Z usioj krainy
Archieolahi ŭ Słucku
Słucak praciahvaje rychtavacca da «Dažynak». Ciapier horad vyhladaje niby paśla vajny — usio pieraryta. Šmat ziemlanych rabot pravodzicca ŭ histaryčnych miescach.
Na pasiadžeńni štabu pa praviadzieńni śviata vynosiłasia prapanova, kab u takich vypadkach u rabotach brali ŭdzieł specyjalisty pa archiealohii, ale na spravie vychodzić inakš. I šmat znachodak, mahčyma, tak i nia dojdzie da vučonych dy specyjalistaŭ.
Tak, naprykład, adzin rabočy apaviadaŭ, što ŭ chodzie raskopak natrapili na kolišniaje miesca znachodžańnia majsterni. Ale reštki skuranych dy žaleznych vyrabaŭ nie padalisia rabočym kaštoŭnymi. U vyniku znachodka była zakapana nazad u hlebu. Hety vypadak byŭ apisany ŭ miascovaj hazecie «Infakurjer».
Šmat narodu ciapieraka ščyruje na raskopkach rečyšča Słučy. Chtości zdabyvaje dobruju hlebu dla rasady, a chtości maryć znajści radziviłaŭski skarb. Adnamu chłopcu paščaściła znajści staražytnuju siarebranuju manetu. Jaki los čakaje hetuju znachodku? Spačatku chłopiec chacieŭ jaje pradać, ale ciapier planuje pierapłavić jaje na łancuh ci piarścionak.
Pryhadvajecca vypadak, pačuty mnoju ŭ siamidziasiatyja ad adnaho syna vajskoŭca. Pry hrabarskich rabotach sałdaty budbatu znajšli draŭlanuju skryniu. U joj siarod niekatorych sparachniełych rečaŭ znachodziłasia niekalki słuckich pajasoŭ. Tady isnavała palityka pasyłać słužyć u vojska dalej ad radzimy. Mahčyma, tyja chłopcy i nia viedali pra kaštoŭnaść svajoj znachodki, tamu jany znajšli joj užyvańnie, zychodziačy sa svaich patreb, — razrezali pajasy na anučy dla botaŭ. Kali heta vyjavili kamandziry, cełych znachodak nie zastałosia. Kavałki pazabirali aficery sabie na suveniry.
Voś i ciapier ci zachoča jaki čynoŭnik prypyniać raboty dy vybivacca z hrafiku ŭ vypadku jakoj znachodki? Pry raskopkach pad pjedestał dla pomnika Leninu byli znojdzieny čałaviečyja čarapy. Ab znachodcy paviedamili nie budaŭniki, a chłapčuki, jakija hulali na miescy raskopak.
Siaržuk Kut, Słucak
Strakaty Pieršamaj u Babrujsku
Ranicaj 1 maja na hałoŭnaj płoščy horadu adbyŭsia mitynh pradstaŭnikoŭ pracoŭnych kalektyvaŭ z uskładańniem kvietak da pomnika pravadyru. Paśla abiedu pravasłaŭnyja vierniki ź liku mitynhoŭcaŭ mahli dałučycca da chrosnaha chodu na šlachu da kaplicy ŭ honar ikony Božaj maci «Ŭsich smutkujučych radaść» na Mienskich mohiłkach. U svoj čas budaŭnictva kaplicy było zabaroniena byłym «čyrvonym meram» Uładzimieram Ramanoŭskim. Pobač u piku hetaj budoŭli za niejki miesiac uźniośsia pomnik savieckamu sałdatu na kani, što zabivaje pikaju źmieja. Pomnik u narodzie prazvali «kaniom Ramanoŭskaha».
Uviečary taho ž dnia ŭ Pałacy mastactvaŭ adbyŭsia mižkanfesijny vielikodny kancert, arhanizavany katalickaj parafijaj Babrujsku, dabračynnaj arhanizacyjaj «Krynica žyćcia» i rucham «One Way».
