Hleb Samojłaŭ: «Usie my budziem viečna žyć na sajcie FSB»

Kultavy rasijski hurt «Ahata Kryści» spyniŭ isnavańnie try hady tamu. U sakaviku 2010 hoda adzin ź jaho frontmenaŭ — małodšy brat Samojłaŭ — pradstaviŭ novy prajekt «Hleb Samojłoff & The Matrixx». Jaho muzyka roźnicca ad toj, što rabiła «Ahata Kryści». U tekstach palityčnyja łozunhi spałučajucca z temami kachańnia, zdrady i śmierci. Niadaŭna «Hleb Samojłoff & The Matrixx» hrali ŭ Minsku.

Muzyka krytykuje rasiejskija ŭłady, vystupaje na «Maršy miljonaŭ» i hraje ŭ padtrymku «Pussy Riot».

Zamiest «Opijumu dla nikoha», «Bessa Me» i «Dekadansu», Hleb Samojłaŭ zaklikaje «rabić bomby, a nie seks», papiaredžvaje, što ŭsie my «budziem žyć zaŭždy na sajcie FSB» i pryśviačaje pieśni nacyjał-kamunistyčnaj haziecie Alaksandra Prachanava «Zavtra».

Starejšy brat Hleba Vadzim arhanizoŭvaŭ sustreču Dźmitryja Miadźviedzieva z rok-muzykami i dapamahaŭ namieśniku staršyni Administracyi prezidenta RF Uładzisłavu Surkovu zapisvać albom i vystupaŭ u Hramadskaj pałacie,

Małodšy Samojłaŭ admaŭlaje, što pryčynaj razryvu stała palityka: «U nas z Vadzikam prosta vielmi roznymi stali pohlady na tvorčaść. Doŭhi čas u składzie „Ahaty Kryści“ my musili šukać kampramis, ź niečym pahadžacca, čymści achviaravać. Pryjšoŭ momant, kali my prosta stamilisia ad hetaha. Tamu była pryniataje takoje rašeńnie. Abajudnaje i absalutna apalityčnaje».

— Toje, što vy robicie zaraz mocna adroźnivajecca ad «Ahaty Kryści». Adno ŭzhadvańnie FSB čaho kaštuje.

Hleb Samojłaŭ: Heta pieśnia była pryśviečanaja realnamu čałavieku — u 2008 hodzie adna z našych fanatak Maryja Časnakova skončyła žyćcio samahubstvam. A što datyčycca słovaŭ «žyć zaŭždy na sajcie FSB», dyk słuchaj, sajt hety isnuje, prapanuje supracoŭnictva. I ŭsie my, tak ci inačaj, žyviom na hetym sajcie, i budziem žyć tam zaŭždy, padabajecca heta kamu ci nie, choča chto taho ci nie. Takoje našaje sučasnaje žyćcio.

— U vašaj ciapierašniaj tvorčaści šmat palityki. Vy aktyŭna vykazvajecie hramadzianskuju pazicyju z dapamohaj muzyki, udzielničajecie ŭ akcyjach pratestu, padtrymlivajecie «Pussy Riot». Heta niejki vaš asabisty manifiest?

HS: Naŭrad ci heta manifiest. Heta prosta kanstatacyja faktu.

Žyćcio niespraviadlivaje: palityki, siońniašniaja ŭłada, kachańnie — usio niespraviadlivaje. Ja muzyka, aproč hetaha bolš ničoha nie umieju, tamu i pieradaju svaje adčuvańni i razumieńnie rečaisnaści adzinym sposabam, jakim mahu.

-To bok rok-n-rołł — heta pratest?

HS: Nu, nie tolki. Tam jašče muzyka jość (śmiajecca).

Hladzi, pierad scenaj stajać maładyja pryhožyja dziaŭčyny, śpiavajuć palityčnyja pieśni. Heta zdorava.

— Nie baiciesia, što vas mohuć zabaranić u Biełarusi?

HS: Dyk my pra Biełaruś i nie śpiavajem.

— Juryj Šaŭčuk taksama nie śpiavaje, ale jaho da nas nie puskajuć (hurt «DDT» patrapiŭ u tak zvany čorny śpis u śniežni 2010 hoda).

HS: Nu, nas pakul puskajuć. Moža paśla intervju pierastanuć (śmiajecca). Mahčyma, my nie majem takoha šerahu prychilnikaŭ, takoj važkaści ŭ hramadstvie, kab aficyjnaja ŭłada źviarnuła na nas uvahu.

— Cikavilisia, što ŭ Biełarusi adbyvajecca?

HS: Nu, zbolšaha viedaju. Chacia televizar i nie hladžu, bo rasiejskaje telebačańnie — tufta absalutnaja, niama čaho času hublać. Ale tak, čuju toje-sioje.

Mnie, pa ščyraści, acanić składana, bo ja ž dla vas usio adno inšaziemiec. I niekarektna kazać pra čužuju krainu, što, maŭlaŭ, voś, tam usio drenna, ułada žyćcia nie daje.

— A ŭ Rasiei vami jašče nie «cikavilisia»?

HS: Klipy na telebačańnie nie biaruć — heta fakt. Pa radyjo našyja pieśni taksama nie kruciać. Ale heta elemient niejkaj ich unutrannaj cenzury, sumniajusia, što śpiecsłužby majuć da hetaha dačynieńnie. Zatoje nas pa ORT pakazali adnojčy. U Dzień Rasiei pakazyvali aficyjny kancert, i pry akazii pakazali šeście apazicyi. I adznačyli, što dla apazicyi zahraŭ lehiendarny Hleb Samojłaŭ i The Matrixx. Zaśviaciŭsia navat jak lehiendarny. Nie mahu skazać, što nie paradavała.

— «Ahata Kryści» nie płanuje adnavicca?

HS: Nie,

ja i Vadzik žyviom absalutna roznym, kožny svaim ułasnym žyćciom. Ščyra kažučy, ja navat nie viedaju, što ciapier jon robić.

Na raźvitańnie Hleb Samojłaŭ pažadaŭ biełarusam «trymacca ŭ našych nialohkich umovach»

• 0
• 0
• 0
• 0
• 0