Naviny ścisła

Surviłła naviedaje Brusel

Na nastupnym tydni kiraŭnictva BNR — staršynia Rady Ivonka Surviłła i jejny namieśnik Siarhiej Navumčyk — naviedajuć Brusel. Meta vizytu — pieramovy z eŭrakamisarami i eŭradeputatami ŭ spravie biełaruskamoŭnaha radyjoviaščańnia z Eŭropy.

Zbližeńnie Ŭkrainy j Biełarusi

U najbližejšyja tydni Miensk z aficyjnym vizytam naviedaje premjer-ministar Ukrainy Jury Jechanuraŭ. Damova pra heta była dasiahnuta padčas vizytu ŭ Kijeŭ kiraŭnika MZS Biełarusi Siarhieja Martynava. Paśla vizytu ŭkrainskaha premjera miarkujecca sustreča A.Łukašenki ź Viktaram Juščankam na miažy abo ŭ Čarnobyli. Abjom handlu z Ukrainaj raście, sioleta jon składzie paŭtara miljarda dalaraŭ.

Ukraina admoviłasia ad krytyki Biełarusi ŭ sfery pravoŭ čałavieka, bo maje namier stać pasiarednikam u biełaruska-polskim kanflikcie.

Dobra žyć u Žłobinie

Pavodle źviestak Minstatu, siaredni zarobak na pramysłovych pradpryjemstvach skłaŭ «brudnymi» 528 tys. Najbolšy zarobak — na pradpryjemstvach čornaj metalurhii — 1 młn 107 tys. rubloŭ i ŭ chimičnaj pramysłovaści — 757 tys. Čyhunačniki atrymlivajuć, pavodle aficyjnaj statystyki, 637 tys. Siaredni zarobak u sfery APK — 309 tys., u rabotnikaŭ kultury — 381 tys.

Chata Česłava Niemena

30 vieraśnia ŭ polskim Vrocłavie ŭ Halerei kalehijumu Ŭschodniaj Jeŭropy projdzie aŭkcyjon pracaŭ viadomych mastakoŭ z Ukrainy, Biełarusi, Polščy, Niamieččyny, Kitaju, ZŠA dy inšych krainaŭ. Vyručanyja srodki pojduć na kuplu j ramont chaty ŭ Starych Vasiliškach Ščučynskaha rajonu, dzie naradziŭsia i ros lehiendarny śpiavak i kampazytar Česłaŭ Niemen.

Eŭrastadyjon u Viciebsku

Viciebski centralny spartkompleks (były stadyjon «Dynama») atrymaŭ pryznańnie Sajuzu eŭrapiejskaj futbolnaj asacyjacyi (UEFA). Na spartovaj arenie abłasnoha centru ciapier možna pravodzić matčy eŭrakubkaŭ. Sprava za małym — kab viciebski «Lakamatyŭ» zavajavaŭ medali biełaruskaha čempijanatu. Mižnarodnym standartam adpaviadajuć taksama stadyjony ŭ stalicy, Homieli, Barysavie.

Syrnyja dni złodziejaŭ

U Čyli nieviadomyja nachabnym čynam skrali čatyry tony syru. Nalot byŭ učynieny ŭdzień u horadzie Kasablanka. Vykradalniki ŭvarvalisia na terytoryju małočnaha zavodu i, pahražajučy zbrojaj, prymusili rabočych pahruzić u aŭtamabil 350 skryniaŭ z syram, a taksama častku abstalavańnia, paśla čaho dali dzioru.

AR; football.by, naviny.by, pahonia.promedia.by

• 0
• 0
• 0
• 0
• 0
• 0
• 0
• 0