Milicyjaner-ptuškavod
U listapadzie Babrujskaja ptuškafabryka pierajšła ŭ pryvatnyja ruki. Haspadarom staŭ były supracoŭnik milicyi Levan Ahadžanian. Adnoj z umoŭ prodažu było zachavańnie kolkaści pracoŭnych miescaŭ. Ale za paŭhodu na fabrycy nia tolki nie skaracili nivodnaha čałavieka, ale i zabiaśpiečyli pracaj dadatkova jašče 110. Uzraśli i zarobki: siaredniaja zarpłata na pradpryjemstvie składaje 320 tysiač rubloŭ, a ŭ časy, kali ptuškafabryka była dziaržaŭnaj, ludzi atrymlivali zarpłatu 120—130 tysiač, pryčym čaściej za ŭsio jana vydavałasia naturaj — jajkami.
Nadzieja Lisoŭskaja, Babrujsk
Adnoŭleny «Zaklik»
Paśla trochhadovaha pierapynku adnaviŭsia vychad kaściukovickaha infarmacyjnaha biuleteniu «Zaklik», vydavanaha aktyvistami BNF. Vydańniu jašče daloka da viadučych hazet krainy, ale dla pravincyjnych Kaściukovič — heta niemałoje dasiahnieńnie.
Andrej Parchomienka, Kryčaŭ
Afrykanski futboł u Horkach
U Horkach adbyŭsia druhi mižnarodny turnir pa mini-futbole na Kubak Sadružnaści, zasnavany hod tamu ehipeckimi studentami. Sioleta ŭ turniry ŭziali ŭdzieł 20 kamandaŭ. U finalnym matčy kamanda zoainžynernaha fakultetu Biełaruskaj sielhasakademii vyjhrała pa penalci ŭ zbornaj nihieryjskich studentaŭ. Apošnija, niadaŭna pryjechaŭšy ŭ akademiju, arhanizavali futbolnuju kamandu, jakaja rehularna trenirujecca na stadyjonie BDSHA. Šmat chto ź nihieryjcaŭ raźličvaje trapić u biełaruskija futbolnyja kluby, dla čaho niadaŭna zhulali tavaryski matč u Mahilovie z klubam vyšejšaj lihi «Dniapro-Transmaš», sastupiŭšy 0:2.
Eduard Brokaraŭ, Horki
Usio jak zaŭsiody
Na pieršamajskim mitynhu ŭ horadzie nad Niomanam było ŭsich patrochu — ad pijanieraŭ da pensijaneraŭ. Pryciahvali ŭvahu pavietranyja baloniki, jakija kałychalisia nad natoŭpam. Čyrvony i zialony baloniki, najbolšyja pamieram, trymalisia na nitcy vyšej za inšyja.
Šmat było milicyi, jakaja ščylna abstupiła płošču Lenina i sačyła za pieramiaščeńniem ludziej. U centry jaje zacikaŭlenaści byli lidery miascovaj apazycyi. Deputat haradzkoha savietu Siarhiej Antusievič pažartavaŭ, što «biaz nas im i raboty nie było b».
Hučali pramovy. Kiraŭnik abłasnoj prafsajuznaj arhanizacyi radasna paviedamiŭ, što narod ciahniecca da svaich abaroncaŭ-prafsajuzaŭ, a jany razam ź dziaržorhanami pilna sočać za zachavańniem pracadaŭcam pravoŭ rabočaha ludu. Pradstaŭnik pracoŭnaj dynastyi raspavioŭ ab svaich dasiahnieńniach i padziakavaŭ uładzie za mahčymaść praciahvać zavodzkuju spravu dzieda i pradzieda. Čytaŭ rabočy z papierki, tamu źbivaŭsia, bo sustrakalisia nieznajomyja słovy, padabranyja nieviadomym śpičrajteram.
Hetym razam abyšlisia biaz šeścia kalon. Daśviedčanyja ludzi rastłumačyli, što rašeńnie ab pieršamajskim mitynhu było pryniataje ŭ apošniuju chvilinu. Ułada ŭsio vahałasia: śviatkavać ci nie? A raptam apazycyja vykinie jakoje kalenca?
