Naviny haspadarki ad 13 traŭnia
«BiełSeł» pad pytańniem
Ministerstva suviazi i infarmatyzacyi abvierhła źviestki pra prypynieńnie licenzii adzinaha ŭ krainie aperatara sotavaj suviazi standartu cdma-2000 «BiełSeł». Ale praŭda toje, što admysłovaja dziaržaŭnaja kamisija vyvučaje finansavy stan kampanii, jakaja maje značnuju kredytorskuju zapazyčanaść. Kančatkovaje rašeńnie budzie pryniataje da kanca traŭnia. Kali zamiežnyja partnery «BiełSełu» nie zabiaśpiečać prytoku novych investycyj, Minsuviazi nie vyklučaje prypynieńnia licenzii.
Doŭh pamienšaŭ
Źniešni dziaržaŭny doŭh Biełarusi za studzień—sakavik skaraciŭsia na 8,3% i składaje $679,4 młn, pry zaćvieržanym limicie $2 młrd dalaraŭ. Kredyty, pryciahnutyja krainaj, składajuć $409,7 młn, ci 60%. Abjom kredytaŭ, pryciahnutych rezydentami pad harantyju ŭradu, roŭny $269,7 młn.
Arendnyja rekamendacyi
Minekanomiki zaćvierdziła metadyčnyja rekamendacyi da vykarystańnia pavyšalnych kaeficyjentaŭ da arendnaj płaty na rynkach. Ciapier ich možna prymianiać tolki kali standartny pamier arendy nie dazvalaje ŭłaśniku rynku zabiaśpiečyć jaho narmalnuju pracu. Za košt arendnaj płaty nielha pakryvać kamunalnyja vydatki, źviazanyja z funkcyjanavańniem rynku. Praŭda, nijakich sankcyj za nievykanańnie rekamendacyj nie praduhledžana.
Vynik dałučeńnia
Ministerstva sielskaj haspadarki i charčavavańnia padličyła, što ad studzienia kolkaść stratnych ahrapradpryjemstvaŭ skaraciłasia ŭtraja, čamu paspryjała dałučeńnie stratnych haspadarak da stabilnych pradpryjemstvaŭ i adterminoŭka vypłaty zapazyčanaściaŭ. Praŭda, ahulnaja suma nia viernutych u čas kredytaŭ vielmi vysokaja: 909 młrd rub.
Šakaladnaja dzialba
Urad padoŭžyŭ na try miesiacy antydempinhavaje raśśledavańnie adnosna impartu tannaha šakaladu z Rasiei dy Ŭkrainy. Rasiejski bok paprasiŭ razhledzieć dadatkovyja arhumenty na svaju karyść. Raśśledavańnie raspačałosia 20 lipienia 2004 h. pa inicyjatyvie «Biełcharčpramu» dy firmy «Sładuška», što naležyć švajcarskamu kapitału. Kali antydempinhavyja zachady buduć zroblenyja, impart karameli, piečyva dy šakaladu budzie značna abmiežavany.
Syrnaja pieramoha
Hrecyja pieramahła ŭ baraćbie za syr. Ciapier tolki toj syr, jaki vyrableny ŭ Eładzie dy prylahajučych vyspach, moža nasić nazvu «feta». Da takoj vysnovy pryjšła kamisija pry Vyšejšym eŭrapiejskim sudzie. Takim čynam, Hrecyja zamacavała za saboj unikalnuju handlovuju marku, stvoranuju jašče šeść tysiačaŭ hadoŭ tamu. Dackim, niamieckim dy francuskim firmam daviadziecca prydumlać inšy nazoŭ dla praduktu, jaki jany raniej pradavali pad markaj «feta».
AK, AFN