Sprava Klimava spynienaja
Sprava Andreja Klimava pa paklopie j abrazie prezydenta (art. 368 i 367 KK) spyniena 22 lipienia. Dziaržabvinavaŭca Lilijana Lićviniuk paprasiła Pieršamajski sud Miensku spynić spravu «ŭ adpaviednaści z art.87 KK i č.1 art.30 KPK». Art.87 praduhledžvaje spynieńnie spravy, kali «na čas razhladu spravy ŭ sudzie praź źmienu abstanoŭki ŭčynienaje abvinavačvanym dziejańnie straciła charaktar niebiaśpiečnaha».
Supołku REP nie rehistrujuć
Administracyja RUP «Kanstruktarskaje biuro dakładnaha elektronnaha mašynabudavańnia optyka-mechaničnaha abstalavańnia» 15 červienia adklikała juradras u supołki prafsajuzu REP. Pra adklikańnie juradrasu staršynia supołki Ihar Komlik daviedaŭsia 30 červienia, atrymaŭšy papiaredžańnie ad administracyi Leninskaha rajonu Miensku. Prafsajuz REP padrychtavaŭ zvarot u Minpramysłovaści j hiendyrektaru kancernu «Planar», kudy ŭvachodzić KBDEM OMA.
Pieratrus u Pinsku
U Pinsku 26 lipienia zatrymali aktyvista AHP Ściapana Novasialčana: milicyjanty praviali vobšuk jaho mašyny, zajaviŭšy, što tam mohuć być narkotyki.Znajšli hazety j biuleteni, pryśviečanyja budučaj vybarčaj kampanii, i skłali pratakoł za raspaŭsiudžańnie vydańniaŭ z parušeńniem zakonu.
Sutki za Dzień niezaležnaści
U Ščučynie 26 lipienia ŭviečary zatrymali namieśnika staršyni SPB Juzafa Pažeckaha, aktyvista SPB Miečysłava Jaskieviča i redaktara časopisu «Magazyn Polski» Andreja Pačobuta. Ich abvinavacili va ŭdziele ŭ niesankcyjanavanaj akcyi ŭ Ščučynie 3 lipienia: tam adbyŭsia kancert u honar Dnia niezaležnaści, arhanizavany miascovaj filijaj SPB. Pačobuta asudzili na 15 sutak aryštu, Pažeckaha j Jaskieviča — na 10 kožnaha.
Štraf za letnik
26 lipienia ŭ moładzievy letnik na bazie adpačynku «Biełaje voziera» (Bieraściejski rajon) prybyli 5 milicyjantaŭ i 6 čałaviek u cyvilnym: jany praviarali «pašpartny režym» u pamiežnaj zonie va ŭdzielnikaŭ seminaru, arhanizavanaha pry spryjańni fondu Eberta. Na aktyvistaŭ BSDP (H) Ihara Masłoŭskaha, Valancina Łazarenkava, deputatku Biełaazierskaha harsavietu Natallu Akaronka j troch hramadzian Ukrainy skłali pratakoły za praviadzieńnie niesankcyjanavanaha schodu.
Pieraśled za «Salidarnaść»
Dyrektar AAT «Zasłaŭjeśvidrvod» Alaksandar Sielaźnioŭ 27 lipienia adchiliŭ ad pracy načalnika hidrahiealahičnaha adździełu, aktyvista Svabodnaha prafsajuzu Biełaruskaha Ŭładzimiera Fieakcistava, jaki razdaŭ rabočym 20 asobnikaŭ hazety «Salidarnaść».
RNIE ŭ Kryčavie
U Kryčavie 27 lipienia vulica Krupskaj, dzie mieścicca redakcyja niedziaržaŭnaj hazety «Volny horad», była zakidana ŭlotkami ad RNIE.
Trasuć svajakoŭ Skrabca
27 lipienia milicyjanty praviali pieratrus u kvaterach baćkoŭ i brata Siarhieja Skrabca. U Alaksandra Skrabca, brata palitviaźnia, kanfiskavali systemny blok da kamputara.
U Znaŭca zabrali televizar…
Sudovyja vykanaŭcy zabrali 27 lipienia televizar «Haryzont» u deputata Viarchoŭnaha Savietu CHIII sklikańnia Paŭła Znaŭca. Heta kampensacyja za štraf, jaki Znaviec admaŭlajecca płacić, — u padatkovaj inspekcyi na jaho nakłali štraf za niezadeklaravanyja 30 dalaraŭ prybytku, ale eks-deputat miarkuje, što adbylisia hrubyja parušeńni zakanadaŭstva.