Pahavaryli i razyšlisia. Z dynamika badziora hučali rasiejskamoŭnyja melodyi. Pa-rasiejsku pramaŭlali i vystupoŭcy. Usio jak zaŭsiody. Vidać, usie lepšyja siły buduć kinuty na arhanizacyju śviata
9-ha maja. Budzie bahata słovaŭ na adras veteranaŭ vajny, kupku jakich praviaduć pa hałoŭnych vulicach.
Anton Łabovič, Horadnia
Stalin pje za pieramohu
Vystava, prymierkavanaja da 60-hodździa Pieramohi, adkryłasia ŭ haradzkoj vystaŭnaj zali Voršy. Tut demanstrujucca žyvapis, hrafika dy skulptura z fondaŭ miascovaha muzejnaha kompleksu. Pradstaŭlenyja dakumenty datavany 1940—1950 h., prysutničajuć tvory Jaŭhiena Zajcava, Zaira Azhura, Viktara Hramyki dy inš. Najbolšuju cikavaść u naviednikaŭ vyklikajuć dobra zroblenyja kopii šmatfihurnych karcin viadomaha niekali ŭkrainskaha mastaka Michaiła Chmialka «Tryjumf Pieramohi» dy «Za vialiki rasiejski narod», uhanaravanyja ŭ 1946 i 1948 hh. Stalinskimi premijami. Na apošniaj adlustravany ŭračysty pryjom u Kramli paśla paradu Pieramohi. Siarod namalavanych asobaŭ — Stalin, Mołataŭ, Kahanovič… Pieradadzienyja ŭ druhoj pałovie 1950-ch h. ź Dziaržmuzeju Vialikaj Ajčynnaj vajny ŭ Miensku ŭ memaryjalny muzej K.Zasłonava, jany nikoli ŭ Voršy nie vystaŭlalisia.
Lebiedzi ŭ Barani
Druhi hod zapar žyvie ŭ horadzie Barań (Aršančyna) siamja biełych lebiedziaŭ. Vidać, daspadoby pryjšłasia im tutejšaja rečka Adroŭka. Lebiedzi ŭžo stali miascovaj słavutaściu. Žychary pačali ich pieścić — uvieś čas padkormlivać chlebam, što nia duža dobra dla ptušynaha zdaroŭja. A voś babroŭ, jakija taksama «kvataravali» na Adroŭcy, letaś pazabivali baranskija dzieciuki. Kažuć, jany, nia majučy hrošaj na «Vijahru», zdabyvali babrovy strumień, jaki, pavodle narodnaj medycyny, daje mužčynam moc. Dziakuj bohu, na lebiedziaŭ pakul nichto nie zamachvaŭsia.
Jaŭhien Žarnasiek, Vorša
Na taran
Na minułym tydni ŭ Baranavičach adbyłasia žudasnaja avaryja. Na pryciemku, pa vulicy Kamsamolskaj na vialikaj chutkaści «BMW» ujechała ŭ chvost haradzkomu aŭtobusu. Aŭtamabil pa łabavoje škło ŭlez pad aŭtobus, jaki ad udaru prajechaŭ bolš za tryccać metraŭ.
U aŭto było piaciora chłapcoŭ. Kiroŭca zahinuŭ na miescy, pasažyr, što siadzieŭ pobač, jon ža haspadar mašyny, pamior pa darozie ŭ špital. Jašče adzin chłopiec skanaŭ na nastupny dzień. Astatnija z roznymi pierałomami i strasieńniami znachodziacca ŭ bolnicy. Z pasažyraŭ aŭtobusa nichto nie paciarpieŭ.
Pavodle słoŭ śviedkaŭ, «Bumer» niośsia z chutkaściu bolš za
100 kilametraŭ u hadzinu dy biez uklučanaha śviatła. Pavodle niekatorych źviestak, chłopcy viartalisia z baru.
Rusłan Raviaka, Baranavičy