Jak vy staviciesia da zakliku Fiaduty?

Alaksandar Fiaduta zaklikaŭ lideraŭ «dziasiatki» syści ŭ adstaŭku, kali adziny kandydat nie atrymaje pieramohi na prezydenckich vybarach. Jak staviacca da hetaha zvarotu stvaralniki i analityki biełaruskaha palityčnaha kantekstu?

Viktar Karniajenka, kiraŭnik vybarčaha štabu A.Milinkieviča:

Nieadnaznačna staŭlusia. Kali niazdolny – treba sastupić darohu. Ale paŭstaje pytańnie – kamu? Na žal, u demakratyčnym asiarodździ nie nazirajecca šturchaniny łakciami ŭ imknieńni da palityčnaha alimpu. Padzialać adkaznaść treba, ale pytańnie nia musić stavicca rubam. Kožnaja palityčnaja partyja pavinna budzie acanić uniosak svaich lideraŭ samastojna.

Uładzimier Parfianovič, trochalimpijski čempijon i biznesoviec:

Spadar Fiaduta maje racyju, ale nia całkam. Jany abaviazanyja pajści ŭ adstaŭku nie paśla vybaraŭ, a da ich. A što jany zrabili? Ničoha nia zroblena. U hetych palityčnych lideraŭ zadača pakinuć svaje partyi dziejazdolnymi, a nie pieramahčy ŭ vybarach.

Siarhiej Pańkoŭski, redaktar sajtu «Naša dumka»:

Chaciełasia b vieryć, što heta nie rytaryčny chod, i jon sapraŭdy abumoŭleny kłopatam A.Fiaduty pra stan demakratyčnaha ruchu. Ja nia ŭpeŭnieny, što zvarot A.Fiaduty budzie mieć praktyčnyja nastupstvy, ale heta čarhovy syhnał. Treba pieraasensavać niekatoryja stratehičnyja kanceptualnyja padychody, źviazanyja ź miescam apazycyi ŭ našym hramadztvie. Adna sprava – apazycyja ŭ narmalnaj palityčnaj systemie, i inšaja – apazycyja va ŭmovach aŭtarytarnaha režymu, jaki chutka evalucyjanuje ŭ bok tatalitaryzmu. Apazycyja isnuje napaŭpadpolna, i heta vymahaje kancepcyjaŭ i stratehijaŭ, adroznych ad tych, jakija isnavali hod tamu.

Jury Chaščavacki, kinarežyser:

Ja staŭlusia... nijak. Biezumoŭna patrebnaja śviežaja kroŭ. Ale vinavacić siońniašnich lideraŭ u słabaści niačesna. Taksama ja mahu abvinavacić niedziaržaŭnuju presu ŭ tym, što jana słabaja i nie dachodzić da kožnaj vioski. Usie dziejničajuć u składanych umovach. Zamiest taho kab łajacca, treba navučycca pracavać kampramisna.

Lavon Barščeŭski, staršynia Biełaruskaha PEN-centru:

Z humaram staŭlusia. Dysydenty ŭ adstaŭku nie iduć. A našy ŭsie palityčnyja lidery – dysydenty, bo jany nia majuć mahčymaści ŭdzielničać u systemnaj palitycy. Dysydenty jość prosta charyzmatyčnymi asobami i pradstaŭnikami peŭnaj systemy pohladaŭ. Jany, chutčej, symbaličnyja asoby, čym realnyja. Ja nia baču natoŭpu pretendentaŭ na ich miesca, bo siońnia zajmacca palitykaj niebiaśpiečna i ciažka. Palitykaŭ treba šanavać, nialohki heta chleb.

Apytvaŭ Aleś Kudrycki

• 0
• 0
• 0
• 0
• 0
• 0
• 0
• 0