Lidarka sacyjał-demakrataŭ raskazała, z kim u apazicyi budzie supracoŭničać, a z kim — nie

Staršynia Biełaruskaj sacyjał-demakratyčnaj partyi (Hramady) Iryna Vieštard adkazała na pytańni žurnalista haziety «Naš Mahiloŭ» Ihara Barysava.

U pryvatnaści było zadadziena pytańnie «Ź jakimi palityčnymi siłami partyja źbirajecca vieści dyjałoh».

Pierš-najpierš z apazicyjnymi partyjami, jakija isnujuć jak realnyja subjekty i mohuć vyłučać kandydataŭ u deputaty, u siabry vybarčych kamisij i h. d. Takich palityčnych arhanizacyj, akramia našaj, čatyry: Abjadnanaja hramadzianskaja partyja, Biełaruskaja partyja «Zialonyja», Biełaruskaja partyja levych «Spraviadlivy śviet» i Partyja BNF. Piataja partyja — Biełaruskaja sacyjał-demakratyčnaja Hramada — užo daŭnavata nie biare udzieł u palityčnych kampanijach. Što tyčycca Kansiervatyŭna-chryścijanskaj partyi BNF, padobna na toje, što jaje lider ličyć sapraŭdnymi apazicyjanierami tolki siabie i siabroŭ svajoj partyi.

A jak ža «Havary praŭdu» i «Ruch za svabodu»?

Pierš za ŭsio treba adznačyć, što i «Havary praŭdu», i «Ruch za Svabodu» ŭ značnaj miery abapirajucca na siabraŭ palityčnych partyj, pryciahvajuć ich u svaje šerahi, — skazała Iryna Vieštard

«Ruch za Svabodu», moža, i maje jarkaha lidara Alaksandra Milinkieviča, adnak, na maju dumku, sama arhanizacyja składajecca z adkołatych častak pravych partyj i arhanizacyj. Z Rucham «Za Svabodu» ciažka budzie vieści dyjałoh, bo šmat chto z členaŭ hetaj arhanizacyi maje dvajnoje siabroŭstva, to bok znachodzicca paralelna i ŭ «Ruchu za Svabodu», i ŭ adnoj z pravych partyj.

Što tyčycca kampanii «Havary praŭdu», to my ŭ bližejšy čas chacieli b sustrecca ź jaje kiraŭnictvam i parazmaŭlać ab našych dalejšych płanach uzajemadziejańnia. Kab nie atrymałasia tak, što siabry našaj partyi raptam stali «ichnimi». Kab nie było taho, što nazirałasia pry stvareńni «Ruchu za Svabodu». Nam nadakučyli ŭsie hetyja zavablivańni i sproby adkołvać aktyŭnych ludziej ad partyj. Bolšaść našych partyjcaŭ źjaŭlajucca prychilnikami taho, kab zachavać cełasnaść partyi.

Liču, što i «Havary praŭdu», i «Ruch za Svabodu» nie majuć vyraznaj palityčnaj ideałohii. Jakija kaštoŭnaści, aproč ahulnademakratyčnych, jany vyznajuć?

• 0
• 0
• 0
• 0
• 0