…a ŭ Sieviarynca — pašpart
U Paŭła Sieviarynca 27 lipienia zabrali pašpart i vajskovy bilet — pierad adsyłkaj na «chimiju». Asudžany razam ź im Mikoła Statkievič 29 lipienia vypraviŭsia da miesca pakarańnia — u Baranavičy, dzie žyvie jahony baćka.
Zatrymańni na Bieraściejščynie
U vioscy Znamienka (Duryčy) Bieraściejskaha rajonu 27 lipienia zatrymany siabry PBNF nastaŭnik Uładzimier Kraśko, studenty Vital Koŭš i Jury Asiajevič, jakija raspaŭsiudžvali drukavanyja vydańni. Na zatrymanych skłali pratakoły za parušeńnie praviłaŭ znachodžańnia ŭ pamiežnaj zonie.
Kampensacyja za prahuł
Dyrekcyja Homielskaha abłasnoha krajaznaŭčaha muzeju 29 lipienia padpisała pahadnieńnie sa zvolnienaj supracoŭnicaj, aktyvistkaj hramadzkaha ruchu «Razam» Maryjaj Bahdanovič: joj vypłaciać dvuchmiesiačny zarobak za vymušany prahuł i źmieniać farmuloŭku pryčyny zvalnieńnia. U traŭni jaje zvolnili za «systematyčnaje nievykanańnie słužbovych abaviazkaŭ biez pavažnych pryčyn».
«Zubroŭcaŭ» cisnuć
27 lipienia na dźviarach kvatery mahiloŭskaha aktyvista niezarehistravanaj arhanizacyi «Zubr» Vaładara Curpanava źjaviŭsia abraźlivy nadpis. Padpałkoŭnik KDB Anatol Safronaŭ prychodziŭ «pahutaryć» ź ludźmi, na jakich zarehistravany kantaktny telefon mahiloŭskaj filii arhanizacyi.
«Miny» ŭ Homieli
30 lipienia ŭ Homieli byŭ sarvany seminar «Prablemy moładzi i šlachi ich vyrašeńnia», jaki źbiraŭsia ŭ pryvatnym domie Viktara Karniajenki. Milicyjanty zajavili, što majuć źviestki pra minavańnie domu. Udzielnikaŭ seminaru zavieźli ŭ adździaleńnie dla vyśviatleńnia asoby, choć mnohija mieli z saboj pašparty. Minaŭ nie znajšli, zatoje kanfiskavali čatyry pački knih «Vypadkovy prezydent».
Zatrymańnie ŭ Dokšycach
U Dokšycach 30 lipienia byli zatrymanyja staršynia PBNF Vincuk Viačorka i aktyvist partyi Alaksiej Kavalec: ich abvinavacili ŭ raspaŭsiudzie drukavanaj pradukcyi. Pakolki ŭ ich byli tolki zarehistravanyja vydańni, praz try hadziny ŭsich adpuścili.
Barysaŭski futboł
U Barysavie 30 lipienia byli zatrymany čatyry aktyvisty moładzievych arhanizacyj, što ŭdzielničali ŭ futbolnym turniry «Kubak Niezaležnaści»: u ich zaŭvažyli bieł-čyrvona-biełyja ściahi. Na Alesia Hihiela skłali pratakoł.
Zavadzkaj admovili
Śviatłanie Zavadzkaj 1 žniŭnia ŭ prakuratury Centralnaha rajonu Miensku admovili ŭ zaviadzieńni kryminalnaj spravy pa fakcie źbićcia, bo «nie było znojdziena padstaŭ». Akcyja salidarnaści z Zavadzkaj u Miensku była pierarvanaja mienskim AMAPam.
Papiaredžańnie ŭ Mazyry
U prakuratury Mazyra Ŭładzimieru Cielepunu ź niezarehistravanaha pravaabarončaha centru «Viasna» 27 lipienia vynieśli aficyjnaje papiaredžańnie ab niedapuščalnaści parušeńnia artykułaŭ 367, 368 KK (abraza honaru j hodnaści prezydenta). U jahonym kamputary milicyjanty vyjavili «vyjavy j karykatury prezydenta». Cielapun śćviardžaje, što mieŭ skanavanuju pieradvybarnuju ŭlotku Łukašenki 1994 h.
Skrabca pieravieźli ŭ Miensk
2 žniŭnia Siarhieja Skrabca dastavili ŭ Miensk. Vahon z aryštantami jechaŭ ź Bieraścia da Miensku piać sutak, pry hetym troje sutak vahon stajaŭ u Baranavičach.
Kamientary