Čyrvonaje dreva pad biełym niebam

Źniešni bok imprezy — sprava druhaja. Hałoŭnaje — vynik, miarkujuć u arhkamitecie Kanhresu demakratyčnych siłaŭ.

Arhanizatary Kanhresu nie abiacajuć palityčnaj fejeryi ŭ styli amerykanskich pieradvybarnych kampanij. 1—2 kastryčnika ŭ Pałacy kultury MAZu (Partyzanski pr-t, 117a, stancyja metro «Aŭtazavodzkaja») budzie adbyvacca nia šoŭ, a napružanaja praca pa vyłučeńni adzinaha kandydata ad demakratyčnych siłaŭ. Rehistracyja delehataŭ pačniecca a 10-j, pieršaje pracoŭnaje pasiadžeńnie — a 14-j.

Z pryvitalnym słovam vystupić staršynia arhkamitetu Kanhresu Alaksandar Buchvostaŭ. Vieści Kanhres daručać staršyniu na čale admysłova abranaha prezydyjumu. Ładnuju častku pieršaha dnia zojmuć vystupy haściej i delehataŭ. Udzielnikam Kanhresu buduć taksama prademanstravany videapryvitańni ad P. Sieviarynca i M. Statkieviča.

Prezentacyja kandydataŭ, ich vystupy i adkazy na pytańni adbuducca, chutčej za ŭsio, na druhi dzień — kab adrazu pierajści da hałasavańnia. Jano budzie prachodzić u adzin ci dva tury pa pryncypie «adzin delehat — adzin hołas». Kab pieramahčy, tre budzie nabrać bolš za 50% hałasoŭ prysutnych delehataŭ. Paśla taho jak adziny kandydat budzie vyznačany, Kanhres prymie palityčnuju platformu abjadnanych demakratyčnych siłaŭ u kampanii-2006, zvarot da biełaruskaha narodu i šerah inšych rezalucyj, u tym liku pra nielehitymnaść udziełu Łukašenki ŭ vybarach, padrychtavanuju akademikam Vajtovičam. Mahčyma, Kanhres budzie zakančvacca kancertam, ale heta jašče dakładna nie viadoma — pieramovy ź Mienharvykankamam praciahvajucca.

Kali Kanhres ź niejkich pryčynaŭ nie adbudziecca, jaho praviaduć praz dva tydni ŭ Kijevie. Arhkamitet zapatrabavaŭ ad uładaŭ pravieści pierad Kanhresam hruntoŭnuju pravierku Pałacu kultury na najaŭnaść vybuchoŭki. Akramia milicyjantaŭ, achoŭvać udzielnikaŭ Kanhresu buduć 50 aktyvistaŭ-dobraachvotnikaŭ z šerahaŭ partyj.

Užo ŭ piatnicu a 16-j na ŭpravie Partyi BNF projdzie pres-kanferencyja dla zamiežnych žurnalistaŭ. Uličvajučy plany ŭradu zrabić 1 kastryčnika pracoŭnym dniom, prahrama pieršaha dnia Kanhresu budzie ablehčanaj.

Ajčynnym telekanałam nakiravanaja prapanova vydzielić eterny čas dla infarmavańnia hledačoŭ pra chod Kanhresu. Kali jany pojduć nasustrač, to atrymajuć dazvoł nakiravać svaje zdymačnyja hrupy ŭ zalu Pałacu kultury MAZu. Kiraŭnictva telebačańnia z adkazam pakul nie śpiašajecca.

Arhkamitet nie planuje aktyŭna vykarystoŭvać nacyjanalnuju symboliku ŭ azdableńni zali, ale ŭ symbali Kanhresu — vyjavie čyrvonaha dreva pad biełym niebam — prahladajuć znajomyja kolery.

• 0
• 0
• 0
• 0
• 0
• 0
• 0
• 0