Naviny ścisła
Praces dzieviacioch
U Biełastoku ŭ sieradu adbyŭsia papiaredni razhlad spravy siabroŭ Prahramnaj Rady štotydnioviku «Niva». Prakuraturaj «Biełastok—Poŭdzień» jany vinavaciacca ŭ nieadpaviednym vykarystańni biudžetnych srodkaŭ. «Niŭcy» ŭvažajuć spravu za sprobu ŭcisku biełaruskaha žyćcia ŭ Polščy. Pavodle zakanadaŭstva, pry ŭmovie pryznańnia svajoj viny, siabry Prahramnaj rady mahli biez razhladu atrymać minimalnaje pakarańnie — umoŭnaje zakryćcio spravy i pa 600 złotych štrafu kožny. Ale taki padychod ich nie zadavoliŭ, budzie sud, artykuł kryminalnaha kodeksu praduhledžvaje da vaśmi hod pazbaŭleńnia voli. Dzień sudu jašče nia vyznačany.
Aryštavany dyrektar «Pieśniaroŭ»
Pierad 9 traŭnia ŭ Miensku byŭ aryštavany dyrektar «Dziaržaŭnaha ansamblu «Pieśniary» Valer Skaražonak. Pavodle «Chartyi, 97», jaho vinavaciać u bujnych finansavych rastratach. Skaražonak byŭ pryznačany kiraŭnikom «Pieśniaroŭ» paśla śmierci Ŭładzimiera Mulavina ŭ studzieni 2003 h.
Načnaja varta muzeju
Nacyjanalny mastacki muzej (NMM) u noč z 14 na 15 traŭnia, napiaredadni Suśvietnaha dnia muzejaŭ, budzie adčynieny z 21-j da 1-j hadziny nočy. Hałoŭnyja padziei razharnucca na placoŭcy pierad samim muzejem i ŭ faje: budzie pradstaŭlena vystava mastackaj fatahrafii, a taksama pakaz tvoraŭ mastakoŭ bodzi-artu. Admysłova da hetaj padziei dyrektar NMM Uładzimier Prakapcoŭ napisaŭ karcinu «Kažan».
«Noč muzejaŭ» pravodzicca ŭ ramkach akcyi «Viasna muzejaŭ», u jakoj udzielničajuć bolš čym 2 tys. muzejaŭ Eŭropy. Biełaruś biare ŭdzieł u akcyi druhi hod.
Vajenny interas
Biełaruś nie planuje skaračać ekspartu ŭzbrajeńnia i vajennaj techniki, zajaŭlajuć ŭ Dziaržaŭnym vajenna-pramysłovym kamitecie krainy. Specyjalisty kamitetu nia bačać «ničoha niapravilnaha» ŭ tym, što Biełaruś pradaje liški zapasaŭ uzbrajeńnia i vajennaj techniki z rezervu Minabarony na mižnarodnym rynku. Dziaržvajenpram adznačaje, što naša kraina ŭvajšła ŭ dziasiatku viadučych eksparteraŭ uzbrajeńnia ŭ śviecie.
Miniust tarmozić Kazulina
U Ministerstvie justycyi zajaŭlajuć, što, jak vynikaje z padadzienych materyjałaŭ, 10 krasavika na pazačarhovym źjeździe Biełaruskaj sacyjał-demakratyčnaj partyi (Narodnaja Hramada) pytańnie pra abjadnańnie partyi nie razhladałasia. Nahadajem, što miesiac tamu ŭ Sieńnicy pad Mienskam było pryniata rašeńnie ab uvachodžańni Biełaruskaj sacyjał-demakratyčnaj Hramady ŭ skład BSDP (NH), kiraŭnikom abjadnanaj partyi byŭ abrany Alaksandar Kazulin.
Znak rubla
Nacyjanalny bank zaćvierdziŭ hrafičny znak nacyjanalnaj valuty. Hrafičny znak biełaruskaha rubla padadzieny ŭ vyhladzie dźviuch litar łacinskaha alfabetu «Br». «V» aznačaje biełaruski, «r» – rubiel. Na konkurs było padadziena kala piaci tysiač varyjantaŭ. Pieramožca atrymaje premiju ŭ pamiery 50 bazavych vieličyniaŭ.
AH; charter97.org, svaboda.org