Lidery apazycyi padpisali supolnuju deklaracyju ab hatoŭnaści pracavać adzinaj kamandaj.
«My prykładziom usie vysiłki, kab padčas vybarčaj kampanii byŭ adziny kandydat u prezydenty ad demakratyčnych siłaŭ. Dla pieramohi hetaha kandydata spatrebicca padtrymka ŭsich vybarcaŭ, jakija vystupajuć za pieramieny, i vysokaprafesijnaja kamanda adnadumcaŭ, jakija majuć dośvied u roznych halinach palityki, ekanomiki i kultury», — havorycca ŭ deklaracyi. «My budziem u hetaj kamandzie», — zapeŭnivajuć palityki.
Dakument padpisali U.Kołas, A.Vajtovič, S.Kalakin, A.Labiedźka, V.Lavonaŭ, U.Parfianovič, V.Frałoŭ, S.Šuškievič, A.Milinkievič, M.Statkievič i A.Jarašuk. Praktyčna ŭsie lidery apazycyi, akramia A.Kazulina.
Na dumku aŭtaraŭ dakumentu, «Kanhres demakratyčnych siłaŭ stanie pa-sapraŭdnamu narodnym schodam tych, chto choča ŭ krainie pieramienaŭ».
A.Milinkievič i M.Statkievič padpisali dakument z ułasnym dadatkam: «Padtrymlivaju deklaracyju pry ŭmovie, što adziny kandydat ad demakratyčnych siłaŭ budzie abrany ŭ adpaviednaści z rašeńniem kaalicyi na Kanhresie 1—2 kastryčnika».
Dosyć ciahnuć ryzinu, miarkuje A.Milinkievič. «Nie pavinna być nijakich pierahladaŭ dy inšych varyjantaŭ. Niekatoryja pradstaŭniki demsiłaŭ chočuć nadać Kanhresu status permanentnaści. Heta roŭna śmierci», — ličyć A.Milinkievič.
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža29
Kamientary