U parku Čaluskincaŭ zakapali pareštki
U staličnym parku Čaluskincaŭ pry prakładcy kabelu znajšli ludzkija pachavańni. Adnak pareštki zakapali, kab nie zryvać planaŭ dobraŭparadkavańnia.
Pavodle słoŭ vykanaŭčaha dyrektara MHA «Historyka» Źmitra Rahačova, čałaviečyja kostki byli znojdzieny za 20—30 metraŭ ad brackaj mahiły savieckich sałdataŭ. U parku lažać achviary i stalinskaha, i hitleraŭskaha režymaŭ. Adnak raźbiracca, čyjo heta pachavańnie, nichto nia staŭ.
MHA «Historyka» źviarnułasia va ŭpraŭleńnie pa achovie historyka-kulturnaj spadčyny Ministerstva kultury. Ale supracoŭnica ŭpraŭleńnia Natalla Chvir rastłumačyła, što, choć park Čaluskincaŭ i źjaŭlajecca historyka-kulturnaj kaštoŭnaściu 3-j katehoryi, pachavańniem jany apiekavacca nia mohuć: «Jość upraŭleńnie pa ŭšanavańni pamiaci pry Ministerstvie abarony, jość inspekcyja Mienharvykankamu pa achovie historyka-kulturnaj spadčyny. Ja parekamendavała źviarnucca tudy i navat sama telefanavała ŭ Ministerstva abarony. Mnie skazali, što pavinien być aficyjny zvarot ad toj budaŭničaj arhanizacyi, jakaja znajšła pachavańnie».
Načalnik upraŭleńnia pa ŭšanavańni pamiaci pry Minabarony pałkoŭnik Viktar Šumski zajaviŭ nam: «Vypadak nadzvyčajny, tamu budziem nieadkładna raźbiracca».
Tym časam niekalki dzion rabotniki marna čakali specyjalistaŭ-archieolahaŭ, paśla čaho pareštki zakapali, a kabel praviali krychu ŭbaku. Rabočyja, jakija paradkujuć brackuju mahiłu, pra znojdzienaje pachavańnie havaryć nia chočuć. Vyhladaje, što budaŭniki prosta vyrašyli zamoŭčvać sytuacyju, kab nie nažyć sabie lišnich prablem napiaredadni 9 traŭnia. Jak ža — sarvać plany dobraŭparadkavańnia?
Z.Rahačoŭ kaža, što ciapier MHA «Historyka» rychtuje zajavu ŭ prakuraturu: raźbiracca sa znojdzienymi čałaviečymi pachavańniami — ich kampetencyja.