Pakińcie nam vulicy!
10 traŭnia na Kastryčnickaj płoščy Miensku prajšła akcyja, skiravanaja suprać pierajmienavańnia praspektaŭ. Anansavanaja praź Internet, jana sabrała kala 150 čałaviek. Udzielniki śpiavali «My vyjdziem ščylnymi radami», adzin trymaŭ plakat: «Darahija veterany, my vas pavažajem, ale vulicy pakińcie nam svaje». AMON vycisnuŭ udzielnikaŭ z płoščy.
U Mahilovie 28 krasavika padčas razdačy niezarehistravanaj hazety «Vybar» byli zatrymanyja aktyvisty niezarehistravanaj arhanizacyi «Zubr» Jaŭhien Suvoraŭ i Mikałaj Illin.
Homielski harvykankam nia daŭ da pačatku traŭnia pamiaškańnia dla juradrasu miascovaj filii HA «BAŽ», nie zvažajučy na zaklučanuju damovu. Čynoŭniki patrabujuć zhody ad sanepidemstancyi j Ministerstva pa nadzvyčajnych sytuacyjach, chacia ŭ damovie, zavizavanaj pradstaŭnikami kamunalnych słužbaŭ, hetyja pytańni ŭžo źniatyja.
Biełaruski sajuz moładzievych i dziciačych hramadzkich abjadnańniaŭ «Rada» 4 traŭnia padaŭ u sud na padatkovuju inspekcyju Centralnaha rajonu Miensku: arhanizacyja asprečvaje štrafnyja sankcyi na 125 młn rub., vystaŭlenyja pa prahramie «TACIS» i JUNISEF.
Łarysa Dzienisievič, maci 14-hadovaha Daniły, jakomu złamali ruku na čarnobylskaj akcyi, źviarnułasia 5 traŭnia ŭ prakuraturu Leninskaha rajonu Miensku z prośbaj pryciahnuć da kryminalnaj adkaznaści vinavatych u hetym amonaŭcaŭ.
5 traŭnia Svabodny prafsajuz Biełaruski atrymaŭ patrabavańnie ŽREA Partyzanskaha rajonu Miensku da 16 traŭnia vyzvalić pamiaškańnie. SPB zajmaje ofis z 1994 h. Papiaredni raz dahavor na arendu byŭ padoŭžany za 10 dzion da atrymańnia lista sa ŽREA.
Respublikanski saviet prafsajuzu REP 5 traŭnia padrychtavaŭ pazoŭ u sud Leninskaha rajonu Mahilovu: prafsajuznyja aktyvisty asprečvajuć admovu ŭ rehistracyi filii REP na tamtejšym aŭtamabilnym zavodzie, atrymanuju ad uładaŭ u hety dzień.
Aktyvisty biełaruskich NDA, jakija arhanizavali kampaniju za źmieny ŭ zakandaŭstvie pra hramadzkija abjadnańni, atrymali 5 traŭnia adkazy na svaje zvaroty ŭ pałatu pradstaŭnikoŭ: parlamentary «pryniali da viedama» zvaroty. Hramadzkija aktyvisty patrabavali admianić zabaronu na dziejnaść ad imia niezarehistravanych arhanizacyj, dazvolić rehistravać juradras u žyłym fondzie, źniać abmiežavańnie ŭ minimum 50 čałaviek dla rehistracyi abjadnańnia j h.d.
5 traŭnia HA «BAŽ» paviedamiła, što niedziaržaŭnyja hazety: «Birža informacii», «Miestnaja hazieta», «Hazieta Słonimskaja», «Teleskop», «Novaja hazieta Smorhoni», «Głos znad Niemna» nie ŭklučyli ŭ kataloh «Srodki masavaj infarmacyi Haradzienščyny», vydadzieny ŭpraŭleńniem idealahičnaj raboty Haradzienskaha abłvykankamu da vystaŭki «ŚMI ŭ Biełarusi».
Jak paviedamiła 6 traŭnia pres-słužba «Zubra», aktyvista arhanizacyi Mikitu Šuciankova, vučnia 10 klasy mienskaj politechničnaj himnazii №6, prymušajuć ustupić u BRSM. Chłopca byli zatrymali padčas raspaŭsiudžvańnia nierehistravanaha vydańnia, i ciapier ź im štodnia «pravodziać hutarki» j kožnaha razu dajuć zajavu na ŭstupleńnie ŭ arhanizacyju.
Maryna Levanieŭskaja atrymała 6 traŭnia adkaz z prakuratury pa nahladzie za zachavańniem zakonaŭ u papraŭčych ustanovach Mahilova: jana skardziłasia, što da jaje dachodziać nia ŭsie listy muža Valerja. Prakuratura nie znajšła parušeńniaŭ u dziejnaści słužbovych asob.
Haradzienski sud 6 traŭnia skasavaŭ rašeńnie kiraŭnictva Sajuzu palakaŭ u Biełarusi j viarnuŭ na pracu hałoŭnaha redaktara hazety «Głos znad Niemna»» Andžeja Dubikoŭskaha j, aštrafavaŭšy SPB na 500 dalaraŭ. Novy redaktar Andžej Pisalnik byŭ pryznačany paśla źmieny kiraŭnictva ŭ SPB, jakoj sprabavali pieraškodzić łukašenkaŭcy.
