Chronika

22 vieraśnia Andrej Klimaŭ, asudžany za arhanizacyju akcyi pratestu na Dzień Voli, vypraviŭsia ŭ Krupki na «chimiju».

Haładoŭki

Ad 20 vieraśnia ŭ Bieraści haładajuć uładalniki maršrutnych taksovak: ad ich patrabujuć płacić u biudžet ad 20 da 50 młn rub. z kožnaj mašyny za vykarystańnie ŭ kamercyjnych metach. Zbor ustalavany prezydenckim ukazam №140, vydadzienym u krasaviku, ale padatkovaja spahaniaje i z tych, chto ŭvioz aŭtamabili raniej. Akcyju raspačali Luboŭ Razanovič i Luboŭ Łaŭrukovič. Radyjo «Svaboda» paviedamlaje, što haładajuć šeść čałaviek. 23 vieraśnia Vyšejšy haspadarčy sud prypyniŭ sankcyi ŭ dačynieńni da bieraściejskich pradprymalnikaŭ.

U Vaŭkavysku 23 vieraśnia pačała haładoŭku Natalla Niaborskaja: ad jaje patrabujuć zapłacić 6,5 młn rub. za nabyćcio kvatery, bo nia zdoleła pradjavić deklaracyju pra padatki za niekalki hadoŭ. Žančyna pracavała ŭ Zapalarji, adkul pryjšoŭ adkaz: dakumenty, što datyčać pracoŭnaj dziejnaści, zhareli. Sud nad Niaborskaj adbyŭsia ŭ Vaŭkavysku bieź jaje prysutnaści.

Maryniča nie vypuskajuć

Kamisija mienskaj kalonii №1 pa pytańniach umoŭna-daterminovaha vyzvaleńnia 22 vieraśnia znoŭ admoviła Michaiłu Maryniču ŭ daterminovym vyzvaleńni.

Zatrymali Žalapava

Aŭtamabil aktyvista PBNF Chrystafora Žalapava zatrymali 20 vieraśnia na darozie Viciebsk—Navapołacak praź niezarehistravany biuleteń «Naviny BNF», a taksama ŭlotki apazycyi. U pratakole milicyjanty paznačyli, što vydańni nia mieli vychodnych źviestak.

Bykaŭ skardzicca ŭ prakuraturu

Staršynia Svabodnaha prafsajuzu Biełaruskaha Hienadź Bykaŭ 22 vieraśnia źviarnuŭsia da prakurora Partyzanskaha rajonu Miensku Ŭładzimiera Ramanoŭskaha. Jon patrabuje raspačać kryminalnuju spravu ŭ dačynieńni da kiraŭnictva Mienskaha zavodu aŭtamatyčnych linij, jakoje niezakonna nie puskaje Bykava na pradpryjemstva j pieraškadžaje dziejnaści prafsajuzu.

Pozva Labiedźku

22 vieraśnia kiraŭnik AHP Anatol Labiedźka atrymaŭ pozvu ŭ baranavicki sud jak «pryciahvany». Jon źviazvaje heta z praviadzieńniem u Baranavičach rajonnaha schodu demakratyčnych siłaŭ.

Štraf za nabaženstva

Administratara carkvy «Novaje žyćcio» Vasila Jureviča 23 vieraśnia Maskoŭski sud Miensku aštrafavaŭ na 160 bazavych vieličyniaŭ (4 młn 80 tys.) za parušeńnie paradku nabaženstva.

Pieratrusy ŭ Viciebsku

Milicyja i KDB 24 vieraśnia praviali pieratrusy ŭ kvaterach viciebskich apazycyjaneraŭ — «zubroŭca» Andreja Vušenki, «maładafrontaŭcaŭ» Viktara Šlachcina i Aleny Stuk, aktyvista AHP Dzianisa Davydava, siabra moładzievaj supołki «Siomaja hrań» Ściapana Cišucina. Chacia nahodaj byli vyšukovyja dziejańni paśla vybuchu, u maładych ludziej kanfiskavali ŭlotki, hazety, nacyjanalnuju symboliku, infarmacyjnyja nośbity. Da A.Stuk ź pieratrusam pryjšli a pałovie na druhuju nočy. U Dz.Davydava kanfiskavali siarod inšaha arkušy z podpisami za nadańnie imia Vasila Bykava adnoj z vulic Viciebsku.

Chalip papiaredzili

Žurnalistka Iryna Chalip 26 vieraśnia atrymała aficyjnaje papiaredžańnie ad namieśnika hienprakurora Mikałaja Kupryjanava za artykuł «Čas vykidać hrabli» ŭ «Novoj hazietie», apublikavany ŭ žniŭni. Prakuratura ŭbačyła ŭ artykule «prymiety zaklikaŭ da destabilizacyi hramadzkaha paradku i źmieny kanstytucyjnaha ładu niepravavymi srodkami». Za paŭtornaje parušeńnie jaje mohuć pazbavić voli na termin da piaci hadoŭ.

Jašče adna rasiejskaja škoła

Z pačatku navučalnaha hodu ŭ biełaruskamoŭnaj Vucieŭskaj siaredniaj škole Dobruskaha rajonu pieršaklaśnikaŭ pačali navučać pa-rasiejsku. Dahetul u rajonie zastavalisia tolki dźvie škoły ź biełaruskaj movaj navučeńnia.

AŠ

• 0
• 0
• 0
• 0
• 0
• 0
• 0
• 0