i pdf-versii hazety "Naša Niva"
Hutaryŭ Siarhiej Rak