Ułady Kapyla zabaranili pravodzić 6 traŭnia pikiet, zajaŭku na praviadzieńnie jakoha padaŭ aktyvist demakratyčnaha ruchu Viktar Daškievič: jon mieŭsia pratestavać suprać zatrymki z afarmleńniem pensii pa invalidnaści. U adkazie za podpisam staršyni rajvakankamu Daškieviču paviedamili, što jon nia maje padstaŭ dla vykazvańnia svajho pratestu ŭ vyhladzie pikietu.
Sud Centralnaha rajonu Homielu 6 traŭnia pačaŭ razhlad pazovu Maryi Bahdanovič, Źmitra Škrabava j deputata harsavietu Jurasia Hłušakova suprać harvykankamu: jany abskardžvali admovu ŭładaŭ na praviadzieńnie mitynhu suprać pavyšeńnia kamunalnych płaciažoŭ, uviadzieńnia prymusovych kantraktaŭ, płatnaj adukacyi j medycyny.
U Mahilovie padčas akcyi «Zubra» pamiaci Jurja Zacharanki 7 traŭnia nasuprać abłasnoha ŭpraŭleńnia KDB byli zatrymany aktyvisty Mikałaj Illin, Andrej Razumkaŭ, Vaładar Curpanaŭ, Maksim Dvarecki, Uładzisłaŭ Barodka, Ivan Šaŭčenka, Uładzisłaŭ Višniaviecki, Jaŭhien Suvoraŭ, Aleh Miacielica, Aleś Novikaŭ, Julija Rohava, Hanna Pietrakovič.
Analahičny «Łancuh nieabyjakavych ludziej» u Viciebsku 7 traŭnia byŭ razahnany milicyjaj.
U Bieraści padčas analahičnaj akcyi 7 traŭnia zatrymany staršynia abłasnoj filii AHP Ściapan Navasialčan i jahony syn Andrej: na ich skłali pratakoły za arhanizacyju niesankcyjavanaha schodu.
7 traŭnia ŭ Miensku na «Łancuhu nieabyjakavych» zatrymany Maksim Viniarski, Alena Kopač, Luboŭ Kučynskaja, Valeryja Doktarava, Mikita Šuciankoŭ, Illa Pałonski, Pavał Bialecki, Alaksandar Vuško, Jan Dalidovič, Julija Bandarenka, Dzianis Martynaŭ, Alaksandar Čadovič, Siarhiej Rykaŭ, Darja Barabać, Nika Łazoŭskaja, Kaciaryna Dziatkoŭskaja, Nastaśsia Šaškova, Źmicier Marcinovič, Pavał Juchnievič, Mikita Sasim, Natalla Vałujskaja, Jaŭhien Paźniakoŭ, Rusłan Maćviejeŭ, Źmicier Dubicki, Daniła Barysievič, Ihar Kačura, Jury Sivy, Taciana Kipro, Ju.Kipro, Pavał Jurykaŭ, Śviatłana Miecialkova, Michaił Kandrašoŭ, Alaksandar Kazakoŭ, Ivan Šutko, Anatol Askierka, Ludmiła Zielchaŭ, Anatol Bielski, Alaksiej Bielski, Anton Dubovik, Jury Zacharaŭ, Alaksiej Vaśkovič, Andrej Babicki, Alesia Jasiuk, Źmicier Barodka, Andrej Tarasiuk, Natalla Vuško.
U Horadni ŭdzielnikaŭ «Łancuha nieabyjakavych» 7 traŭnia zatrymali za «ŭdzieł u niesankcyjanavanaj akcyi». Na Mikałaja Vorana, Ramana Jurhiela i aktyvistaŭ AHP Artura Śmiatanina, Andreja Januškieviča, Źmitra Aŭdziejčyka, Jurja Istomina skłali pratakoły j vypisali pozvy ŭ sud.
Aktyvisty ruchu «Limon» Artur Śmiatanin, Andrej Januškievič i Andrej Žuk 8 traŭnia ŭ Horadni byli zatrymany padčas razdačy partretaŭ Łukašenki, jakija nibyta mieli lekavyja j cudadziejnyja ŭłaścivaści. Supracoŭnica abłvykankamu zapatrabavała ŭ ich pakazać sertyfikat na lekavyja ŭłaścivaści. U adździaleńni zatrymanyja davali tłumačeńni milicyjantam i supracoŭniku KDB.
Padčas akcyi 10 traŭnia na Kastryčnickaj płoščy Miensku, skiravanaj suprać pierajmienavańnia hałoŭnych praspektaŭ horadu, byli zatrymanyja siabry “Maładoha frontu” Franak Viačorka, Pavał Šaviel, Michaś Voŭčak, Arciom Cieplakoŭ, Barys Harecki. Ich zavieźli ŭ Centralny RAUS i cieraz hadzinu adpuścili.
AŠ