Biełarusy ŭ Camp Rising Sun

Upieršyniu za 75 hod isnavańnia mižnarodnaha letniku «Camp Rising Sun», zasnavanaha ŭ ZŠA, na źjeździe byłych udzielnikaŭ prysutničała delehacyja Biełarusi.

U asnovie «letniku ŭzychodziačaha sonca» lažać idei roŭnaści dy braterstva. Lahier uźnik dziakujučy namahańniam adnaho ekscentryčnaha biznesmena. Jahonaja meta — vychavańnie maładych lideraŭ, zdolnych usprymać novyja idei i ŭ budučyni aktyŭna dziejničać na karyść čałaviectva. Apošnim časam adbor kandydataŭ adbyvajecca dziakujučy Internetu, na sajt jakoha pretendenty dasyłajuć zajavy. Tamu partret klasyčnaha letnikaŭca namalavać ciažka. Heta moža być virłavokaja specyjalistka pa jadziernaj enerhietycy ź bierahoŭ Niłu, pank-rok-muzykant i abaronca ludziej ź niestandartnaj seksualnaj aryjentacyjaj ź Finlandyi abo amatar bejsbołu dy opernych śpievaŭ z Bronksu. «Usie tut krychu varjaty, narmalovych ludziej u letnik nie vybirajuć», — adznačyła praciŭnica aerobiki dy prychilnica piŭnoha nacyjanalizmu z polskaha Žyŭca.

Udzielniki letniku baviać dva miesiacy ŭ namiotach u lesie pad Ńju-Jorkam ci ŭ damkach u Danii dy praktyčna spaścihajuć idei demakratyi i roŭnaści. Častka letnikaŭcaŭ całkam apłačvaje niezvyčajnyja vakacyi, bolšaść marnuje hrošy sponsaraŭ. Zabaroniena vykarystańnie rečaŭ, što demanastrujuć sacyjalnuju niaroŭnaść (prajhravalnikaŭ kampakt-dyskaŭ, mabilnych telefonaŭ).

Važatyja i dzieci kličuć adzin adnaho pa imieni dy razam pracujuć na karyść supolnaści: siakuć drovy dy vykidajuć brudnuju papieru z prybiralniaŭ. Paralelna abmiarkoŭvajucca prablemy ekalohii dy parušeńni pravoŭ čałavieka. Nie abychodzicca biaź piesień la vohnišča, tancaŭ, performansaŭ, žartaŭ dy hulniaŭ.

Źjezd udzielnikaŭ letniku prachodziŭ hetym razam na turystyčnaj bazie Jachranka pad Varšavaj. Najmaładziejšaj udzielnicy było hod šeść, najstarejšamu ŭdzielniku — šeśćdziesiat. Ciešyła toje, što delehacyja ź Biełarusi ŭ składzie piaci čałaviek była ŭ piać razoŭ bolšaj, čymści ź Iślandyi. Upieršyniu ŭ historyi letniku pieravažyli ŭdzielnicy žanočaha połu.

Try dni pradstaŭniki roznych narodaŭ stavili bazu na vušy. Biełaruskaja delehacyja blisnuła śpievam «Kupalinki» la vohnišča. Bolšaść słavianskich narodaŭ uspryniała 75 adsotkaŭ infarmacyi, astatnich zavaražyŭ matyŭ dy vykanańnie na niekalki hałasoŭ.

Aprača šukańnia sponsaraŭ, abmiarkoŭvaŭsia novy prajekt stvareńnia letniku ŭ Kitai, jaki z pryčyny nielubovi kitajcaŭ da salarnaje symboliki nia budzie nasić nazovu «letniku ŭzychodziačaha sonca». Mažliva, nastupnyja biełaruskija letnikaŭcy buduć viartacca damoŭ nie ź jabłykami ź Ńju-Jorku, a z rysam z Pekinu.

• 0
• 0
• 0
• 0
• 0
• 0
• 0
• 0